Radyo Pilipinas World Service

06/08/2026

| Naharang ng Bureau of Customs (BOC), katuwang ang PNP-CIDG at Philippine Coast Guard, ang hinihinalang counterfeit na imported footwear na nagkakahalaga ng humigit-kumulang ₱700 milyon sa isang warehouse sa Imus City, Cavite noong Agosto 3, 2026.

Isinagawa ang operasyon matapos makatanggap ng intelligence report mula sa PNP-CIDG Cavite tungkol sa umano’y mga imported na produktong lumalabag sa customs at intellectual property laws. Agad namang naglabas ang BOC ng Letter of Authority at nagsagawa ng inspeksiyon kasama ang mga tauhan ng IPRD, CIIS, ESS, Legal Service, PNP, at Philippine Coast Guard.

Sa inspeksyon, natagpuan ang mga sapatos na may mga trademark ng Adidas, On Cloud, New Balance, Asics, Crocs, Nike, Jordan, Puma, Converse, Skechers, at Louis Vuitton.

Nagpasalamat si BOC Commissioner Ariel F. Nepomuceno sa CIDG at iba pang partner agencies sa kanilang mahalagang impormasyon at koordinasyon.

Aniya, patunay ito ng kahalagahan ng matibay na pagtutulungan ng mga ahensya upang mapigilan ang pagpasok ng mga illegal na produkto at maprotektahan ang mga mamimiling Pilipino at mga lehitimong negosyo.

Ayon sa BOC, bahagi ang operasyon ng direktiba ni Pangulong Ferdinand R. Marcos Jr. na paigtingin ang border protection, sugpuin ang smuggling, at isulong ang patas na kalakalan upang maprotektahan ang mga consumer at negosyante. | ulat ni DK Zarate | RP1

06/08/2026

| Itinuturing ng Malacañang na diversionary tactic ng mga kaalyado ni Vice President Sara Duterte ang pagpapakalat ng impormasyon, kaugnay sa umano’y pagkakaaresto kay Senador Ronald Bato dela Rosa.

Ayon kay Communications Usec. Claire Castro, timing ang pagpapalaganap ng pekeng impormasyon, upang tabunan ang mga isiniwalat ng Commission on Audit (COA), sa impeachment trial kahapon (August 4), kaugnay ng umano’y milyong pisong halaga ng confidential funds na walang resibo ng Office of the Vice President (OVP) at Department of Education (DepEd).

Ayon kay Castro, walang sapat na konteksto ang mga ipinakakalat na pahayag nina Atty. Jimmy Bondoc at dating Presidential Spokesperson Harry Roque tungkol kay Dela Rosa.

Kasabay nito, hinikayat ni Castro ang publiko na maging mapanuri, alamin ang pinagmulan at motibo ng mga kumakalat na impormasyon, at magtiwala lamang sa mga beripikadong ulat ng mainstream media.

“Para matabunan ang mga naisiwalat ng COA patungkol sa mga walang resibo na paggasta ng milyong-milyong pisong confidential funds ni VP Sara sa OVP at DEPED. Makikita ang motibo sa ginagawang diversionary tactic ng mga kaalyado ni VP Sara. Maging mapanuri, mainstream media pa rin ang unang dapat na pagtiwalaan sa mga beripikadong balita.” — Castro. | ulat ni Racquel Bayan | RP1

06/08/2026

| Dapat magsilbing aral sa mga public servant ang mga pangyayaring nakaapekto sa trabaho ng Senado.

Pahayag ito ni Communications Undersecretary Claire Castro, makaraang sabihin ni Senator Imee Marcos na dalawang batas lamang ang naipasa nila sa Senado mula sa higit 50 priority bills.

Kung matatandaan, una nang inamin ni Senate President Win Gatchalian na naapektuhan ang legislative work ng Senado dahil sa sunod-sunod na pagbabago sa liderato.

Kabilang na rin dito ang tatlong araw na pag-boycott ng minority bloc sa Senate hearings, at ang on going impeachment trial ni Vice President Sara Duterte.

“Unang-una, sino po ba ang nag-umpisa ng pagbabago ng liderato at noong nagkaroon po ng pagbabago ng liderato, nandoon na po iyong nagkaroon ng putukan ng Senado, nagkaroon na po ng gulo sa Senado, nagkaroon ng tatlong araw na sunod-sunod na hindi pagpunta at pag-attend sa sesyon,” paliwanag ni Castro.

Dagdag pa niya, kung ang pabago-bagong liderato ang naging dahilan ng mababang legislative output sa Senado, dapat na tingnan kung sino ang nagpasimula ng mga pagbabagong nauwi sa kaguluhan at pagkaantala ng sesyon.

Aniya, ang mga pangyayaring ito ay dapat magsilbing aral sa lahat ng lingkod-bayan na unahin ang interes ng publiko kaysa pansariling interes ng iilan.

“Magsilbing aral sana ito sa lahat ng mga public servants na hindi puwedeng daanin sa ganitong klase ang pamumuno at ang dapat na laging manguna ay ang interes ng bayan, hindi ang sariling interes, hindi ang interes para lagi lang mamuno, kung hindi dapat ay para sa kabutihan ng bawat Pilipino,” ani Castro. | ulat ni Racquel Bayan | RP1

06/08/2026

| Nakipagpulong si Cabinet Secretary Benhur Abalos sa iba’t ibang business organization, at nangako na magtutulungan, upang palakasin ang implementasyon ng East of Doing Business sa Pilipinas.

Bilang suporta ito sa isinusulong ng Marcos administration na mas pinabilis at business-friendly environment sa bansa.

Sa pulong, ipinabot ng business delegation ang kanilang concern, at inilatag ang proposal na layong pagbutihin pa ang government process, mapadali ang pagpasok ng pamumuhunan sa bansa, at mapaigting ang kooperasyon sa pagitan ng public at private sector.

Siniguro ni Abalos na ang Office of the Cabinet Secretary (OCS) ay bukas sa mga suhestyong ito, para sa ikagaganda pa ng pagkilos ng pamahalaan.

“Ang sabi ng Pangulo, we are opening Malacañang. The doors are open for everyone,” Abalos said.

Binigyang-diin din ng kalihim ang kahalagahan ng praktikal at napapanahong solusyon, upang mabalanse ang pag-unlad, environmental protection, at kapakanan ng publiko, sa paggawa ng desisyon ng gobyerno.

Ilan sa mga dumalo sa pulong ay mga kinatawan mula sa Philippine Chamber of Commerce and Industry, Philippine Exporters Confederation, Inc.; Philippine Stock Exchange Council of Leaders; Employers Confederation of the Philippines; International Chamber of Commerce Philippines; Federation of Filipino Chinese Chambers of Commerce and Industry; Ease of Doing Business Philippines Foundation; Buklod Bayani Coalition; Women’s Business Council Philippines; at Philippine Association of Legitimate Service Contractors. | ulat ni Racquel Bayan | RP1

06/08/2026

| Walang-patid ang pagpapatayo ng National Housing Authority (NHA) ng mga proyekto sa ilalim ng Expanded Pambansang Pabahay para sa Pilipino o Expanded 4PH Program partikular na ang Rental Housing projects.

Sa panayam ng programang BOSES kay NHA General Manager Joeben Tai, sinabi nitong nagpapatuloy ang pagtatayo ng rental housing sa kahabaan ng NIA Road upang matulungan ang mga nabiktima ng sunog sa Barangay Pinayahan.

Ayon kay GM Tai pitong mid-rise building na may labing-isang palapag ang itatayo ng NHA sa Quezon City na isa sa mga itinuturing na prime areas sa National Capital Region.

Bagamat nilinaw ng NHA na hindi rent-to-own ang units na gagawin nila ay abot-kaya naman ito dahil papatak lang sa ₱2,000 kada buwan ang magiging upa, na perpekto para sa mga mahihirap na pamilya at siya ring magagamit ng mga residente na pansamantala lang namang mamamalagi sa Metro Manila.

Ani Tai, seryoso ang NHA na agad tupdin ang mga direktiba ni Pangulong Ferdinand R. Marcos Jr. na mabigyan ng maayos na matitirhan ang mga mahihirap na Pilipino at matulungan silang makaahon sa kahirapan.

Oras naman na maka-graduate na ang mga benepisyaryo ng Expanded 4PH program ay maaari na rin silang kumuha ng mura ring pabahay na rent-to-own naman na handog din ng NHA at ng Department of Human Settlements and Urban Development (DHSUD).

Pagtitiyak naman ng NHA na hindi lang sa QC itatayo ang rental housing units dahil ilalagay din ito sa iba pang prime areas sa Metro Manila upang mas maraming residente ang maabot at matulungan ng pamahalaan. | ulat ni Eph Gaytos | RP1

06/08/2026

Ingat lang po mga Cabalen.

Heavy Rainfall Warning No. 12
Weather System: Southwest Monsoon (Habagat) and Tropical Cyclone MAYMAY
Issued at: 5:00 PM, 06 August 2026(Thursday)

YELLOW WARNING LEVEL: Zambales, Bataan, Cavite, Metro Manila, Rizal, Laguna(San Pedro, Binan, Santa Rosa, Calamba, Cabuyao, Santa Maria, Mabitac, Pakil, Pangil, Siniloan, Famy), Batangas(Tanauan, Laurel, Talisay, Agoncillo, Lemery, Calaca, Balayan, Tuy, Nasugbu, Lian, Calatagan, San Nicolas, Taal, Balete, Malvar, Santa Teresita, San Luis, Bauan, Mabini, Tingloy), Pampanga(Porac, Floridablanca, Santa Rita, Bacolor, Guagua, Lubao, Minalin, Sasmuan, Macabebe, Masantol, Apalit, Mabalacat, Angeles, Mexico, San Fernando, San Luis, San Simon, Santo Tomas), Bulacan(Calumpit, Hagonoy, Paombong, Malolos, Plaridel, Pulilan, Guiguinto, Bulakan, Balagtas, Bocaue, Meycauayan, Marilao, Obando, Baliuag, Pandi, Bustos, Santa Maria, San Jose del Monte, Norzagaray) and Tarlac(Bamban, Capas, San Jose, Mayantoc, Santa Ignacia, Camiling, San Clemente).
ASSOCIATED HAZARD: FLOODING in flood-prone areas.

Meanwhile, light to moderate with occasional heavy rains affecting Laguna(Paete, Kalayaan, Lumban, Pagsanjan, Santa Cruz, Cavinti, Pila, Magdalena, Luisiana, Los Banos, Bay, Alaminos, Calauan, Victoria), Batangas(Santo Tomas, Mataasnakahoy, Lipa), Quezon(General Nakar), Tarlac(Concepcion, Anao, Tarlac City, Gerona, La Paz, Paniqui, Pura, Ramos, San Manuel, Victoria, Moncada), Pampanga(Arayat, Candaba, Magalang, Santa Ana), Bulacan(San Miguel, San Ildefonso, San Rafael, Angat, Dona Remedios Trinidad) and Nueva Ecija(Cuyapo, Nampicuan, Guimba, Licab, Zaragoza, San Antonio, Cabiao, San Isidro, Gapan) which may persist within 3 hours and may affect nearby areas.

The public and the Disaster Risk Reduction and Management Offices concerned are advised to MONITOR the weather condition and watch for the next warning to be issued at 8:00 PM today.

For more information and queries, please call telephone numbers 8927-1335 and 8927-2877 or log on to www.pagasa.dost.gov.ph.

06/08/2026

| Hindi magpapaka-kampante ang pamahalaan hanggang sa ganap mapababa ng presyo ng mga pangunahing bilihin at serbisyo.

Ito ang tinuran ng Department of Economy, Planning and Development (DEPDev) makaraang iulat ng Philippine Statistics Authority (PSA) na bumagal ng 6.2% ang inflation rate nitong Hulyo.

Sa panahon kasing ito, unti-unting nakabawi ang presyuhan ng langis bunsod ng peace deal na nabuo sa pagitan ng Iran at America na naresulta sa pagbubukas ng Strait of Hormuz.

Ayon kay Economic-Planning Secretary Arsenio Balisacan, nakapag-ambag din dito ang tuloy-tuloy na pagpapaabot ng tulong sa mga apektadong sektor gaya ng fuel subsidy at tulong pinansyal sa ilalim ng UPLIFT.

Tuloy-tuloy din aniya ang pagpapatatag sa food security at pagpapaunlad sa domestic food supply chains ng Department of Agriculture gaya ng pamamahagi ng mechanical drying systems sa mga magsasaka hanggang 2027. | ulat ni Jaymark Dagala | RP1

06/08/2026

| Tiniyak ng Malacañang nitong Martes na ang tulong at mga proyekto sa ilalim ng Local Government Support Fund (LGSF)—isang pangunahing programa ng pamahalaan sa ilalim ni Pangulong Ferdinand R. Marcos Jr.—ay nakalaan para sa lahat ng local government units (LGUs) sa buong bansa nang walang pinipiling kaanib sa politika.

Sa isang press briefing sa Palasyo, binigyang-diin ni Presidential Communications Office Undersecretary at Palace Press Officer Claire Castro na maging si Naga City Mayor Leni Robredo ay mismong nakasaksi at nagpatunay na ang LGSF ay naipamamahagi sa mga komunidad nang walang diskriminasyon.

“Ito po ay nabanggit din ni Mayor Leni Robredo ng Naga City na siya mismo ang nakakita at isa siya sa testigo na magsasabi na ang LGSF ay pangkalahatan, walang pinipiling kulay ito, walang pinipiling bayan, walang pinipiling lugar. Lahat ng barangay, lahat ng local government units ay mabibiyayaan ng LGSF,” pahayag ni Castro.

Hinimok ng opisyal ang publiko na makipag-ugnayan sa kanilang mga lokal na pinuno ukol sa pamamahagi ng LGSF, partikular na ang probisyon ng 10-kilogramong ayuda sa kanin na nakalaan para sa mga kwalipikadong benepisyaryo. Sa ilalim ng nasabing programa, ang mga mahihirap na sektor—kabilang ang mga low-income earner, senior citizen, at solo parent—ay nakatatanggap ng 10 kilo ng bigas bawat dalawang buwan.

Kasabay nito, nagbabala rin si Castro sa mga lokal na opisyal laban sa pananamantala sa kanilang mga nasasakupan matapos makatanggap ng mga ulat na may ilang benepisyaryo na nakatanggap ng bigas na kulang sa tamang timbang.

“Kapag may ganyan na nangyari, ipagbigay-alam niyo lang sa amin dahil kami mismo ang magka-call out, sisita sa mga ganitong klaseng pananamantala,” wika ni Castro.

Ipinaalala rin ng Palasyo na walang anumang bayad ang pagtanggap ng tulong mula sa pamahalaan.

“Kapag kayo ay sinabihan na kailangan magbayad kayo para makatanggap ng ayuda mula sa pamahalaan, wala pong bayad ni singko, so huwag po kayo magpapaloko,” dagdag pa niya. “Kapag kayo ay duda at mayroon kayong nararamdaman na panloloko, ipagbigay-alam niyo lang po sa amin ito para ito ay matugunan namin nang mabilisan.”

Ayon sa naunang pahayag ni Pangulong Marcos, mula sa humigit-kumulang 2,000 LGUs sa buong bansa, nasa 1,276 na ang nakatanggap ng ayuda sa ilalim ng programang LGSF. | via Janet Bayan/PBS Digital

06/08/2026

| Tumanggap ng ₱2,000 tulong-pinansyal ang nasa 998 benepisyaryo sa Guinobatan, Albay matapos ang isinagawang pamamahagi ng Department of Social Welfare and Development (DSWD) Bicol sa Barangay Ilawod Covered Court noong August 4, 2026.

Ayon kay DSWD Bicol Social Welfare Officer II Ronnalyn L. Aguilar mula sa Protective Services Division, ang naturang tulong pinansyal sa ilalim ng Unified Package for Livelihoods, Industry, Food and Transport (UPLIFT) Program na inisyatiba ni Pangulong Ferdinand “Bongbong” Marcos Jr. ay naglalayong suportahan ang mga poor, near-poor, at below minimum wage earners na labis na naapektuhan ng inflation at krisis na dulot ng tensyon sa Middle East.

Tinatayang 954 na households mula sa 22 barangay ang nakatakdang tumanggap sa payout venue habang ang mga benepisyaryo naman ng Walang Gutom at 4Ps Program ay direktang ididirekta sa kanilang mga bank account ang nasabing ayuda upang maiwasan ang pagsisiksikan at mahabang pila.

Upang maging kwalipikado, binigyang-diin ng opisyal na kinakailangang nakatala sa Community-Based Monitoring System (CBMS) bilang household head o household member ang benepisyaryo at magprisinta ng mga tinatanggap na valid ID tulad ng National ID, PhilHealth, UMID, o Voter’s ID.

Pinaalalahanan din ng ahensya ang mga benepisyaryo na sumunod sa nakatakdang iskedyul at kumpletuhin ang mga kinakailangang dokumento para sa mabilis at maayos na proseso ng pamamahagi. | ulat ni JM Olarte | RP1

06/08/2026

| Inihain sa Kamara ang panukalang Magna Carta for Public Disaster Risk Reduction and Management (DRRM) Workers na layong palakasin ang proteksiyon at benepisyo ng mga disaster responder sa bansa.

Ayon kay Marikina 1st District Representative Marcy Teodoro na panahon nang kilalanin sa pamamagitan ng batas ang sakripisyo ng mga DRRM personnel na nangunguna sa pagtugon sa mga kalamidad at iba pang emergency.

Sa ilalim ng House Bill No. 10553 gagawing propesyonal ang hanay ng mga DRRM worker sa pamamagitan ng pamantayan sa recruitment, pagsasanay, promotion, at patuloy na paglinang ng kanilang kakayahan.

Bahagi rin nito ang security of tenure, standardized career development, at pagkakaloob ng hazard, transportation, communication, subsistence, rice subsidy, at longevity allowances.

Nakapaloob din sa panukala ang overtime pay, night shift differential, health at insurance benefits, personal protective equipment, at legal assistance habang ginagampanan ng mga responder ang kanilang tungkulin.

Ayon pa kay Teodoro, ang pamumuhunan sa kapakanan ng mga DRRM worker ay pamumuhunan din sa kaligtasan at katatagan ng mga komunidad.

“Every typhoon, flood, earthquake, fire, and other emergencies remind us that our DRRM workers are among the country’s true modern-day heroes. They deserve not only our gratitude but concrete legal protection, decent compensation, career development, and security of tenure,” saad ni Teodoro. | ulat ni Kathleen Forbes | RP1