Radyo Pilipinas World Service

19/09/2025

| Sinuspinde ng Land Transportation Office (LTO) ang Driver’s License ng isang opisyal ng Department of Public Works and Highways (DPWH) na inireklamo ng umano’y pang-aabuso sa isang security guard sa isang subdivision.

Ayon kay LTO Chief, Assistant Secretary Vigor Mendoza II, naglabas na ng show cause order laban sa opisyal na abogado na una na ring sinibak ni DPWH Secretary Vince Dizon.

Batay sa reklamo, pinagmumura umano ng opisyal ang security guard matapos itong pagbawalang makapasok sa subdivision noong August 9. Umalis ito ngunit bumalik kalaunan at ipinahuli pa sa mga pulis ang guwardiya.

Sa inisyu namang Show Cause Order ng LTO, pinasusumite ng paliwanag ang opisyal kung bakit hindi dapat tuluyang bawiin ang kanyang lisensya dahil sa pagiging "improper person" na magmaneho ng sasakyan.

Nasa ilalim na ng 90-day preventive suspension ang lisensya ng naturang opisyal, o hanggang matapos ang imbestigasyon.

Inatasan din itong isuko ang kanyang lisensya bago o sa mismong araw ng nakatakdang pagdinig sa September 23. | ulat ni Merry Ann Bastasa | RP1

19/09/2025

| Nagpasalamat ang Malabon LGU kay Pangulong Ferdinand “Bongbong” Marcos Jr. kaugnay ng kanyang direktiba na lahat ng flood control projects ay kailangang dumaan muna sa inspeksiyon at pormal na pagtanggap ng mga lokal na pamahalaan bago ideklarang kumpleto.

Ayon kay Malabon City Mayor Jeannie Sandoval, mahalagang hakbang ito para matiyak na ang bawat proyekto ay tunay na makatutulong sa mga mamamayan.

Giit ng alkalde, matagal nang hamon sa Malabon ang problema sa baha, kaya’t nararapat lamang na ang mga flood control projects ay gawin gamit ang de-kalidad na materyales at sa tamang paraan upang mapakinabangan nang pangmatagalan.

Tiniyak din ng lokal na pamahalaan na makikipag-ugnayan ito sa mga national agencies para masigurong lahat ng proyekto ay kapaki-pakinabang at makapagbibigay ginhawa sa bawat Malabueño. | ulat ni Merry Ann Bastasa | RP1

19/09/2025

| Nais ni Marikina 2nd District Representative Miro Quimbo na magkaroon ng “Full Disclosure Policy” sa panukalang 2026 National Budget, partikular sa mga amyenda at insertions.

Sa budget briefing ng Department of Public Works and Highways (DPWH), iginiit ni Quimbo na dapat isapubliko kung sino ang nagpasok ng mga amyenda o proyekto upang maiwasan ang kalituhan at sisihan.

Inihalimbawa niya sa Estados Unido kung saan inililista ang earmarks at kung sino ang nagpasok nito upang sila mismo ang magdepensa nito sa publiko.

Suportado naman ni DPWH Secretary Vince Dizon ang mungkahi, at sinabi na ito ay alinsunod din sa nais ni Pangulong Ferdinand R. Marcos Jr. na higit pang pagtibayin ang transparency at accountability sa paggamit ng pondo ng bayan. | ulat ni Kathleen Jean Forbes | RP1

19/09/2025

| Ibinahagi ng Department of Health (DOH) na malaking porsyento ang tsansa na makaiwas ang isang indibidwal sa Alzheimer’s disease.

Giit ng DOH, na ayon sa World Health Organization, hanggang 40% ng mga kaso ng Alzheimer’s Disease ay maaaring maiwasan o mapigil ang paglala kung saan kinakailangan lang ng:

✅ Regular na ehersisyo at masustansyang pagkain
✅ Cognitive stimulation o mga aktibidad na nagpapalakas ng pag-iisip
✅ Maayos na pamamahala ng high blood at diabetes
✅ Maagang pagkonsulta sa mga Mental Health Access Sites

Paalala ng DOH: sa tamang pangangalaga at maagap na aksyon, maaaring maprotektahan ang isipan at kalusugan.

Ang ika-3 linggo ng Setyembre ay Alzheimer’s Disease Awareness Week. | ulat ni Lorenz Tanjoco | RP1

19/09/2025

| Suportado ng Independent Electoral Monitoring Council (IEMC) ang desisyon ng Commission on Elections (COMELEC) na ipahinto muna ang paghahanda para sa halalan sa October 13, habang hinihintay ang paglilinaw ng Korte Suprema sa bisa ng BAA 77.

Ayon sa IEMC, tama ang COMELEC na walang malinaw na legal na batayan ang BAA 77 o ang dating BAA 58 para ituloy ang Parliamentary District Elections sa BARMM.

Umapela rin ang grupo sa Korte Suprema, COMELEC, at Bangsamoro Transition Authority na agad maresolba ang isyu para matuloy ang halalan sa itinakdang petsa, o sa lalong madaling panahon.

Binigyang-diin ng IEMC na ang paulit-ulit na pagpapaliban ng halalan sa BARMM ay nakakasira sa tiwala ng publiko at sa integridad ng proseso ng halalan. | ulat ni Lorenz Tanjoco | RP1

19/09/2025

19/09/2025

| Tiniyak ni Department of Social Welfare and Development Spokesperson Assistant Secretary Irene Dumlao na nakahanda na ang ahensya sa pagtama ng Bagyong sa bansa.

Sa ilalim ng "Buong Bansa Handa" program ng DSWD, tinitiyak nito ang sapat na supply ng family food packs sa mga rehiyon na maaapektuhan ng mga kalamidad.

19/09/2025

| Nagpakita muli ng malasakit ang Philippine Coast Guard (PCG) matapos magbigay ng agarang tulong-medikal sa isang mangingisdang nasugatan sa karagatang malapit sa Bajo de Masinloc.

Ayon sa PCG, ang 32-taong gulang na mangingisda mula Subic, Zambales ay nawalan ng balanse dahil sa malalakas na alon at nasaktan ang kanang binti.

Agad siyang lumapit sa BRP Gabriela Silang, kung saan tinugunan ng Coast Guard Medical at Nursing Service ang kanyang pamamaga.

Matapos magamot, ligtas na nakabalik sa kanyang bangka at ipinagpatuloy ang pangingisda.

Ang insidente ay patunay ng patuloy na pagtupad ng PCG sa direktiba ni Pangulong Ferdinand R. Marcos Jr. na tiyakin ang kaligtasan ng ating mga mangingisda at palakasin ang presensya sa ating karagatan. | ulat ni Lorenz Tanjoco | RP1

19/09/2025

| Sa update ng Department of Social Welfare and Development, nakapag-abot na sila ng augmentation support sa ilang mga rehiyon sa bansa na apektado ng .

Ayon kay DSWD Spokesperson Assistant Secretary Irene Dumlao, nakapaghatid na ng tulong na Family Food Packs ang DSWD Region 2 sa mga apektadong residente roon.

19/09/2025

| Nanawagan si Rev. Fr. Jerome Secillano, Rector ng EDSA Shrine, sa mga lalahok sa nakatakdang "Trillion Peso March" ngayong Linggo, September 21, na dumalo muna sa banal na misa bago magtungo sa People Power Monument.

Gaganapin ang misa ng tanghali sa EDSA Shrine, bago ang rally mula alas-dos hanggang alas-singko ng hapon sa People Power Monument sa kanto ng EDSA Avenue at White Plains, Quezon City.

Hinikayat ni Fr. Secillano ang mga dadalo sa kilos-protesta na sama-samang manalangin upang humingi ng gabay ng Panginoon.

Dagdag pa niya, hindi layunin na gawing tono ng protesta ang misa upang hindi maasiwa ang ibang deboto na nais lamang manalangin nang tahimik. | ulat ni Merry Ann Bastasa | RP1

19/09/2025

| Ayon kay Department of Economy, Planning, and Development Undersecretary Rosemarie Edillon, makikipagtulungan ang ahensya sa Department of Budget and Management, upang maiangat pa ang kalidad ng edukasyon at makapag-produce pa ng mga propesyunal.

19/09/2025

| Target ng Land Transportation Office (LTO) na ipatupad simula sa susunod na buwan ang polisiya para sa mabilis na turnover ng license plates at OR/CR sa lahat ng brand-new motor vehicles at motorcycles.

Ayon kay LTO Chief Assistant Secretary Vigor Mendoza II, mayroon nang inilabas na guidelines para matapos sa mismong araw ng release ng bagong sasakyan ang registration at pag-isyu ng license plates at OR/CR.

Tugon ito sa direktiba ni Pangulong Ferdinand R. Marcos Jr. na siguraduhing mabilis, at walang backlog sa pagpaparehistro ng sasakyan.

“The instruction is to release all of them within three days but on the part of the LTO, we assessed that the release of license plates and OR/CR could be done on the same day the newly-purchased motor vehicle is released to the owner. That is why we will implement it,” pahayag ni Asec. Mendoza.

Target ng LTO na masimulang ipatupad ang polisiya sa October 15.

Matatandaang nitong Hunyo 2025 ay tuluyang naresolba ng LTO ang mahigit 12 milyong backlog sa license plates na inabot ng halos 11 taon. | ulat ni Merry Ann Bastasa | RP1