20/09/2025
Tinawag na “budol” ni dating Executive Secretary Vic Rodriguez ang plano ni Pangulong Ferdinand Marcos Jr. na ibalik sa PhilHealth ang ₱60 bilyong sobrang pondo.
Ayon kay Rodriguez, imposible raw itong mangyari dahil malinaw na deficit ang estado ng pondo ng gobyerno. “Paano maibabalik ang pera kung wala namang malinaw na savings at pinagkukunan?” ani Rodriguez. Bukod dito, iginiit niyang dapat muna sagutin ng administrasyon kung saan napunta ang naunang ₱29.9 bilyon na inilipat bago pa man nagpalabas ng Temporary Restraining Order (TRO) ang Korte Suprema laban sa paggamit ng pondo ng Maharlika Investment Fund. Para sa dating opisyal, tila panloloko umano sa publiko ang pangakong pagbabalik ng ₱60 bilyon kung wala namang transparent na accounting.
Samantala, magkaiba naman ang naging tono ni Rep. Chel Diokno. Sa halip na batikusin, pinuri niya ang hakbang ng Pangulo at sinabing malaking tulong ito upang mapalawak ang serbisyo ng PhilHealth, lalo na’t milyun-milyong Pilipino pa rin ang hirap makakuha ng sapat na tulong medikal. Gayunpaman, nanawagan siya sa Department of Health na tiyakin na ang nasabing pondo ay hindi masasayang o maaabuso, kundi gagamitin talaga sa pagpapalawak ng mga benepisyo at serbisyong pangkalusugan ng PhilHealth.
Sa pahayag naman ni Pangulong Marcos Jr., nilinaw niyang ang ₱60 bilyon ay hindi basta manggagaling sa deficit spending kundi kukunin mula sa realignment ng budget ng ilang ahensya ng gobyerno, kabilang ang Department of Public Works and Highways (DPWH). Para sa administrasyon, mas makabubuting i-prioritize muna ang kalusugan ng mamamayan kaysa sa ilang proyektong maaaring ipagpaliban.
Gayunpaman, nananatiling hati ang pananaw ng publiko. May mga nagsasabing makabubuti ang pagbuhos ng pondo sa sektor ng kalusugan, lalo na sa panahon ng krisis, ngunit may ilan ding nagsusulong ng masusing imbestigasyon at mas malinaw na breakdown bago pa ito maipatupad.
