31/08/2026
BALITA SA MGA LARAWAN | ‘Weaponization’ ng Industriya, Pinangangambahan sa Pax Silica
Tinawag ni Bayan Chairperson Teddy Casiño na ‘weaponization’ ng Philippine Industrial development ang planong Pax Silica ng administrasyong Marcos Jr.
Ayon kay Casiño, pinapalakas ng US ang estratehiyang ‘First Island Chain’ upang i-contain ang China. Sa tulong ng Pax Silica bilang AI supply chain hub, magsisilbing forward military base at AI supply chain para sa US ang Pilipinas.
“Kapag sumiklab ang digmaan sa Taiwan Strait. At nagkaroon ng direktang komprontasyon ang US at China ang Pilipinas ay malalagy sa frontline ng labanan,” dagdag pa Casino.
Ipinaliwanag ito ni Casiño sa paglulunsad ng Network Opposed to Pax Silica (No to Pax Silica) ngayong araw, Agosto 31, sa Maryhill School of Theology, Quezon City. Itinatag ang alyansa kasama ang iba’t ibang personalidad at grupo na tumututol sa 1,600 ektaryang proyekto sa Capas, Tarlac.
Nagbigay diin rin si Prop. Giovanni Tapang ng Advocates of Science and Technology for the People (AGHAM) na maaaring maapektuhan ng proyekto ang kakayahan ng Pilipinas na magtayo ng sarili nitong industriya sa hinaharap. Aniya, plano rin ng US na unahan ang China sa produksiyon ng AI Chips sa pamamagitan ng pagkuha ng mga mineral ng bansa, pagpoproseso nito, at pagtatayo ng mga data center. Pinangangambahan din ni Tapang ang posibleng radioactive na rare earth minerals mula sa pagtatayo ng proyekto na makakaapekto sa mga komunidad at ilog sa lugar.
“Paano naman ang aming salinlahi?” tanong ni Petrolina Capiz, pinuno ng mga komunidad ng Aetta, sa mga kalahok. Aniya sinabihan na daw sila ng Bases Conversion and Development Authority (BCDA) na hanggang disyembre na lamang sila sa kanilang lugar. Dagdag pa ni Capiz, nagsimula na ang harasment ng mga militar sa kanilang mga katutubo na tumututol sa proyekto.
Sa darating na Setyembre 5, ang Network Opposed to Pax Silica ay maglulunsad ng Solidarity Visit sa Capas, Tarlac. 📷 Joanna Robles/Pinoy Weekly
