The Adamson Chronicle

29/08/2026

JUST IN: Niratsada ng Adamson Lady Falcons ang Letran Lady Knights, 25-17, 25-18, 25-16, upang mapanatiling malinis ang kanilang kartada sa 2026 V-League Collegiate Challenge, sa Gameville Central Park, Mandaluyong City

Binalikat ni Frances Mordi ang Lady Falcons matapos kumubra ng 17 puntos na binuo sa 14 attacks, dalawang service aces at isang block.

Litrato ni: Hebron Matthew G. Lim

29/08/2026

HAPPENING NOW: Binabagtas ng mga residente ang baha sa Zapote Junction, na hirap madaanan ng ibang sasakyan sanhi ng patuloy na pag-ulan sa Las Piñas City.

Kasunod ito ng ibinabang red rainfall warning ng NDRRMC sa buong Metro Manila, na kasalukuyang nakararanas ng matinding pagbuhos ng ulan.

Nananatiling nakabantay naman ang mga awtoridad sa posibleng pagtaas ng Zapote River.

Ulat ni: Aaron Jacob P. Tesoro

28/08/2026

ICYMI: Kanselado ang face-to-face classes sa lahat ng antas bukas, habang patuloy na ilulunsad ang online synchronous dulot ng pinalakas na habagat.

AdUVISORY

Following the announcement of the Office of the Manila Mayor, Face-to-Face classes at all levels are suspended tomorrow, Saturday, August 29, 2026, due to inclement weather.

Classes will shift to the online synchronous mode.

Stay safe, Klasmeyts.

The Administration

28/08/2026

LOOK: Namahagi ng ekspertis at etikal na kasanayan sa photojournalism ang Presidential Photojournalists’ Association (PPA) sa ginanap na Behind the Lens: Photographing the President, sa Likhang Filipino Exhibit, ngayong araw.

Tinampok ng mga tanyag na palace photographers na sina Noel Pabalate, Revoli Cortez, Mark Balmorez, at Yummie Dingding ang mga payo at paalala sa pagkuha ng litrato mula sa kanilang karanasan.

Ang inisyitiba ay kumilala sa mga litratista bilang bahagi ng World Photography day noong Agosto 19.

Ulat ni: Patricia Julian M. Paglinawan, Jury T. Leynes

28/08/2026

Adamson sumikwat ng bronze, kinapos sa finals bid

Lumapag sa kauna-unahang bronze finish ang Adamson Soaring Falcons bagamat nasibak ng DLSU Green Aces, 1-2, sa 2026 UAAP Esports-Mobile Legends: Bang Bang (MLBB) nitong Miyerkules sa MVP Studios, Mandaluyong City.

Sa kabuuan, umani ang Soaring Falcons ng 7-2 standing at kumamada ng siyam na puntos mula sa magkakasunod na dominanteng bakbakan kontra FEU at UP.

Naghari si Hilario kontra FEU, na bumuo ng anim na kills, walong assists gamit si Freya, bago muling magpasiklab kay Harith na may 10 kills, limang assists, at walang death.

Bagamat natakasan ng Tamaraws ang Lord sa gitna ng 12-2 run at 10k gold lead, sumabak sina Hilario at Valera sa clash upang i-wipe out ang FEU bago itulak ang 17-2 panalo.

Tuluyang kinubkob ng Falcons ang FEU para wasakin ang base hanggang sa tuluyang sinelyuhan ang 23-10 panalo.

Sa kasunod na seryeng kontra UP, nangratsda pa rin at binutas ng Adamson ang inhibitor turrets kasunod ng pagkuha sa Lord upang tuluyang pasukin ang base, 19-5.

Napanatiling buhay ang bentahe tungo sa ikalawang bakbakan sa kabila ng mas maigting na depensa ng UP, na rumesulta sa 14-7, na pinangunahan ni Valera.

Gawa ng pamamayagpag sa sunod-sunod na laro na binalikat ng mga strategic push at dipensa, sinagupa naman ng cast ang kapantay na koponan mula sa kabilang bracket kahapon.

Agad na nagpakilala ang DLSU at inagaw ang eksena nang muntik na maisahan ang base ng San Marcelino, bago tuldukan sa 20-11 ni Adamson gold laner Hilario.

Rumesponde naman ang Green Aces sa Game 2 matapos ma-outmaneuver ang Falcons at tuluyang magiba ang kanilang depensa hanggang maitabla ang serye, 7-19.

Nang manganib sa do-or-die na laban, lalong kinontrol ng DLSU ang mapa at ikinulong ang Adamson sa kanilang base upang kamkamin ang 15-2 at finals berth.

Ayon sa isang panayam kasama ang Adamson MLBB Coach John Carlo Argonza, inasahan na nila ang magiging pagsubok na harapin ang dalawang prominenteng koponan sa kabilang bracket.

“We know that the other bracket is stronger [than] our bracket […]. So we are expecting to sweep the group kasi we know na we’re the best [in] our group, it’s just that ‘yung nasa kabilang bracket is ‘yung dalawa nating magaling na nasa finals,” pahayag niya.

Mula rito, nangako ang Adamson Soaring Falcons na magpapakita ng mas solido at mas mahusay na laro para sa susunod na season upang makabawi sa hindi inaasahang pagkabigo.

Ang 2026 UAAP Esports-Mobile Legends: Bang Bang ay bahagi ng special demonstration event na ginaganap tuwing Agosto bilang paghahanda para sa opisyal na pagbubukas ng UAAP Season 89.

Ulat ni: Patricia Julian M. Paglinawan
Layout ni: Atlee Mae M. Nueva
Litrato mula sa: UAAP Media Team

28/08/2026

ICYMI: Mula sa rekomendasyon ng Malacañang, sinuspinde ng Unibersidad ang lahat ng pasok simula 1:00 p.m. dulot ng masamang panahon ngayong hapon.

Magsasara rin ang kampus para sa on-site transactions.

AdUVISORY

Following the announcement from the Malacañang Palace, classes at all levels and work in offices are suspended today , Friday, August 28, 2026, at 1: 00 PM due to inclement weather.

The campus will be closed and there will be no onsite transactions.

This supersedes the earlier announcement.

Please be guided accordingly.

The Administration

27/08/2026

JUST IN: Sinuspinde ng Unibersidad ang on-site classes sa lahat ng antas bukas, kapalit ng paglulunsad ng online synchronous modality.

Kasunod ito ng inaasahang pagbabalik ng habagat mula hapon hanggang Sabado.

Mananatili namang bukas ang mga opisina para sa mga on-site transaction.

AdUVISORY

Following the announcement of the Office of the Manila Mayor, Face-to-Face classes at all levels are suspended tomorrow, Friday, August 28, 2026, due to inclement weather. Classes will shift to online synchronous mode.

All offices will remain open for onsite transactions.

Stay safe, Klasmeyts.

The Administration

26/08/2026

LOOK: Bilang paggunita sa Buwan ng Wika, idinaraos ng Cultural Affairs Office (CAO) ang GUHITISTA, isang basic drawing at coffee painting workshop, sa Adamson University Art Gallery, ngayong araw.

Sinulong ng inisyatiba na hasain ang malikhaing kakayahan ng mga Adamsonians.

Ito ay kaugnay ng art exhibit ng Art Jam Manila, na mananatiling bukas hanggang biyernes.

Ulat ni: Kurt Bryan S. Cabaobao, Patricia Julian M. Paglinawan

26/08/2026

GGWP! 🫂🙌

Bumagsak ang pwersa ng Adamson Soaring Falcons, 1-2, laban sa defending champions De La Salle Green Aces, sa semifinals ng 2026 UAAP Esports - Mobile Legends: Bang Bang sa MVP Studios, Mandaluyong City.

Bagamat nabigo ang Falcons na sungkitin ang kampeonato, tinapos nila ang group stages nang walang talo, 6-0.

Litrato mula sa: UAAP Media Team

25/08/2026

Dinaig ng Adamson Soaring Falcons ang UP Fighting Maroons, 2-0, sa 2026 UAAP Esports-Mobile Legends: Bang Bang sa MVP Studios, Mandaluyong City.

Binitbit ng cast ang momentum para kalampagin ang torneyo sa magkasunod na pagblangko ng dalawang koponan ngayong araw.

Litrato mula sa: UAAP Media Team