https://www.facebook.com/107273202202508/

Padayon URS - Montalban, Amityville, Rodriguez (2026)

29/03/2026

𝗣𝗔𝗗𝗔𝗬𝗢𝗡 - 𝗟𝗔𝗧𝗛𝗔𝗟𝗔𝗜𝗡 : Ang Earth Hour sa Panahon ng Pagtaas ng Presyo ng Petrolyo

Magi-isang buwan na simula nang pumutok ang giyera sa pagitan ng Israel at Estados Unidos laban sa Iran, dahilan para harangan ng Iran ang Strait of Hormuz kung saan dumadaan ang malaking porsyento ng petrolyong papunta sa pandaigdigang merkado.

Dahil dito, tumaas ang presyo ng petrolyo sa buong mundo at dito sa Pilipinas ay damang dama ito ng mga Pilipino, mula sa mga pasahero at drayber ng pampublikong transportasyon hanggang sa mga kumpanyang nagda dagdag gastos sa pag-transport ng kanilang mga produkto.

Ang selebrasyon ng Earth Hour, na inorganisa ng World Wide Fund for Nature ay naglalayong magpaalam tungkol sa Climate Change, pagkasira ng kalikasan, at panghihikayat sa mga tao na gumawa ng mga hakbang para maging sustainable. Ang Climate Change na dulot rin ng paglabas ng greenhouse gases mula sa mga pagsu sunog ng fossil fuels gaya ng petrolyo.

Pero ngayong Earth Hour na kasabay ng pagtaas ng presyo ng petrolyo, mas nagiging klaro ang mensaheng ito. Na ang Petrolyo ay hindi pang habambuhay. Nakakalungkot lang na dahil sa sitwasyon, agad agarang kinakailangan ng ating mga kababayan na maghigpit ng sinturon para lang makatipid at maging sustainable.

Kung susumahin, kahit sa simpleng pag patay ng ilaw nang sabay sabay ng ilang oras tuwing Earth Hour, Malaki ang maitutulong nito. Kung pagbabasehan sa datos noong 2025, bumaba ng 161.98 megawatts ang pagkonsumo ng bansa sa araw na iyon na nagpapakita ng mataas na partisipasyon.

Ang perang natipid mula sa pagkonsumo ng kuryente ay pwedeng mailaan sa pagsalo sa pagtaas ng mga presyo ng bilihin na buhat pa rin ng mataas na presyo ng petrolyo.

Ang Earth Hour sa panahon ng pagtaas ng presyo ng petrolyo ay tanda na ang pagiging sustainable ay hindi lamang para sa kalikasan, pati narin ito sating mga tao na parte rin nito. Ang kalikasan at ekonomiya ay hindi naman pala nagkakalayo.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗻𝗶 𝗥𝘂𝘀𝘀𝗲𝗹 𝗠𝗮𝗿𝘁𝗶𝗻 | 𝗣𝗔𝗗𝗔𝗬𝗢𝗡, 𝗣𝗮𝘁𝗻𝘂𝗴𝗼𝘁 𝗻𝗴 𝗟𝗮𝘁𝗵𝗮𝗹𝗮𝗶𝗻

24/03/2026

𝗣𝗔𝗗𝗔𝗬𝗢𝗡 : 𝗟𝗘𝗧𝗥𝗔-𝗜𝗧𝗢

Sa gitna ng kalsada, sa likod ng bawat busina, may kwento ng pakikibaka.

Ang bawat pasada ay mayroong kwento. Sa bawat biyahe, hindi lamang pasahero ang sakay ng mga tsuper. Kasama rito ang kanilang araw-araw na pakikipagsapalaran. Bawat pagbusina at pag-ikot ng apat na gulong ay simbolo ng kanilang pakikibaka— kung may maiuuwi pa ba sa pamilya o maitatawid ba nila ang bukas.

Sa patuloy na pagtaas ng presyo ng petrolyo, nananatiling nakapako ang presyo ng pamasahe. Sa kabila ng patak ng kanilang mga pawis dahil sa maghapong pamamasada, tanging kinikita nila ay maliit na barya.

Bakit tila napag-iiwanan ang mga hari ng lansangan? Ang jeepney ay umaandar subalit ang kabuhayan nila'y naiiwan sa likod.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗔𝗷𝗵𝗮𝘆 𝗚𝘂𝘁𝗶𝗲𝗿𝗿𝗲𝘇 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

18/03/2026

𝗣𝗔𝗗𝗔𝗬𝗢𝗡 : 𝗟𝗘𝗧𝗥𝗔-𝗜𝗧𝗢 "𝙆𝙪𝙣𝙜 𝙖𝙣𝙜 𝙥𝙖𝙜𝙢𝙖𝙢𝙖𝙝𝙖𝙡 𝙨𝙖'𝙮𝙤 𝙖𝙮 𝙞𝙨𝙖𝙣𝙜 𝙠𝙖𝙨𝙖𝙡𝙖𝙣𝙖𝙣, 𝙝𝙖𝙮𝙖𝙖𝙣 𝙢𝙤𝙣𝙜 𝙞𝙩𝙖𝙠𝙬𝙞𝙡 𝙖𝙠𝙤 𝙣𝙜 𝙡𝙖𝙣𝙜𝙞𝙩.
𝙎𝙖𝙥𝙖𝙜𝙠𝙖𝙩 𝙥𝙖𝙖𝙣𝙤𝙣𝙜 𝙖𝙣𝙜 𝙞𝙨𝙖𝙣𝙜 𝙥𝙖𝙜-𝙞𝙗𝙞𝙜 𝙣𝙖 𝙣𝙖𝙥𝙖𝙠𝙖𝙙𝙖𝙡𝙞𝙨𝙖𝙮 𝙨𝙖 𝙙𝙖𝙢𝙙𝙖𝙢𝙞𝙣 𝙖𝙮 𝙢𝙖𝙜𝙞𝙜𝙞𝙣𝙜 𝙢𝙖𝙡𝙞 𝙨𝙖 𝙢𝙖𝙩𝙖 𝙣𝙜 𝙩𝙖𝙙𝙝𝙖𝙣𝙖?"

Kung ang pagmamahal sa’yo ay nangangahulugang nilabag ko ang isang tuntunin,
hayaan mong tawagin ako ng mundo na suwail. Sapagkat naranasan ko kung ano ang magmahal nang walang hangganan,
ang magbigay nang walang sukat, at ang mahulog—maganda man o masakit—para sa isang taong hindi kailanman itinadhana para sa akin.

At kung ang bawat pintig ng puso ko ay isang paglapastangan sa mga batas ng tadhana,hindi ko ito ipagkakaila.
Dahil sa piling mo, natutunan kong ang pag-ibig ay hindi nasusukat sa tama o mali,
kundi sa lalim ng pagdama at sa tapang na ialay ang sarili, kahit kapalit ay pagdurusa.

Hayaan mong ako’y husgahan ng mundo,
sapagkat sa bawat sakit na aking tinatanggap
ay naroon ang isang katotohanang hindi kayang pasinungalingan—na minsan sa aking buhay,
minahal kita nang buo, walang pag-iimbot, at walang pagsisisi, kahit pa ang kapalit nito’y ako’y tuluyang mawala sa landas na dapat sana’y tinahak ko.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗮𝗿𝗮𝘄𝗮𝗻 𝗻𝗶 𝗝𝗼𝗻𝗴 𝗠𝗮𝗻𝗮𝗹𝗮𝗻𝗴 | 𝗣𝗔𝗗𝗔𝗬𝗢𝗡, 𝗣𝘂𝗻𝗼𝗻𝗴 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

15/03/2026

𝗣𝗔𝗗𝗔𝗬𝗢𝗡 - 𝗕𝗔𝗟𝗜𝗧𝗔 :
𝗕𝗮𝗱𝗼𝗻𝗴, 𝗖𝗮𝗹𝗶𝘀𝗶𝗻, 𝗩𝗶𝗹𝗹𝗮𝗺𝗶𝗻 𝗸𝗶𝗻𝗶𝗹𝗮𝗹𝗮 𝗯𝗶𝗹𝗮𝗻𝗴 𝗢𝘂𝘁𝘀𝘁𝗮𝗻𝗱𝗶𝗻𝗴 𝗧𝗲𝗿𝘁𝗶𝗮𝗿𝘆 𝗖𝗮𝗺𝗽𝘂𝘀 𝗝𝗼𝘂𝗿𝗻𝗮𝗹𝗶𝘀𝘁

Kinilala sina Jhoanna Marie Badong, Jeffrey Calisin, at Emelyn Villamin ng Pamitinan, opisyal na publikasyon ng University of Rizal System – Rodriguez Campus, sa Search for Outstanding Tertiary Campus Journalists (OTCJ) sa Rehiyon IV-A (CALABARZON) noong Marso 14.

Tinanghal si Badong, Managing Editor at Sports Editor ng publikasyon, bilang Top 2 Outstanding Tertiary Campus Journalist matapos makapagtala ng 80 puntos. Samantala, pumuwesto naman sa ika-anim si Calisin, Editor-in-Chief, na may 60 puntos, habang nasa ika-pitong puwesto si Villamin, Associate Editor, na nakakuha ng 50 puntos.

Bago ang naturang pagkilala, nagpakita rin ng kahusayan ang mga mamamahayag ng Pamitinan sa Regional Higher Education Press Conference (RHEPC) 2026 na ginanap sa Batis Aramin Hotel and Resort, Lucban, Quezon noong Pebrero 14–16. Sa naturang kompetisyon, nasungkit ni Badong ang 1st Place sa Sports Writing (English) at 10th Place sa Column Writing (English), dahilan upang maging qualifier sa Luzon-wide Higher Education Press Conference (LHEPC) 2026 na gaganapin sa Tuguegarao City, Cagayan mula Marso 17–19.

Samantala, nakamit din ni Villamin ang 9th Place sa Feature Writing (English) sa parehong kompetisyon.

Ang pagkilalang ito ay patunay ng patuloy na husay at dedikasyon ng mga campus journalist ng Pamitinan sa paghahatid ng makabuluhan at responsableng pamamahayag sa komunidad ng pamantasan.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗻𝗶 𝗟𝘆𝗸𝗮 𝗧𝗶𝗽𝗮𝗻𝗲𝗿𝗼 | 𝗣𝗔𝗗𝗔𝗬𝗢𝗡, 𝗣𝗮𝘁𝗻𝘂𝗴𝗼𝘁 𝗻𝗴 𝗕𝗮𝗹𝗶𝘁𝗮

𝗗𝗶𝗯𝘂𝗵𝗼 𝗻𝗶 𝗖𝗵𝗮𝗿𝗶𝘇𝘇𝗲 𝗠𝗲𝘀𝗮 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗽𝗮𝗴-𝗔𝗻𝘆𝗼 𝗻𝗴 𝗣𝗮𝗵𝗶𝗻𝗮

𝗟𝗮𝗿𝗮𝘄𝗮𝗻 𝗺𝘂𝗹𝗮 𝘀𝗮 𝗖𝗔𝗟𝗔𝗕𝗔𝗥𝗭𝗢𝗡 𝗔𝘀𝘀𝗼𝗰𝗶𝗮𝘁𝗶𝗼𝗻 𝗼𝗳 𝗖𝗼𝗹𝗹𝗲𝗴𝗲 𝗘𝗱𝗶𝘁𝗼𝗿𝘀

12/03/2026

Sa 𝙐𝙍𝙎 𝙈𝙤𝙣𝙩𝙖𝙡𝙗𝙖𝙣, ang bawat hakbang ng isang kababaihan ay pinagdiriwang bilang isang kuwento ng 𝙡𝙖𝙠𝙖𝙨, 𝙩𝙖𝙥𝙖𝙣𝙜, 𝙖𝙩 𝙥𝙖𝙜𝙗𝙖𝙗𝙖𝙜𝙤. Ngayong 𝐍𝐚𝐭𝐢𝐨𝐧𝐚𝐥 𝐖𝐨𝐦𝐞𝐧'𝐬 𝐌𝐨𝐧𝐭𝐡, kinikilala at ipinagdiriwang natin ang mga kababaihang patuloy na nagbibigay inspirasyon sa ating komunidad at sa buong lipunan. Sa kanilang 𝙠𝙖𝙩𝙖𝙩𝙖𝙜𝙖𝙣, 𝙩𝙖𝙡𝙞𝙣𝙤, 𝙖𝙩 𝙙𝙚𝙙𝙞𝙠𝙖𝙨𝙮𝙤𝙣, patuloy nilang pinatutunayan na ang kababaihan ay isang mahalagang bahagi sa paghubog ng isang mas makatarungan at umunlad na kinabukasan.

𝘼𝙣𝙜 𝙥𝙖𝙜𝙠𝙖𝙠𝙖𝙥𝙖𝙣𝙩𝙖𝙮-𝙥𝙖𝙣𝙩𝙖𝙮, 𝙥𝙖𝙜𝙠𝙞𝙡𝙖𝙡𝙖, 𝙖𝙩 𝙥𝙖𝙜𝙗𝙞𝙗𝙞𝙜𝙖𝙮-𝙝𝙖𝙡𝙖𝙜𝙖 𝙨𝙖 𝙗𝙤𝙨𝙚𝙨 𝙖𝙩 𝙠𝙖𝙠𝙖𝙮𝙖𝙝𝙖𝙣 𝙣𝙜 𝙗𝙖𝙬𝙖𝙩 𝙗𝙖𝙗𝙖𝙚 𝙖𝙮 𝙞𝙩𝙖𝙩𝙖𝙜𝙪𝙮𝙤𝙙 𝙣𝙖𝙩𝙞𝙣 𝙣𝙖𝙣𝙜 𝙢𝙖𝙜𝙠𝙖𝙠𝙖𝙨𝙖𝙢𝙖. Patuloy nating ipagdiwang ang kanilang mga tagumpay, pangarap, at kontribusyon sa edukasyon at sa bayan.
𝘼𝘽𝘼𝙉𝙏𝙀 𝘽𝘼𝘽𝘼𝙀!! 💜🌸

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗻𝗶 𝗝𝗮𝗰𝗸𝗶𝗲𝗹𝗼𝘂 𝗔𝗺𝗮𝘀𝗮𝗻 | 𝗣𝗔𝗗𝗔𝗬𝗢𝗡, 𝗠𝗮𝗻𝘂𝗻𝘂𝗹𝗮𝘁 𝗻𝗴 𝗣𝗮𝗻𝗶𝘁𝗶𝗸𝗮𝗻

𝗗𝗶𝗯𝘂𝗵𝗼 𝗻𝗶 𝗝𝗲𝗿𝘂𝗲𝗹𝗮 𝗗𝗲 𝗟𝗲𝗼𝗻 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗽𝗮𝗴-𝗔𝗻𝘆𝗼 𝗻𝗴 𝗣𝗮𝗵𝗶𝗻𝗮

10/03/2026

𝗣𝗔𝗗𝗔𝗬𝗢𝗡- 𝗟𝗘𝗧𝗥𝗔-𝗜𝗧𝗢 : Ang Tahimik na Saksi ng Kawalang-malay

Isang unipormeng pampaaralan ang nagsisilbing p**i ngunit makapangyarihang saksi sa gitna ng eksibit na naglalayong bungkalan ang ugat ng paninisi sa mga biktima ng karahasang seksuwal. Ang kasuotang ito, na suot ng isang kabataang nasa rurok pa lamang ng kanyang pangarap nang maganap ang malagim na pangyayari, ay isang matalim na paalala na ang karahasan ay walang pinipiling bihis, oras, o lunan.

Sa ilalim ng panawagang 'Respeto Naman, hinahamon ng lathalaing ito ang lipunan na iwaksi ang mapanghusgang tingin sa mga biktima at sa halip ay ituon ang pagsisiyasat sa maysala at sa sistemang kumukunsinti rito. Ang bawat hibla ng telang ito ay sumisigaw ng katotohanan: na ang bawat tao ay may likas na karapatan sa kaligtasan at paggalang. anuman ang kanilang anyo o kasuotan. Isang pag-anyaya ito sa bawat mamamayan na makiisa sa pagbuo ng isang mundong malaya sa takot at puno ng katarungan para sa lahat.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗝𝘂𝘀𝘁𝗶𝗻𝗲 𝗠𝗮𝗿𝗾𝘂𝗲𝘇 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻 𝗮𝘁 𝗠𝗮𝗻𝘂𝗻𝘂𝗹𝗮𝘁 𝗻𝗴 𝗣𝗮𝗻𝗶𝘁𝗶𝗸𝗮𝗻

03/03/2026

𝗣𝗔𝗗𝗔𝗬𝗢𝗡 : 𝗟𝗘𝗧𝗥𝗔-𝗜𝗧𝗢
Biyaheng mag-isa ngunit Makabuluhan

Biyaheng mag isa, dala ang katahimikan,
walang ibang tinig, isip ko ang kasamahan.
Sabi nila’y malungkot kapag walang kaagapay,
Ngunit sa paglalakad, sarili ko’y mas nasilayan nang tunay.

Sa bawat hakbang sa kalsadang payapa,
Walang kailangang sabayan, walang kailangang patunayan pa.
Anino ko lamang ang tapat na kasama,
At sa ilalim ng ilaw, damdami’y mas luminaw at sumigla.

Hindi pala lungkot ang pag-iisa kung minsan, kundi lunas na marahang yumayakap sa kalooban. Sa tahimik na paglalakbay at payak na tanawin, Natagpuan ko ang ganda hindi sa iba, kundi sa aking sarili rin.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗥𝗼𝘆𝗲𝘁𝗵 𝗕𝗿𝗮𝗼 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

03/03/2026

𝗣𝗔𝗗𝗔𝗬𝗢𝗡 : 𝗟𝗘𝗧𝗥𝗔-𝗜𝗧𝗢

Si Nanay Lilia ay isang matandang babae na may malalim na pananampalataya. Araw-araw, siya ay nakatayo sa harap ng altar, nakapikit ang mga mata, at idinadalangin ang kanyang mga kamay sa Diyos. Hindi siya tumitigil sa pagdarasal, kahit sa mga simpleng bagay o malalaking problema.

Gaya ni Nanay Lilia, tayo rin ay maglaan ng oras sa pagdarasal. Hindi man natin makamit ang lahat ng ating mga hiling, ang pagdarasal ay nagbibigay sa atin ng kapayapaan at lakas.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗝𝗶𝗺𝗮𝗿 𝗔𝗶𝘀 𝗧𝗮𝗴𝗮𝗼 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

25/02/2026

𝗟𝗔𝗛𝗔𝗧 𝗡𝗚 𝗦𝗔𝗡𝗚𝗞𝗢𝗧, 𝗗𝗔𝗣𝗔𝗧 𝗠𝗔𝗡𝗔𝗚𝗢𝗧.

𝗘𝗗𝗦𝗔 𝗣𝗘𝗢𝗣𝗟𝗘 𝗣𝗢𝗪𝗘𝗥 40𝘁𝗵 𝗔𝗡𝗡𝗜𝗩𝗘𝗥𝗦𝗔𝗥𝗬 — Ang EDSA 1986 ay bunga ng mahabang panahong pagtitiis ng bayan sa pandarambong, panunupil, at pagyurak sa karapatang pantao hanggang dumating ang sandaling pinili ng mamamayan na lumabas, tumindig, at wakasan ang isang diktadurya. Ito ay patunay na may hangganan ang kapangyarihang inaabuso at may pananagutang hindi kayang takasan ng sinumang nagkasala sa bayan.

Ngayong apat na dekada ang lumipas, muling hinahamon ang alaala ng EDSA sa pamamagitan ng pagbubura at pagpapalabnaw sa kasaysayan—mula sa pagbaluktot sa mga krimen ng Batas Militar hanggang sa pagbabawas ng bigat ng mismong araw na nagpabagsak sa diktadurya. Sa pagbabalik ng isang Marcos sa kapangyarihan, lalong nagiging malinaw na ang pakikibaka ay hindi natapos noong 1986. Ito ay ipinagpatuloy, ipinasa, at muling ipinaglalaban sa harap ng katiwalian at pang-aabuso sa kasalukuyan.

Kaya bilang kabataan at mga Iskolar ng Bayan, hindi opsyon ang pananahimik. Ang EDSA ay hindi lamang alaala ng nakaraan kundi paniningil sa kasalukuyan—paniningil ng katarungan, katotohanan, at pananagutan. Hangga’t may sinisikap maglinis ng pangalan at magbura ng kasaysayan, tungkulin nating ipaalala na buhay ang EDSA dahil buhay ang bayan.

At hangga’t hindi nananagot ang lahat ng sangkot, tuloy ang laban.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘈𝘋𝘈𝘠𝘖𝘕! 📰

𝘗𝘈𝘋𝘈𝘠𝘖𝘕✍🏻- 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗻𝗶 𝗣𝘀𝘆𝗿𝗲𝗹𝗹𝗲 𝗝𝗼𝘆 𝗘𝗴𝘂𝗶𝗿𝗼𝗻 | 𝗣𝗔𝗗𝗔𝗬𝗢𝗡, 𝗣𝘂𝗻𝗼𝗻𝗴 𝗣𝗮𝘁𝗻𝘂𝗴𝗼𝘁

𝗗𝗶𝗯𝘂𝗵𝗼 𝗻𝗶 𝗟𝗼𝘂𝗶𝘀𝘀𝗲 𝗔𝗹𝗹𝗶𝘀𝗼𝗻 𝗧𝗮𝗴𝘂𝗹𝗼 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗽𝗮𝗴-𝗔𝗻𝘆𝗼 𝗻𝗴 𝗣𝗮𝗵𝗶𝗻𝗮

24/02/2026

𝗣𝗔𝗗𝗔𝗬𝗢𝗡 - 𝗟𝗘𝗧𝗥𝗔-𝗜𝗧𝗢

Sa agos ng tubig na dumadaloy,
‎ang pag-iwan sa nakaraan ay patuloy.
‎Alaala at nararamdaman ay linilinis,
‎kapayapaan sa puso't isipan ang tanging nais.
‎
‎tulad ng batong tahimik at halaman sa gilid,
‎sa agos ng pagbabago ay unti-unting namamanhid.
‎tila ako'y nasanay na sa ganitong siklo ng buhay,
‎kung saan palaging may nagbabago at nagiging bagong gabay.
‎
‎Ang bawat patak ay nagdadala ng bagong sigla,
‎Kasabay ng hangin, damdamin ko’y unti-unting gumigising na.
‎tubig ko'y malumanay at malinaw na,
‎singtulad ng buhay kong makulay at patuloy na gumaganda.
‎
𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗕𝗲𝗻𝗲𝗱𝗶𝗰𝘁 𝗕𝗿𝗶𝗼𝗻𝗲𝘀 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

24/02/2026

𝗣𝗔𝗗𝗔𝗬𝗢𝗡 - 𝗟𝗘𝗧𝗥𝗔-𝗜𝗧𝗢

Sa bawat hakbang sa kalsada’t paaralan
May batas na tahimik na nagbabantay sa mamamayan
Upang ang respeto’y manatili sa bawat ugnayan.

Hindi biro ang salita kung ito’y nakasasakit
Hindi tama ang tingin o kilos na mapanakit
Sapagkat ang dangal ng tao’y hindi dapat malimit.

Sa mundo man ng internet o sa jeep na masikip
May hangganan ang biro at ang galaw na pilit
Ligtas na espasyo ang hangad—walang takot, walang sakit.

Ang batas ay paalala, hindi pananakot lamang
Kundi gabay sa pusong dapat maging mahinahon
At aral na ang paggalang ay tunay na kayamanan.

Sa Safe Spaces Act, may pangakong nakalaan
Na bawat isa’y may karapatang igalang.

Sa tahanan, sa lansangan, at sa MADILIM na daan.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗮𝘁 𝗟𝗶𝘁𝗿𝗮𝘁𝗼 𝗻𝗶 𝗔𝗻𝗴𝗲𝗹 𝗧𝘂𝘁𝗼𝗿 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗸𝘂𝗵𝗮 𝗻𝗴 𝗟𝗮𝗿𝗮𝘄𝗮𝗻𝗴 𝗣𝗮𝗺𝗽𝗮𝗵𝗮𝘆𝗮𝗴𝗮𝗻

23/02/2026

𝗣𝗔𝗗𝗔𝗬𝗢𝗡 - 𝗟𝗔𝗧𝗛𝗔𝗟𝗔𝗜𝗡 : Mga Alaala Mula sa Taong 2016

Sa panahon ngayon, kapag may sumikat sa social media, mabilis itong kumakalat—hindi lang sa buong Pilipinas kundi sa buong mundo. Kasabay ng pagsalubong natin sa 2026, muling binabalikan ng maraming netizen ang taong 2016—sampung taon na ang nakalipas. Hindi lang isang simpleng topic ang nagte-trending; isang buong dekada ng karanasan at pagbabago ang pinag-uusapan. Ano nga ba ang meron sa 2016 na ginagawa itong parang “golden year” o turning point para sa marami?

Kung ikukumpara sa unang bahagi ng ika-20 siglo, linear ang pag-unlad noon, paunti-unti ang mga imbensyon sa Industriyal na panahon. Ngayon, sa Information Age ng ika-21 siglo, exponential na ang bilis ng pagbabago dahil sa teknolohiya.

Kung dati mula pagsulat ng liham at Telegrapo, ito ay naging mabibigat na Teleponong Motorola, lumiit ito nang lumiit hanggang sa naging de-keypad na Nokia, at ngayon ang mga selpon ay panay mga Touch Screen na. Kung dati, nagre-renta pa tayo ng CDs sa Video Rentals, ngayon may Netflix na.

Ayon pa nga sa computer scientist na si Ray Kurzweil, ang rate ng pag-unlad ngayon ay katumbas ng libu-libong taon ng nakaraang siglo. Sa loob lang ng sampung taon mula 2016, kitang-kita ang mga pagbabago. Mula sa simpleng photo updates sa Facebook at fan posts sa Twitter (na puro K-pop noon), naging mas maingay, diverse, at interactive na ang social media ngayon.

Mula sa administrasyong Duterte hanggang sa kalagitnaan na ng administrasyong Marcos Jr.
Mula sa pre-pandemic na buhay hanggang sa lockdowns, Zoom classes, at virtual na pagkikita-kita. Mula sa pag-usbong ng mga love team pagkatapos ng AlDub hanggang sa mga bagong tambalan ngayon tulad nina Rabin Angeles at Angela Muji. Mula sa simpleng chatbots tulad ng Cleverbot hanggang sa ChatGPT na kasama na natin sa pag-aaral at trabaho.

Hindi sapat ang ilang talata para buod-in ang lahat ng nangyari sa sampung taon, pero malinaw ang punto. Tumatanda na tayo, at kasabay nito, lalong bumibilis ang pagbabago ng mundo—at ng buhay natin. Masarap balikan ang mga alaala ng kabataan noong 2016, pero narito pa rin tayo sa kasalukuyan, handang harapin ang hinaharap. Marami pa ang darating, at mahalagang salubungin natin ito nang may optimismo at bukas na pag-iisip.

Sa huli, ang 2016 ay hindi lang isang taon—ito ay simula ng mas mabilis na yugto ng ating kolektibong kwento. At tayo, kahit tumatanda, ay bahagi pa rin ng pagbabagong iyon.

𝘗𝘢𝘳𝘢 𝘴𝘢 𝘔𝘢𝘭𝘢𝘺𝘢𝘯𝘨 𝘗𝘢𝘮𝘢𝘮𝘢𝘩𝘢𝘺𝘢𝘨, 𝘔𝘢𝘣𝘶𝘩𝘢𝘺 𝘢𝘯𝘨 𝘗𝘢𝘥𝘢𝘺𝘰𝘯! 📰

𝘗𝘈𝘋𝘈𝘠𝘖𝘕 ✍🏻 - 𝘱𝘢𝘵𝘶𝘭𝘰𝘺 𝘴𝘢 𝘴𝘦𝘳𝘣𝘪𝘴𝘺𝘰, 𝘱𝘢𝘵𝘶𝘭𝘰𝘺 𝘴𝘢 𝘮𝘪𝘴𝘺𝘰𝘯!

𝗜𝘀𝗶𝗻𝘂𝗹𝗮𝘁 𝗻𝗶 𝗥𝘂𝘀𝘀𝗲𝗹 𝗠𝗮𝗿𝘁𝗶𝗻 | 𝗣𝗔𝗗𝗔𝗬𝗢𝗡, 𝗣𝗮𝘁𝗻𝘂𝗴𝗼𝘁 𝗻𝗴 𝗟𝗮𝘁𝗵𝗮𝗹𝗮𝗶𝗻

𝗗𝗶𝗯𝘂𝗵𝗼 𝗻𝗶 𝗝𝗲𝗿𝘂𝗲𝗹𝗮 𝗗𝗲 𝗟𝗲𝗼𝗻 | 𝗣𝗔𝗗𝗔𝗬𝗢𝗡, 𝗧𝗮𝗴𝗮𝗽𝗮𝗴-𝗔𝗻𝘆𝗼 𝗻𝗴 𝗣𝗮𝗵𝗶𝗻𝗮

Padayon URS - Montalban

29/03/2026

24/03/2026

18/03/2026

15/03/2026

12/03/2026

10/03/2026

03/03/2026

03/03/2026

25/02/2026

24/02/2026

24/02/2026

23/02/2026

Address

Telephone

Website

Alerts

Contact The Business

Shortcuts

Share

Category