07/08/2026
PRESS STATEMENT
PANIBAG-O NGA WARRANT.
PANIBAG-O NGA KASO.
LUNSAY TANAN PAGHARASS SA BASKOG RADYO.
ROXAS CITY, CAPIZ — August 7, 2026
Hugot nga ginakondenar sang Baskog Radyo ang wala untat nga mga legal complaints kag pressure batuk sa amon anchor.
Ang pinakaulihi nga kaso: warrant halin sa Muntinlupa RTC para sa ginaalegar nga paglapas sang tatlo ka counts sang unjust vexation angut sa Section 6 of R.A. 10175, nga gintalana sa tig ₱3,000 per count.
Wala nakabaton si Mamang India sang anuman nga complaint, notice, sulat, subpoena, ukon anuman nga komunikasyon angut sa pinakaulihi nga kaso antes nga na-isyu ang warrant.
Ini ang ginapangayuan namon sang paathag sa korte sa Muntinlupa nga ginhalinan sang warrant.
Wala makasabat ang anchor sa kaso bangud nga wala man ini nakahibalo ukon ginpahibalo.
Ang ining warrant indi sang conviction. Ginataha naton ang awtoridad sang korte kag ang presumption of innocence.
Apang ang akusado nga si Mamang India ang nagakaangay man nga matagaan sang due process.
Ang ining pinakaulihi nga development isa lamang sa madamo nga mga inagyan sang Baskog Radyo anchors humalin sa nagligad nga mga binulan.
Sang Hunyo 22, 2026, ang aton anchor nga si Jay Lavapiez nakaluwas sa ambush sa Roxas City, sang gintiro sang riding in tandem ang iya salakyan samtang ini ang nagabyahe.
Sang nagligad lang nga semana, isa pa gid ka cyberlibel complaint ang ginpasaka sa anchor sa RTC capiz. Magluwas sa nakapending nga kaso sang cyberlibel complaint sa Manila.
May yara man sang estafa case nga ginpasaka sa Parañaque. Padayon nga ginapanindugan sang Baskog Radyo nga ang ini nga kaso ang himo-himo lang, sanglit indi kilala sang mga anchors ang nagreklamo kag wala sang anuman nga nabaton nga kopya sang reklamo.
Sang damlag lang, nadismiss ang cyberlibel complaint nga ginfile sa Muntinlupa.
Subong naman, ang kaso nga unjust vexation halin sa Muntinlupa ang nagresulta sa warrant.
Ang isa ka insidente, isa ka kaso, mahimo nga natabuan lang. Apang kun madamo na nga insidente kag asud-asud nga kaso para sa amo man nga journalists, magapondo na kita kag magapaino-ino.
Wala kita sang may ginapasibangdan nga ginahungod ini tanan.
Apang indi man kita magpakuno kuno nga ang ining tanan nga mga nagakatabo wala naga-angut.
Indi man sang mas mataas sa layi ang sin-o man nga Journalists.
Apang indi man mahimo gamiton ang layi agudto tapakon ang sin-o man nga media worker.
Kun nakahimo sang krimen ang anchor, dapat ini usisaon kag pasabton.
Kun may sala nga pahayag ang anchor, sabton sang mga ebidensya.
Kun sayup ang report, dapat ini i-correct.
Apang kun ang legal nga proseso ang balik-balik nga ginagamit agudto magpamahog, kapuyon, pahadlukan ukon pahipuson ang mga journalists bangud may mga gamhanan nga tawo nga wala nanamian sang ginapamangkot sang journalists, indi na ini ordinaryo nga legal issue.
Ini ang isa na ka press freedom issue.
Ang aton Konstitusyon nagapangapin sa due process.
Ini ang aton proteksyon sa kahilwayan nga makapalayag kag kahilwayan nga makahambal.
Ang Ini nga proteksyon,indi isa ka pribiliheyo nga para lamang sa mga journalists.
Ini ang proteksyon para sa publiko.
Bangud kun ginapahipos ang isa ka journalist, indi lamang ang journalist ang nadulaan sang tingog.
Kundi ang publiko.
Pagaatubangon sang Baskog Radyo ang ining tanan nga mga kaso.
Pagadepensahan naton ang aton mga anchors sa korte.
Ginataha naton ang lehitimo nga legal nga proseso.
Apang padayun ang aton pagpamangkot.
Dapat bala nga ang mga pagpaathag sang mga government kag public officials ginasabat pinaagi sa kaso, warrants kag legal pressure imbes sang dokumento kag transparency?
We do not ask to be above the law.
We ask that the law not be weaponized against us.
Ang bala wala nakapahipos sa aton.
Ang pamahog wala nagpahipos sa aton.
Ang ining mga kaso indi makapahipos sa aton.
Sabton naton ang tanan nga alegasyon sa korte.
Ang tanan nga pag-atake sa aton kag ang tanan nga pagpamahog sa aton, sabton naton sang kamatuoran.
Atubangon naton ini samtang ginahawidan ang isa ka butang nga indi masungka sang isa ka hilway nga press: ang kaisog nga magpamangkot.
MAGAPADAYON ANG BASKOG RADYO SA PAGHAMBAL SANG KAMATUORAN.
BANGUD KINAMATARUNG SANG TAGSA KA CAPIZNON ANG MAHIBALUAN ANG KAMATUORAN.
