11/03/2026
Ang ulat na pinag-aaralan ng mga bansang kasapi ng G7 ang paglalabas ng hanggang 400 milyong bariles ng langis mula sa kanilang strategic reserves ay nagpapakita kung gaano kasensitibo ang pandaigdigang ekonomiya sa kaguluhan sa Gitnang Silangan, lalo na sa Strait of Hormuz kung saan dumaraan ang malaking bahagi ng suplay ng langis sa mundo.
Para sa Pilipinas na umaasa sa inaangkat na langis, ang bawat paggalaw ng presyo sa pandaigdigang merkado ay agad na nararamdaman sa ga*olina, diesel, pamasahe, at presyo ng pagkain. Bagamat maaaring pansamantalang magpababa ng presyo ang paglalabas ng oil reserves, malinaw na ang pabagu-bagong presyo ng enerhiya ay direktang nagpapabigat sa karaniwang mamamayan.
Sa huli, kapag tumataas ang presyo ng langis sa mundo, ang tunay na nagdurusa ay ang pamilyang Pilipino. Kaya dapat maging pangunahing tungkulin ng pamahalaan ang pagprotekta sa mamimili laban sa epekto ng krisis na hindi naman nila nilikha.
