08/09/2026
Lalaki nga Nangawat og Manok Panabong, Patay Human Gibunalan og Bato sa Tag-iya
Patay usa ka wala pa mailhing lalaki human kini giingong naabtan sa tag-iya nga nangawat sa iyang manok pangsabong ug gibunalan og dako nga bato sa nawong didto sa Villa Roca, Barangay Poblacion Occidental, Consolacion, Cebu.
Nahitabo ang krimen pasado alas-11:30 sa gabii niadtong Septyembre 6, 2026, ug daling nasikop sa kapolisan ang suspek pasado alas-12:45 sa kaadlawon sa pagkasunod adlaw, Septyembre 7, 2026.
Giila ang suspek nga si Moises Martonia Combis Jr., 52 anyos, minyo ug lumulupyo sa maong dapit. Samtang ang biktima nagpabiling wala pa mailhi nga:
Nagsul-ob og itom nga sleeveless shirt ug maong skirt
Adunay tattoo sa tuo nga paa
Asul ang kolor sa mga kuko
Adunay samad sa tiyan nga timaan nga naoperahan kini kaniadto.
Base sa imbestigasyon sa Consolacion Police Station, natulog na unta ang suspek sa iyang payag sa dihang nakamata kini tungod sa kasaba sa iyang mga manok pangsabong. Sa iyang pagsusi, iyang naabtan ang biktima nga nikuha na sa usa ka manok ug gisulod kini sa puting sako.
Gisuwayan pa sa pagpugong sa suspek ang biktima apan misantop kini sa init nga panagbangi hangtod nga nakakuha og dakong bato ang suspek ug gipuspos kini sa nawong sa biktima, hinungdan sa grabeng pagkaangol ug pagka-puno niini sa dugo.
Boluntaryong ni-surrender si Combis sa mga pulis nga niresponde human makadawat og tawag gikan sa usa ka concerned citizen. Gidala pa sa Eversley Child Sanitarium Hospital ang biktima apan nakabsan gayod kini sa kinabuhi ug anaa karon sa Maturan Funeral Homes sa Tayud, Consolacion.
Temporaryo karong gibalhog sa custodial facility sa Consolacion Police Station ang suspek samtang giandam ang tukmang kaso batok kaniya.
