Ang Madyaas

20/04/2026

Maligayang kaarawan, Gng. Coleen Vitudio! 🎉✨

Sa espesyal na araw na ito, nais naming ipaabot ang aming taos-pusong pagbati at pasasalamat sa iyo. Bilang katuwang na tagapayo ng Ang Madyaas, malaki ang iyong naitutulong sa aming samahan sa pamamagitan ng iyong oras, suporta, at paggabay. Ang iyong dedikasyon at malasakit ay nagbibigay sa amin ng inspirasyon upang mas pagbutihin pa ang aming kakayahan bilang mga kabataang mamamahayag.

Maraming salamat sa iyong kabutihan, pag-unawa, at pagiging maasikaso sa amin sa bawat pagkakataon. Nawa’y mapuno ng saya, pagmamahal, at maraming biyaya ang iyong kaarawan. Hiling namin ang iyong mabuting kalusugan at patuloy na tagumpay sa buhay.

Sa muli, Maligayang Kaarawan Ma’am Coleen! 🌟🫶

17/04/2026

𝗠𝗔𝗜𝗡𝗜𝗧-𝗜𝗡𝗜𝗧: Yver Joy M. Loquinario ng Ang Madyaas, nasungkit ang ika-5 puwesto sa Pagsulat ng Lathalain (Filipino) sa NSPC 2026!

Bitbit ang husay ng Antique National School, Division of Antique, at Region VI, matagumpay niyang iwinagayway ang bandila ng Kanlurang Bisayas sa tulong ni Coach Rhodbe P. Pandoy.

23/03/2026

Buong pusong nakikiramay ang ANS Community sa pagpanaw ni G. Klein Rafols. Bagaman siya ay sumakabilang buhay ngunit mananatili ang kaniyang mga nagawa, ang dedikasyon sa pagtuturo, at mga alaala sa ating mga puso. Ang aming panalangin ay nasa kaniyang pamilya at mga mahal sa buhay.

Rest in peace, Sir Klein.

18/03/2026

𝗣𝗔𝗚𝗚𝗨𝗡𝗜𝗧𝗔📕

~

𝗣𝗮𝗴𝗹𝗮𝘆𝗮 𝗼 𝗣𝗮𝗴𝗹𝗶𝗺𝗼𝘁?: 𝗣𝗮𝗴𝗱𝗶𝘄𝗮𝗻𝗴 𝗻𝗴 𝗟𝗶𝗯𝗲𝗿𝗮𝘁𝗶𝗼𝗻 𝗼𝗳 𝗣𝗮𝗻𝗮𝘆
ni Carl Sto. Tomas

Tuwing ika-18 ng Marso, ipinagdiriwang natin ang Paglaya ng Panay. Ngunit bilang mga Antiqueño, kilala ba natin ang sarili nating papel sa islang ito, o tila putol na ang ating ugnayan sa sarili nating kasaysayan?

Mula sa "hardin ng lagim" sa ating paaralan, hanggang sa mga madugong bakás sa San Jose, ang ating kalayaan ay hindi lamang isang bakasyon, kundi isang obligasyong alalahanin.

05/03/2026

𝗞𝗮𝗺𝘂𝘀𝘁𝗮𝗵𝗔𝗡𝗦! 👋

Muling naging sentro ng usapan ang sektor ng edukasyon matapos kumpirmahin ng Department of Education (DepEd) ang nakatakdang full implementation ng strengthened Senior High School (SHS) curriculum para sa School Year (SY) 2026–2027. Ang hakbang na ito ay itinuturing na isa sa pinakamalaking pagbabago sa sistema ng batayang edukasyon sa bansa upang masigurong ang mga kasanayan ng mga mag-aaral ay tumutugma sa pandaigdigang pamantayan.

Bilang isa sa mga kauna-unahang paaralan sa buong Pilipinas na napili para sa pilot testing, ang Antique National School (ANS) ay nagsisilbing pundasyon at gabay sa paghubog ng nasabing reporma. Ang karanasan ng mga HangkilANS sa ilalim ng bagong kurikulum na ito ay nagsisilbing mahalagang batayan sa pagtukoy ng pagiging epektibo at paghahanda ng bansa para sa malawakang pagpapatupad nito sa mga susunod na taon.

Sa post na ito, ating hihimayin ang mga perspektibo at direktang karanasan ng mga mag-aaral ng ANS. Ang kanilang boses ay hindi lamang repleksyon ng kanilang pag-aaral, kundi mahalagang kontribusyon sa pagbuo ng mas matatag na kinabukasan ng edukasyon sa Pilipinas.

02/03/2026

Isang magnitude 5.0 na lindol ang yumanig sa rehiyon kaninang 6:13 PM, Marso 2, 2026. Ang sentro ng lindol ay naitala sa timog-silangan ng Tigbauan, Iloilo, na may lalim na 10 kilometro.

Sa bayan ng San Jose de Buenavista, naramdaman ang Intensity II (bahagyang paggalaw). Ayon sa PHIVOLCS, dapat maging handa ang publiko sa mga posibleng aftershocks o sunod na pagyanig.

Pinapayuhan ang mga estudyante at mamamayan na manatiling kalmado at sundin ang mga safety protocols.

Earthquake Information No.1
Date and Time: 02 March 2026 - 06:13 PM
Magnitude = 5.0
Depth = 010 km
Location = 10.66°N, 122.39°E - 002 km S 43° E of Tigbauan (Iloilo)


Intensity II - San Jose de Buenavista, ANTIQUE

Instrumental Intensities:
IIntensity IV - Jordan, GUIMARAS; CITY OF ILOILO
Intensity III - Valderrama, and Culasi, ANTIQUE; Nueva Valencia, GUIMARAS; City of Passi, ILOILO
Intensity II - Malinao, AKLAN; Tapaz, CAPIZ; San Lorenzo, GUIMARAS; City of La Carlota, City of Sipalay, City of Bacolod, NEGROS OCCIDENTAL; San Jose de Buenavista, ANTIQUE
Intensity I - Ibajay, and Malay, AKLAN; Anini'y, ANTIQUE; Jamindan, CAPIZ

https://earthquake.phivolcs.dost.gov.ph/2026_Earthquake_Information/March/2026_0302_101327_B1.html

28/02/2026

𝗔𝗡𝗦𝗻𝘂𝗻𝘀𝗶𝘆𝗼: Iskedyul ng Klase para sa Marso 2–13 ‼️

Inilabas na ang memorandum ng paaralan kung saan nakatala ang opisyal na iskedyul para sa face-to-face classes at final examinations para sa darating na linggo. Pinapayuhan ang lahat ng mag-aaral na suriing mabuti ang nakatalagang petsa para sa inyong baitang at kurikulum.

Ang mga pagbabagong ito ay bilang paghahanda sa gaganaping 2026 WVRAA Meet, kung saan ang ating paaralan ay magsisilbing training at billeting center para sa mga atleta.

27/02/2026

𝗦𝗔 𝗠𝗚𝗔 𝗟𝗔𝗥𝗔𝗪𝗔𝗡: Ipinamamalas ng mga officers ng Citizenship Training Program (CTP) mula sa Class Kasanaw (T.P. 2024–2025) at Class Saliglahi (T.P. 2025–2026) ang kanilang disiplina sa isang silent drill exhibition sa harap ng Win Gym ngayong araw, Pebrero 27.

📸: Sto. Tomas, Carl

27/02/2026

𝗠𝘂𝗹𝗮 𝘀𝗮 𝗖𝗮𝘁𝗵𝗲𝗱𝗿𝗮𝗹 𝗛𝗮𝗻𝗴𝗴𝗮𝗻𝗴 𝗟𝗮𝗻𝘀𝗮𝗻𝗴𝗮𝗻: 𝗣𝗮𝗻𝗮𝗹𝗮𝗻𝗴𝗶𝗻 𝗮𝘁 𝗣𝗿𝗼𝘁𝗲𝘀𝘁𝗮, 𝗣𝗶𝗻𝗮𝗴𝘀𝗮𝗺𝗮 𝘀𝗮 𝗣𝗮𝗴-𝗮𝗹𝗮𝗹𝗮 𝘀𝗮 𝗘𝗗𝗦𝗔 40

Hindi lamang pag-alala kundi isang matapang na panawagan para sa dangal at katarungan ang umalingawngaw sa San Jose noong Pebrero 25, 2026. Sa pagdiriwang ng ika-40 anibersaryo ng EDSA People Power Revolution, naging sentro ng usapin ang tila "nasayang na pagkakataon" ng bansa para sa tunay na pagbabago.

Nagsimula ang gawain sa Cathedral ng San Jose bandang alas-5:00 ng hapon sa pamamagitan ng nakagawiang Novena Mass para sa Mahal na Ina ng Laging Saklolo. Ngunit sa pagkakataong ito, ang misa ay may mas malalim na koneksyon sa diwa ng EDSA, sa pangunguna ni Bishop Marvyn Maceda, kasama si Fr. Edione Febrero at iba pang kaparian. Dinaluhan ito ng maraming deboto, kabilang ang mga seminarista mula sa Seminary of St. Peter.

Sa kaniyang homilya, hindi naitago ang masidhing emosyon ni Bishop Maceda. Bagama't hindi agresibo ang kaniyang tono, ramdam ang bagsik at pagnanasa sa boses na umabot sa pagsigaw ng: "Hindi tayo pulubi! Ang pera natin ay dapat ibalik sa atin!"

"Pinalaya tayo ng Diyos mula sa espiritu ng tiranya at diktatorya, ngunit nabigo tayong bumalik nang lubos sa Kaniya. Bilang isang bansang biniyayaan ng pananampalataya, sinayang natin ang pagkakataon para sa mas malalim na moral na paghilom. Ang ginawa ng Diyos sa EDSA 40 taon na ang nakararaan ay simula lamang ng isang paglalakbay. Binuksan Niya ang isang bagong landas para sa atin—ngunit hindi natin ito ganap na nilakaran. Sa halip, pinili natin ang pagiging kampante at kawalang-bahala," pahayag ni Bishop Maceda.

Matapos ang misa, isang mataimtim at tahimik na penitential procession ang isinagawa. Sa ilalim ng nagdidilim na langit, naglakad ang mga mamamayan bitbit ang kanilang mga kandila paikot sa San Jose. Ang prosisyon ay nagtapos sa pag-awit ng "Salve Regina" at isang huling pagbabasbas sa wikang Latin.

Ang gabi ay sinundan ng isang mini-concert na inorganisa ng Amlig Antique. Tampok dito ang mang-aawit na si Bryle Rubido na nagbigay-buhay sa kantang "Bayan Ko," kasama ang iba pang mga lokal na OPM artists.

Naging emosyonal din ang programa dahil sa pagdalo ni Bernie Salcedo, isa sa mga saksi sa pamamaril kay Evelio B. Javier (EBJ). Si Salcedo ay isa rin sa mga aksidenteng nabaril habang pinoprotektahan si EBJ noon, kaya't ang kaniyang presensiya ay nagsilbing buhay na paalala sa sakripisyong pinagdaanan ng mga Antiqueño para sa demokrasya.

Sa pagtatapos ng pagtitipon ngayong gabi, ang mensahe ng EDSA 40 sa Antique ay malinaw: ang kalayaan ay hindi lamang isang alaala, kundi isang tungkulin na dapat panindigan araw-araw.

📸: Sto. Tomas, Carl

25/02/2026

𝗘𝗗𝗦𝗔 @ 40: 𝗛𝗜𝗡𝗗𝗜 𝗠𝗔𝗟𝗜𝗟𝗜𝗠𝗨𝗧𝗔𝗡

Ngayong ika-25 ng Pebrero, ginugunita natin ang ika-40 anibersaryo ng EDSA People Power Revolution. Ito ang mapayapang pag-aaklas na nagpatalsik sa diktadurya at nagpanumbalik ng demokrasya sa ating bansa. Apat na dekada man ang lumipas, nananatili tayong matatag sa pagtatanggol sa kalayaan, katarungan, at kapangyarihan ng mamamayan na ipinaglaban sa EDSA.

Nais din naming ipabatid sa lahat na tuloy pa rin ang mga klase ngayong araw. Inaasahan ang pagpasok ng lahat ng mag-aaral habang ating ginugunita ang mahalagang bahagi na ito ng ating kasaysayan.

24/02/2026

𝗣𝗔𝗔𝗟𝗔𝗟𝗔 ‼️

Ipinababatid sa lahat na alinsunod sa Proclamation Blg. 1006 na nilagdaan ni Executive Secretary Lucas Bersamin noong Setyembre 3, 2025, ang Pebrero 25, 2026 ay idineklarang Special Working Holiday.

Kaugnay nito, 𝗺𝗮𝗴𝗸𝗮𝗸𝗮𝗿𝗼𝗼𝗻 𝗻𝗴 𝗿𝗲𝗴𝘂𝗹𝗮𝗿 𝗻𝗮 𝗽𝗮𝘀𝗼𝗸 𝗮𝘁 𝗼𝗽𝗲𝗿𝗮𝘀𝘆𝗼𝗻 𝗻𝗴 𝗼𝗽𝗶𝘀𝗶𝗻𝗮 𝘀𝗮 𝗻𝗮𝘀𝗮𝗯𝗶𝗻𝗴 𝗽𝗲𝘁𝘀𝗮.