Go Marinduque, Barangay Banahaw, Santa Cruz (2025)

29/09/2025

KONSEHAL MACOY JINANG, NANALO BILANG PCL FEDERATION PRESIDENT - MARINDUQUE CHAPTER

Itinanghal na bagong Presidente ng Philippine Councilors League (PCL) – Marinduque Chapter si Konsehal Mark Angelo “Macoy” Loto Jinang ng Boac sa katatapos na PCL Election 2025.

Nakipagsabayan sa kanya ang katunggali na si Konsehal Buchi Rivamonte Rosales mula Sta. Cruz. Sa bilangan ng boto, nakakuha si Rosales ng 22, samantalang nakapagtala si Jinang ng 31 boto, dahilan upang siya’y opisyal na ideklarang panalo.

Bilang bagong halal na PCL President, si Jinang ay uupo bilang ex-officio Board Member sa Sangguniang Panlalawigan ng Marinduque, kung saan inaasahan siyang magiging kinatawan at boses ng lahat ng konsehal sa buong lalawigan.

Itinuturing na makasaysayang tagumpay ang pagkapanalo ni Jinang, na pamangkin ni kasalukuyang Gobernador Melencio “Mel” Go, dahil ito’y hindi lamang personal na karangalan kundi patunay din ng kanyang malasakit at dedikasyon bilang lingkod-bayan.

Nagpaabot ng pagbati ang kanyang mga kasamahan mula sa Ika-12 Sangguniang Bayan at ilang lokal na opisyal, na umaasang mas lalo pang mapapalakas ang ugnayan ng mga konsehal at lalawigan sa kanyang pamumuno.

“Ang panalong ito ay hindi lamang para sa akin, kundi para sa lahat ng konsehal ng Marinduque. Asahan ninyo na mas masigasig nating itutulak ang mga programa para sa kapakanan ng ating mga kababayan,” pahayag ni Jinang matapos ang kanyang pagkapanalo.

27/09/2025

600M BUDGET INSERTION NI SEN. FRANCIS ESCUDERO, NILINAW NG DPWH – HINDI ITO GHOST PROJECT

Kumalat ang balita sa buong Marinduque matapos isiwalat ni dating DPWH Undersecretary Roberto Bernardo na may inilaan umanong ₱600 milyon si Senator Francis “Chiz” Escudero para sa isang proyekto sa Boac na agad umani ng samu’t saring reaksyon mula sa mga Netizens.

Pero paglilinaw ni OIC Regional Director Editha Babaran, mali ang akala ng marami—hindi flood control ang proyekto kundi rockfall netting sa Bantay/Hinapulan area para protektahan ang mga residente at motorista mula sa posibleng landslide.

Dagdag pa niya, bagama’t nabid na noong Pebrero 2025, wala pang inilalabas na pondo. Kaya raw hindi dapat tawaging ghost project. “Nagiging ghost project lang ang isang proyekto kapag nailabas na ang budget pero walang nangyaring konstruksyon. Eh dito, wala pa ngang pondo!” diin ni Babaran.

Kinuwestyon din ng ilan kung bakit hindi ito dumaan kina Mayor, Congressman, Governor, o kahit sa DPWH District Engineer. Sagot ng opisyal: direkta itong proyekto ni Sen. Escudero sa ilalim ng DPWH Regional Office bilang implementing agency.

Sa ngayon, nananawagan ang DPWH sa publiko: kalma lang muna, hintayin ang opisyal na pondo bago magbitaw ng akusasyon.

Hinikayat din ni RD Babaran ang Mariduqueño na bukas ang opisina ng DPWH sa kanilang mga katanungan tungkol sa proyektong ito.

24/09/2025

BOKAL GILBERT DAQUIOAG, PINATIGIL ANG PULONG SA GOVERNOR’S HALL DAHIL SA ISYU NG IMBITASYON

Nagulantang ang mga dumalo sa isinagawang pagpupulong kamakailan sa Governor’s Hall matapos biglaang patigilin ito ni 1st District Board Member Gilbert Daquioag. Ayon sa mga nakasaksi, nagtaas ng boses si Daquioag at pinuna ang naturang pagpupulong dahil umano sa hindi siya naimbitahan.

Ikinagulat ng mga department heads, kawani ng barangay at ilang stakeholders ang naging kilos ng bokal na nagdulot ng pagkakaantala sa nasabing pulong. Gayunpaman, ayon sa impormasyong nakalap mula sa tanggapan ni Vice Governor Romulo Bacorro na siyang tumatayong OIC Governor, nakapagpadala sila ng imbitasyon sa opisina ni Daquioag ngunit maaaring hindi lamang ito napansin o nabigyang pansin ng bokal.

Sa kabila ng insidente, ipinagpatuloy pa rin ang talakayan upang hindi maantala ang mga isyung mahalaga para sa lalawigan.

22/09/2025

DR. ROMULO BACORRO, UUPO BILANG ACTING GOVERNOR HABANG NAKA-LEAVE SI GOV. MEL GO

Tatlong linggong uupo bilang Acting Governor si Vice Governor Dr. Romulo “Jun” Bacorro matapos mag-file ng leave of absence si Governor Mel Go upang bumiyahe sa ibang bansa kasama ang kanyang pamilya.

Ayon kay Bacorro, nararapat lamang umano na bigyan ng panahon si Governor Go para makapagpahinga matapos ang ilang buwan ng masusing trabaho at mabigat na responsibilidad bilang gobernador ng lalawigan. “Deserve naman po ni Gov. Mel ang pagkakataong ito para mag-relax at makasama ang kanyang pamilya. Hindi madali at nakaka-stress din ang pagiging gobernador,” pahayag ni Bacorro.

Samantala, ayon sa tala ng Civil Service Commission (CSC), ito na ang ikatlong pagkakataon na nag-file ng leave si Governor Go mula nang siya ay maupo bilang gobernador ng Marinduque.

Sa panahong ito, tiniyak naman ni Bacorro na ipagpapatuloy ng pamahalaang panlalawigan ang mga programa at serbisyo para sa mamamayan ng Marinduque habang pansamantalang wala si Gov. Go.

22/09/2025

STA. CRUZ, LGU, IIMBESTIGAHAN ANG ILLEGAL NA PAGGAMIT NG LOGO SA RALLY SA LUNETA

Nakatakdang magsagawa ng imbestigasyon ang Pamahalaang Bayan ng Sta. Cruz kaugnay ng paggamit ng kanilang opisyal na logo sa isang rally na ginanap sa Luneta kamakailan.

Ikinagulat ng ilang konsehal nang kumalat sa social media ang larawan ni Christopher R. De Los Santos na may hawak na rally poster laban sa ilang nakaraang administrasyon sa Marinduque, kung saan malinaw na nakalagay ang logo ng bayan ng Sta. Cruz.

Ayon sa mga opisyal, walang anumang pahintulot si Delos Santos na gamitin ang logo ng munisipyo o ng bayan para sa personal o pampulitikang adbokasiya. Mas lalong ikinagalit ng mga konsehal ang pagdawit umano ni Delos Santos sa ilang kasalukuyang public servant ng Sta. Cruz sa kanyang mga paninira at vlog.

Dahil dito, iniimbestigahan na ang insidente at nakatakdang ipatawag si Delos Santos upang magpaliwanag. Bukod pa rito, pinag-aaralan din ng Sangguniang Bayan ang posibilidad na ideklarang Persona Non Grata si Delos Santos.

Ayon sa ilang konsehal, tila wala na sa matinong pag-iisip si Delos Santos at puro ingay lamang umano ang ginagawa nito. “Matagal na siyang hindi umuuwi sa Marinduque, wala siyang alam sa tunay na kalagayan ng lalawigan. Halata tuloy na ginagamit at binabayaran siya ng mga nasa Kapitolyo ngayon,” dagdag pa nila.

21/09/2025

100 ARAW NI CONGRESSMAN REYNALDO SALVACION, BINATIKOS DAHIL SA KAWALAN NG KONKRETONG NAGAWA PARA SA MARINDUQUE

Umabot na sa mahigit 100 araw mula nang maupo si Congressman Reynaldo Salvacion bilang kinatawan ng Marinduque, ngunit kabi-kabilang batikos ang kanyang kinakaharap dahil sa umano’y kawalan ng malinaw at kongkretong programa para sa pag-angat ng kabuhayan ng mga Marinduqueño.

Sa datos mula sa kanyang opisina, dalawa pa lamang ang naihain niyang panukalang batas, at kapansin-pansin na wala sa mga ito ang tuwirang nakatuon sa pagpapabuti ng antas ng pamumuhay at ekonomiya ng lalawigan na kanyang kinakatawan.

Ito ay taliwas sa kanyang matunog na pangako noong kampanya na “alam ko ang tunay na pangangailangan ng aking mga kababayan dahil ako’y isang tunay na Marinduqueño”. Marami ang nadismaya dahil sa kabila ng kanyang pagiging “native son” ng Marinduque, wala pa rin umanong nakikitang pagbabago o inisyatibong makakatulong sa mahahalagang sektor gaya ng agrikultura, pangisdaan, at turismo.

Ilan sa mga residente ang nagpahayag ng pagkadismaya at galit:

“Pinangakuan kami ni Salvacion na i-aangat niya ang buhay namin. Pero hanggang ngayon, puro salita lang. Wala pa kaming nakikitang proyekto para sa mga magsasaka o mangingisda,” ayon kay Mang Roberto, isang magsasaka mula Gasan.

Ayon naman kay Aling Teresa, isang market vendor mula Boac:

“Tatlong buwan na mahigit, pero parang wala tayong kongresista. Ni hindi natin ramdam ang kanyang presensya sa mga isyu dito sa probinsya.”

Sa kabila ng limitadong panahon, umaasa pa rin ang ilang sektor na magigising si Cong. Salvacion at gagamitin ang kanyang mandato upang maglatag ng mga makabuluhang hakbang para sa kaunlaran ng probinsya. Subalit sa ngayon, lumalakas ang panawagang panagutin siya sa kanyang mga ipinangako ngunit hindi natutupad.

Marami ang nagsasabing kung magpapatuloy ang ganitong kalakaran, baka hindi magtagal ay tuluyan nang mawala ang tiwala ng mga Marinduqueño kay Congressman Salvacion.

21/09/2025

TINGNAN: Umagaw ng atensyon si Christopher R. De Los Santos, kilalang vlogger ng Marinduque News Online, matapos makitang bitbit ang isang tarpaulin na may nakasaad na: “Velasco Political Dynasty, Huwag Ibalik sa Marinduque!” sa isinagawang rally sa Luneta nitong nakaraang linggo.

Gayunpaman, ayon sa ilang netizens, sandali lamang umano itong umakyat para magpakuha ng litrato at agad ding bumaba matapos makunan ng larawan. Dahil dito, marami ang nagduda sa tunay na layunin ng kanyang presensya sa nasabing kilos-protesta.

Bukod pa rito, kumakalat ang espekulasyon na si De Los Santos ay bayarang vlogger umano ni Vice Governor Romulo Bacorro, na matagal nang nakikita bilang matinding kritiko ng mag-amang Velasco sa pulitika ng Marinduque. Giit ng mga kritiko, malinaw umanong ginagamit si De Los Santos bilang instrumento upang atakehin ang pamilya Velasco.

Samantala, wala pang opisyal na pahayag si De Los Santos hinggil sa mga akusasyong siya ay pinopondohan para sa kanyang mga kilos laban sa mga Velasco. Subalit, marami na sa ating mga kababayan ang hindi na natutuwa sa kanyang mga ginagawa dahil wala naman talaga siyang alam sa nangyayari sa Marinduque.

21/09/2025

MALAKIHANG PROTESTA KONTRA KORAPSYON, UNANG MALAKING HAMON KAY PNP CHIEF NARTATEZ

Habang inaasahan ang libu-libong lalahok sa mga kilos-protesta kontra korapsyon ngayong Setyembre 21, 2025 sa iba’t ibang pangunahing lungsod sa bansa, nakatuon ang lahat ng mata kay Police Lieutenant General Jose Melencio “Tateng” Nartatez Jr., bagong hepe ng Philippine National Police (PNP).

Para sa marami, ito ang magiging sukatan kung paano niya haharapin ang kanyang unang malaking hamon bilang pinuno ng higit 200,000 pulis sa bansa—isang pagkakataon na maaaring magpatibay sa kanyang liderato o magsilbing mabigat na pagsubok sa simula ng kanyang panunungkulan.

Naging maugong ang pangalan ni Nartatez matapos ang biglaang pagbibitiw ni dating PNP Chief General Nicolas Torre III noong Agosto 2025. Mula noon, nasalang siya sa masusing pagsusuri ng publiko.

Isang produkto ng Philippine Military Academy (PMA) Tanglaw-Diwa Class of 1992, si Nartatez ay tahimik na umangat sa serbisyo sa loob ng mahigit tatlong dekada. Bago pa man italaga bilang hepe ng PNP, siya ay nagsilbing direktor ng National Capital Region Police Office (NCRPO), Directorate for Intelligence, at kamakailan ay Deputy Chief for Administration.

Kilala siya ng mga kasamahan bilang isang matatag at hindi maingay na opisyal na inuuna ang resulta at kalidad ng operasyon kaysa sa palabas. Isa sa mga ipinagpapatuloy niyang programa ay ang five-minute response policy na naglalayong tiyakin ang mabilis na pagresponde ng kapulisan, isang hakbang na mahalaga para sa mas epektibong presensya ng pulisya sa mga komunidad.

Gayunpaman, malaki ang inaasahan ng publiko. Sa harap ng mga protesta, kailangang ipakita ni Nartatez ang kakayahang balansehin ang pagpapanatili ng kaayusan at ang pagrespeto sa karapatan ng mamamayan na magpahayag ng saloobin.

Mariin din niyang tinutulan ang kontrobersyal na “quota arrests,” na aniya’y labag sa prinsipyo ng hustisya. Sa halip, iginiit niyang mas bibigyang-diin ang intelligence-driven at quality-focused operations na nakatuon sa integridad at tamang proseso, hindi sa bilang ng mga inaresto.

Para kay Nartatez, ang mga protesta ay hindi lamang hamon kundi pagkakataon upang ipakita na ang PNP ay maaaring maging haligi ng demokrasya at tiwala ng mamamayan. Sa panahong patuloy na sinusubok ang imahe ng pulisya dahil sa mga isyu ng korapsyon at pang-aabuso, ang kanyang pamumuno ay maaaring magsilbing daan tungo sa pagbabalik ng respeto at kumpiyansa ng publiko.

10/05/2025

NIA, NANAWAGAN KAY DOC BACORRO: "WAG GAMITIN ANG AMING PROYEKTO SA FAKENEWS AT PAMUMULITIKA"

Nanawagan ang National Irrigation Administration (NIA) Regional Office kay Doc Romulo Bacorro na huwag isali ang kanilang proyekto sa pagpapakalat ng maling impormasyon matapos mag-post si Bacorro tungkol sa Bagtingon Small Reservoir Irrigation Project (SRIP).

Ayon kay Bacorro, ang proyekto umano ay sumisira sa likas na yaman ng lalawigan, bagay na mariing itinanggi ng NIA. Nilinaw ng ahensya na ang Bagtingon SRIP ay isang lehitimong proyekto na may layuning magbigay ng patubig sa 226 ektaryang agricultural land na makikinabang ang mga magsasaka ng Buenavista.

“Layunin ng proyekto na mapataas ang productivity at mapabuti ang kabuhayan ng ating mga magsasaka,” pahayag ng NIA. Dagdag pa nila, ang Bagtingon Dam ay magbibigay ng malaking supply ng tubig na magiging susi sa mabilis at malakas na progreso ng Buenavista, na posibleng umangat mula 4th class municipality patungong 2nd class town sa tulong ng proyektong ito.

Nilinaw rin ng NIA na hindi na kailangan pang manawagan ni Bacorro sa DENR o MACEC dahil dumaan sa tamang proseso ang proyekto, kabilang na ang public consultation sa mga mamamayan ng Buenavista.

Pinatunayan din ng NIA na may sapat na permits at masusing pag-aaral ang isinagawa bago simulan ang proyekto. “Hindi ito mining na katulad ng pinapakalat niyo. Magsadya lang po siya sa NIA at nandun ang lahat ng dokumento,” giit ng NIA.

Nanawagan ang ahensya na huwag gamitin ang kanilang proyekto para sa pamumulitika at ipinaalala sa publiko na mag-ingat sa pagkalat ng maling impormasyon.

09/05/2025

𝗖𝗛𝗥𝗜𝗦𝗧𝗢𝗣𝗛𝗘𝗥 𝗥. 𝗗𝗘 𝗟𝗢𝗦 𝗦𝗔𝗡𝗧𝗢𝗦, 𝗕𝗔𝗬𝗔𝗥𝗜𝗡 𝗡𝗔 𝗣𝗥 𝗖𝗢𝗡𝗦𝗨𝗟𝗧𝗔𝗡𝗧

Sa pagsisiyasat, lumalabas na si Christopher R. De Los Santos ay binayaran ng mga taong may malisya at gustong lang manira. Nagtatago sa alias na “Christopher De Los Santos”, ang totoong pangalan niya ay Mapalad Ricafrente De Los Santos na walang permanenteng address.

Siya ay nag papakilala na Freelance Virtual Assistant o Journalist pero siya ay isang bayarin ng mga tao na gustong manira sa kapwa. Ayon sa imbestigasyon, si Mapalad ay tumitira sa apartment ng dating Vice Governor Bacorro sa Quezon Avenue at Arellano Street, Sitio Maligaya, Sta. Cruz sa harap ng Cardbank. Sa employment history ni Mapalad siya ay walang permanenteng hanap buhay. Ang mga dating employers ni Mapalad ay Cana Group, Exsight 36 Media, J & B Consumers Goods Trading, Fabricolti Mobili Trading, Unit Medical Electronic, Neuricode Software, Dream Design Builders, JC Premiere, Calle Messenger Courier, Fever & Cenoviates, MCYSIX Enterprises at Efastbreak Philippines. Dahil hindi siguro kumita ay napilitan gumawa ng Marinduque Online TV dahil binabayaran siya para manira sa Velasco dahil sa 2025 halalan. Bago pa man lumabas ang mga posts ni Mapalad ay nagyayabang na ang mga kandidato sa provincial positions na may pasabog na gagawin. Malamang na nagbayad kay Mapalad ang mga naninira. Ani ng iba, si Mapalad ay naging kasama sa negosyo ni dating Bokal John C. Pelaez. Ang JC Premiere ay pag aari ni John Pelaez.

Mula sa opisina ni Mayor Lorna Velasco, pinabulaanan nito ang sinasabing sumbong sa kanya dahil wala namang transaksiyon sa Municipal Government of Torrijos ang Sto. Cristo Construction and Trading, Inc. patungkol sa sinsabing public market project base sa certification ng Municipal Engineer ng Torrijos. Pati ang sinasabi na residence ni De Los Santos sa San Isidro ay kasinungalingan dahil base sa certification ng Barangay Capt. ng San Isidro si De Los Santos ay hindi naging residente ng San Isidro.

Nag-complain na si Mayor Lorna Q. Velasco sa NBI sa mga krimen ni De Los Santos at kanyang mga conspirators. Naka amba na ang demanda na Libel and Damages laban kay De Los Santos at kanyang mga kakuntsaba.

06/05/2025

MODERN DAY VOTE BUYING: QR CODE MODUS, UMIIKOT SA TORRIJOS AT GASAN

Kumakalat ngayon ang umano’y makabagong uri ng vote buying sa pamamagitan ng QR code na ipinamamahagi umano nina Joey Peñaflor at James Marty Lim, kapwa tumatakbong alkalde sa kani-kanilang bayan ngayong nalalapit na halalan.

Ayon sa ulat mula sa mga residente at sa source na malapit sa Commission on Elections, Marami ang humihiling ng investigation kaugnay ng pagpapamudmod ng QR code, na sinasabing may kaugnayan sa sistematikong pamimili ng boto sa mga bayan ng Torrijos at Gasan. Hinihiling ang agarang imbestigasyon Kay PES Angela Royandoyan ng COMELEC upang busisiin ang umano’y lantaran at makabagong pamamaraan ng vote buying na magiging bahid sa malinis na election.

Bawal sa ilalim ng Omnibus Election Code ang pagbili at pag tanggap sa GCash para ibenta ang boto. Sa panahon ngayon, hindi na umano limitado sa direktang pagbibigay ng pera ang vote buying — kaya’t mahigpit nilang binabantayan ang mga digital na paraan, kabilang ang paggamit ng money transfer apps tulad ng GCash, Maya, at iba pa.

Ang PNP under Kay PCol. Arthur Salida, Director ng Marinduque Provincial Police Office, ay naka-high alert sa lalawigan upang agapan at hulihin ang sinumang mahuhuling sangkot sa pamimili ng boto, kabilang ang may hawak ng mga kahina-hinalang QR code Lalo na ang tumatanggap ng pera mula sa GCash.

Nagbabala rin ang COMELEC na ang pagmamay-ari o pagtanggap ng QR code na bahagi ng modus na ito ay maaaring ituring na ebidensiya ng pakikilahok sa iligal na gawain, kaya’t hinikayat nila ang publiko na i-report agad sa kinauukulan ang anumang insidente o indibidwal na sangkot.

06/05/2025

TOTOONG HANGARIN NI MEL GO SA PAGTAKBO BILANG GOBERNADOR, ISINIWALAT NG MGA KONTRATISTA

Bagama’t palagiang binibigkas ni Mel Go sa kanyang mga talumpati na kaya siya muling bumalik sa lalawigan ay upang “tumulong sa kapwa Marinduqueño” matapos ang umano'y 8 taon ng pamamahinga, lumalabas ngayon ang tunay na motibo umano ng kanyang pagbabalik — ang muling paghawak sa malalaking proyekto ng Pamahalaang Panlalawigan ng Marinduque.

Ayon sa mga impormasyong lumalabas, pangunahing layunin umano ni Mel Go na dumaan sa kanyang kumpanya, ang SARGASSO Construction and Development Corporation, ang lahat ng mga proyektong pang-imprastraktura ng lalawigan, kabilang na rin ang ilang proyekto ng mga bayan.

Hindi ito nalalayo sa kanyang naging reputasyon noon. Matatandaang sa panahon ng panunungkulan ni dating Gobernadora Carmencita Reyes, tinanggal ang kompanya ni Mel Go bilang isa sa mga accredited contractor ng lalawigan dahil sa umano’y mga substandard na proyekto at labis na pagkaantala sa mga ito.

sa sa pinakatanyag na halimbawa ay ang airstrip ng Gasan Airport, na inabot ng halos isang dekada bago tuluyang matapos—isang proyekto na noo’y ipinagkatiwala sa kumpanya ni Go. Ito ang pinakamaliwanag na pangyayari na di Mapag mahal sa Marinduque si Go. Maigsi lang ang haba ng runway na gagawin ni Go sa runway pero di niya ginawa dahil gusto niya na Mapahiya si Nanay Carmencita sa politika at sa Marinduque na ayaw daw siyang bigyan ng Buhangin at graba. May masamang pag isip ang ganyang tao at ang laki ng damages na naging resulta sa mga negosyante at mga kababayan. Hindi na Naka landing ang eroplano at ilang companya ang nagsara katulad ng Bella roca. Nahirapan ang mga kababayan dahil nag roro sila. Milyon milyon pesos ang damage sa mga businessmen ng Marinduque. Puede bang maging lingkod bayan ang walang pagmamahal sa bayan.

Dagdag pa ng ilang lokal na kontratista, iniipit umano ni Go ang mga maliliit na kontratista sa lalawigan upang sa kanya lamang mapasakamay ang lahat ng proyektong pinopondohan ng gobyerno. “Kapag siya ang nanalo, baka bumalik ang panahong isang kumpanya lang ang nagko-kontrol sa lahat,” ani ng isang negosyanteng.

Kaya’t sa kabila ng kanyang madalas na pagsasabi na “maayos na ang kanyang buhay” at nais lang tumulong, marami ngayon ang nagtatanong: Totoo bang serbisyo publiko ang hangad ni Mel Go, o negosyo at interes lamang para sa kanyang kompanya?

Go Marinduque

29/09/2025

27/09/2025

24/09/2025

22/09/2025

22/09/2025

21/09/2025

21/09/2025

21/09/2025

10/05/2025

09/05/2025

06/05/2025

06/05/2025

Address

Website

Alerts

Contact The Business

Shortcuts

Share

Category