14/07/2026
12 Arestado sa Umano'y Marahas na Pag-okupa sa Pribadong Ari-arian sa Lumban; Barangay Kapitan at mga Kasamahan, Haharap sa mga Kaso
LUMBAN, Laguna β Nakatakdang sampahan ng magkakapatong na kasong kriminal si Barangay Captain Silvino Dublan Jr. ng Barangay Caliraya, Lumban, Laguna, kasama ang ilan sa kanyang mga kasamahan, kaugnay ng umano'y iligal at marahas na pag-okupa sa isang pribadong ari-arian na pag-aari ng SM Fernando Realty and Developer Corporation.
Ayon sa ulat, naganap ang insidente noong Sabado, nang pangunahan umano ng kapitan ang mahigit 100 katao sa sapilitang pagpasok sa nasabing property. Iniulat na winasak ang mga bakod at security guard post, dahilan upang mabigla ang 15 security guard na nakatalaga sa lugar.
Sa insidente, tatlong security guard ang nasugatan. Inireklamo rin na pansamantalang dinala o pinigil ang dalawang security guard at nakuha ang kanilang service fi****ms, na umano'y itinago sa opisina ng barangay kapitan sa barangay hall.
Agad na nagsumbong sa Lumban Municipal Police Station ang hepe ng security team. Kinabukasan, bandang alas-6 ng gabi, nagsagawa ng operasyon ang mga pulis ng Lumban, kasama ang SWAT, na nagresulta sa muling pagkontrol sa nasabing property.
Sa operasyon, 12 katao ang naaresto, kabilang ang siyam na kalalakihan at tatlong kababaihan. Isa sa mga ito ang nagpakilalang team leader na si "Alyas Wahib," na nagsabing pinangakuan umano sila ng barangay kapitan ng bahagi ng lupa sa nasabing property. Aniya, naniwala silang legal ang pagmamay-ari ng lupa at hindi sana sila sasama kung nalaman nilang may isyu ito.
Natuklasan din umano ng mga awtoridad at security personnel na nawawala ang ilang mahahalagang gamit sa loob ng property, kabilang ang mga two-way radio, construction tools, at humigit-kumulang β±83,000 na nakalaan sana bilang suweldo ng mga security guard.
Ayon kay Camilo Rosqueta, hepe ng security team, nadatnan nilang nagbabantay mismo sa pangunahing gate ang barangay kapitan. Aniya, nang subukan nilang makapasok sa property kasama ang mga pulis, umano'y kumuha ng itak ang kapitan at tinaga ang isa sa mga security guard. Bago umano tumakas, kinuha rin nito ang isang baby armalite at itinutok bago mabilis na tumakas kasama ang ilan pang kasamahan.
Kasalukuyang nakakulong sa Lumban Municipal Lock-up Facility ang 12 na naaresto. Inaasahang isasampa ngayong araw sa Office of the Provincial Prosecutor sa Santa Cruz, Laguna ang mga kaukulang reklamo laban sa mga suspek.
Paalala: Ang mga alegasyon sa ulat na ito ay batay sa pahayag ng mga nagrereklamo at sa paunang ulat ng mga awtoridad. Mananatiling walang sala ang mga inirereklamo hangga't hindi napatutunayan ang kanilang pananagutan sa hukuman.
π₯Contributed Video
