08/09/2026
Sumailalim sa Ambulance Operations Management Training Course ang 65 responders mula sa tatlong istasyon ng Rescue 116 ng LGU Baggao na pinangunahan ng Provincial Disaster Risk Reduction and Management Office (PDRRMO) katuwang ang Philippine Red Cross. Layunin ng pagsasanay na palawakin ang kaalaman at kasanayan ng mga responder sa tamang pamamahala ng ambulansya at pagbibigay ng mabilis, ligtas, at pre-hospital care sa mga pasyente.
Ayon kay Marivel Orje, Chief ng Training Section ng PDRRMO, tampok sa pagsasanay ang skills demonstration, table-top exercises at rotational examination ng mga kalahok, kabilang ang paggamit ng vital signs at diagnostic devices, oxygenation at suctioning, triage, pagsasagawa ng Pre-Hospital Patient Care Report, splinting at immobilization, basic extrication, transfer devices management, at tamang loading at unloading ng pasyente sa ambulansya. Sa huling araw, isinagawa ang simulation exercises upang masukat ang kahandaan ng mga responder sa aktuwal na sitwasyong nangangailangan ng mabilis na tugon, maayos na koordinasyon, at wastong pangangalaga.
Umaasa si Orje na magsisilbing dagdag na kakayahan ang naturang pagsasanay upang higit pang mapalakas ang emergency response at ambulance services ng Rescue 116 sa Baggao, lalo na sa panahon ng mga aksidente, medical emergencies, at iba pang insidente.
๐ทCagayan Provincial Information Office
