30/05/2026
| Dear Provincial Government of Siquijor and LGU - Municipality of Siquijor:
Basin pwede pud mo mag ask sa OceanJet nga ibalik na sa Php 350 ang plite sa Siquijor - Dumaguete - Siquijor route apil pud ang pa Tagbilaran ug Cebu?
BM Balite Nagduso og Imbestigasyon sa Pabiling Mahal nga Plete sa Barko Bisan Niubos ang Presyo sa Fuel
| Dave Responte, DyTR News
Giduso ni Board Member Dionisio Joseph Balite ang usa ka legislative inquiry aron susihon nganong nagpabilin nga taas ang pletehan sa mga passenger vessel ug fast craft bisan pa sa pagkunhod sa global fuel prices.
Sa regular nga sesyon sa Sangguniang Panlalawigan niadtong Martes, Mayo 26, 2026, nga gipangulohan ni Vice Governor Nic Besas, gipadayag ni Balite ang nagkadaghang reklamo sa mga commuter sama sa mga trabahante, estudyante, ug negosyante.
Gipangutana sa mga pasahero nganong ang fuel surcharge nga ipatuman sa panahon sa krisis sa lana wala pa man gihapon ibalik sa normal bisan pa og nius-os na ang presyo sa gasolina.
Matod ni Balite, bisan tuod giila nga makatarunganon ang pagsaka sa pletehan sa panahon sa taas nga fuel prices, ang kasamtangang rate sa pipila ka ruta nagpabilin gihapong taas bisan pa og niubos na ang gasto sa sugnod.
Gipasiugda usab niya nga ang pampublikong transportasyon adunay katungdanan sa katilingban tungod kay direktang makaapekto kini sa paglihok sa katawhan, panginabuhian, turismo, ug sa inter-island nga ekonomiya.
Ang maong isyu gi-refer na sa Sangguniang Panlalawigan Committee on Public Utilities alang sa mas lawom nga imbestigasyon ug angay nga legislative action.
