28/05/2026
π‘ππ₯πππ’πππ₯ π‘π πππͺππ¦ πππ‘ π¦ππ₯π’π‘π ππππππ π¦π πππππππ§ππ‘ π‘π π¦πππ’π£ πππ‘ ππ₯ππ¬. ππΓππ¦, π¦ππ‘ π πππ¨ππ ππ¦πππ‘π, π§πππππ’ πππ§π¬, π‘ππ πππππππ‘ π‘π
Nakuang wara nang buhay an lawas kan sarong lalaki sa kadagatan na sakop kan Brgy. AgΓ±as, San Miguel Island, Tabaco City bandang alas-10:15 nin aga ngunyan na Mayo 28, 2026.
Binisto an biktima na si Joselito Borillo y Corpil, 44 anyos, laborer, sultero, asin residente kan Purok 6, Brgy. San Roque, Tabaco City.
Segun sa report, nakaresibe nin impormasyon an CDRRMO-Tabaco manungod sa sarong lalaki na nahihiling na nag lalataw lataw sa dagat na may distansyang haros sarong kilometro hali sa baybayon kan Brgy. AgΓ±as.
Tulos man na nagresponde an mga personahes kan kapulisan, kaibahan an CDRRMO asin Philippine Coast Guard, tanganing beripikaron an insidente.
Sigun sa imbestigasyon, sarong saksi na si Gerry Bataller y Balingbing, 52 anyos, construction worker asin residente kan Brgy. AgΓ±as, an nakahiling sa biktima mantang ini nakasakay sa sarong motorized na bangka hali sa San Miguel Island pasiring sa Tabaco City. Kaibahan suboot kaini an kapitan kan bangka kan mapansin ninda an lawas kan biktima na naglalataw-lataw sa dagat, dai na naghiro asin nakatihaya. Nagrani sinda tanganing siertuhon an kamugtakan kaini asin kan mapag-araman na wara na ining buhay, tulos nindang ipinaaram an insidente sa mga awtoridad.
Dinara an biktima sa Dr. Lorenzo Ziga Memorial District Hospital kun sain ini idineklarang dead on arrival kan attending physician na si Dra. Myrene A. Bernaldez. Sa isinagibong enot na pagsuri kan mga nagrespondeng awtoridad asin kan attending physician, wara suboot ki nahiling na anuman na lugad o senyales nin foul play sa hawak kan biktima.
Sa padagos na koordinasyon kan mga awtoridad sa mga opisyal kan mga coastal barangay, naaraman an pagkakakilanlan kan biktima sa tabang kan saiyang mga kaparyentes.
Sigun sa pahayag kan saiyang tugang sa ama na si Roberto Base y Corpil, 56 anyos asin residente man kan Brgy. San Roque, nagkaigwa suboot nin inuman asin orogmahan an saindang pamilya bandang alas-4:00 nin hapon kaining Mayo 27, 2026 bilang pag-celebrar sa graduation kan saindang pamangkin. Bandang alas-12:10 nin mag agahon kaining Mayo 28, binayaan suboot kan biktima an inuman mantang nasa irarom kan impluwensya nin arak asin nagduman sa seawall kun sain ini paramientras na naghigda.
Bandang alas-2:00 nin mag agahon, uminagi suboot si Roberto sa nasabing lugar tanganing magkua nin yelo sa saindang nakaparadang motorized na bangka alagad dai na niya nahiling an saiyang tugang asin nag-isip na naka uli na ini sa saindang harong.
Pigtutubudan na aksidenteng nahulog an biktima sa dagat asin inanod kan makusog na sulog pasiring sa kadagatan na sakop kan AgΓ±as-San Roque area.
Segun pa sa pamilya kan biktima, nagtutubod sinda na sarong aksidente sana an nangyari asin wara sindang nahihiling na anuman na foul play sa insidente. Huli kaini, kusang-buot nindang ipinahayag na dai na ninda minamawot pang isairarom sa autopsy examination an bangkay kan biktima.
Padagos man an ginigibong dokumentasyon asin koordinasyon kan mga otoridad katakod kan insidente.
Mientrastanto, nagpaabot man nin pakikidumamay an Lokal na Gobierno kan Tabaco sa mga nawalat na pamilya asin mahal sa buhay kan biktima.
