Radyo Bandera Local/Regional News, Brgy. 110 Utap, Zone 4, Tacloban City (2025)

24/08/2023

NANGAWAT HA MIGUEL PENSION HOUSE HOTEL HA TACLOBAN, NAKIT-AN HA CCTV FOOTAGE

Usa nga lalaki nga naka sul-ot hin facemask an kulaong nag-iinquire ha
Miguel Pension House Hotel ha Del Pillar Street Tacloban City, yana nga kulop, Huwebes nga adlaw.

Nakuha han suspek an usa nga Vivo Y11 nga cellphone nga gin tatag-iya han bantay han mao nga hotel

Samtang nananawagan naman an tag-iya han cellphone kun hin-o man it nakilala hini nga suspek nga makipag-sumpayan haira

Carol Medino | August 24, 2023
ctto

24/08/2023

ROAD CONCRETING HA MGA BARANGAY HAN CALBAYOG CITY, IG PAPATUMAN HITON SAMAR FIRST DISTRICT

Mag papatuman iton Samar First District Engineering Office kaupod an Department of Agriculture hin duha nga Farm-to-Market Roads (FMRs) ha Calbayog City nga may-ada total budget nga P22.56 milyon.

Usa gihapon ha mga proyekto hiton FMR an pag konkreto han dalan tikang ha Brgy. San Jose kutob ha Barangay Langoyon, ngan tikang ha Barangay Quezon kutob Barangay San Isidro ha mao nga syudad.

Ini nga pag bubuhaton nga pitad in makaka bulig ha mga parag-uma han mao nga mga Barangay agud nga mapadali iton pag biyahe ngan pag dul-ong han ira mga produkto ha mga hirani nga merkado

Carol Medino | August 24, 2023
photo by Calbayog Journal

24/08/2023

NFA 8, WARAY PA MAKAPALIT HIN DAMO NGA HUMAY PARA HA BUFFER STOCK HAN REHIYON

Ginpahayag han National Food Authority (NFA) Regional Office 8 nga kulang pa an suplay han ira napalit nga mga humay para ha buffer stock han rehiyon.

Sumala ha NFA 8 Regional Director Jasmin Lintag, waray pa hira makapalit hin damo nga humay matungod nga mas ginpipili yana han mga parag-uma nga igbaligya an ira mga na ani
ha mga traders tungod han huruhataas nga procurement price han mga ini kumpara ha NFA.

Ha pagkayana in ada ha 17-19 pesos kada kilo an procurement price han NFA depende ha moisture content han humay samtang ha mga traders naman in ada ha 20 pesos kada kilo.

Nagpatapod naman an buhatan nga diri magkakamay-ada hin shortage ha ira buffer stock bisan man kun gutiay pala an ira napapalit nga mga humay tungod nga may mga well milled rice pa nga naka stock ha ira mga warehouse.

Mababaruan nga may-ada 21 nga warehouse an NFA ha bugos nga rehiyon 8 kun diin didto naka tago an mga bugas nga naka standy para hiton panahon hin kalamidad.

Radyo Bandera Tacloban 103.1

Eunice Lagado | August 24, 2023

24/08/2023

PANHOLD-UP HA USA NGA TINDAHAN HA NORTHERN SAMAR, KUHA HA CCTV!

Gin hol-up hin duha nga armado nga lalaki an tindahan ha bungto han Catubig, Norrthern Samar han nakalabay nga Agosto 22.

Base ha kuha han CCTV, nga tigda sumakob ha tindahan in armado nga lalaki ngan gin sugo an tindera nga abrihan an iya surdlan hin kwarta samtang an iya upod naman in nag babantay ha gawas han tindahan.

Dara han kahadlok han 19 anyos nga tindera, waray na inin makabaribad ngan gin hatag nala an maabot usa ka libo nga kuhida niya.

Gin papadayon hasta yana an imbestigasyon para masabtan an pagkaka kilanlan han mga suspek.

Radyo Bandera Tacloban 103.1

By: Mary Lore Doque | August 24, 2023
Credits to the rightful owner

24/08/2023

100 ANYOS NGA LALAKI, MATATAGAN HIN ₱100,000 HA BAYBAY CITY

An 100 anyos nga hi Crisostomo Tripoli nga residente han Barangay Makinhas, Baybay City in tatagan hin ₱100,000 ha masunod nga bulan.

Hi Tripoli in gin tagan naman hin ten thousand Cash Assistance tikang kan City Government han Baybay nga gin hatag han representative ni City Mayor Jose Carlos Cari nga hi CSWD Officer Manuel Icon Donaire.

Giin siguro han DWSWD nga makakakarawat hi Tripoli hin ₱100,000 tungod han RA 10868 nga mas kilala nga the Centenarians Act of 2016 para han mga Pilipino nga maabot 100 anyos ngan labaw pa.

Radyo Bandera Tacloban 103.1

By: Mary Lore Doque | August 24, 2023
Photo by: Baybay.ph

24/08/2023

DATI NGA REBELDE, SUSPEK HA PAGPUSIL-PATAY HA USA NGA ABOGADO HA VILLABA LEYTE

Nagpapadayon an gindudumara nga manhunt operation han mga kapulisan agud nga madakop an suspek ha natabo nga panmusil-patay kan Atty. Elmer Mape ha bungto han Villaba, Leyte.

Ginkilala an suspek han mao nga krimen nga hi Butchoy Oliverio, 37 anyos an pangidaron, anay miyembro han New Peoples Army (NPA) ngan residente han Brgy. Capiñahan, Villaba, Leyte.

Sumala kan PMaj. Edwin Tolibas, hepe han Villaba MPS, nga damo iton anggulo nga ira ginhihingita nga rason han pagpataya ha mao nga abogado, usa na dinhi an daw naiha na nga personal nga kasinahon han suspek ngada ha biktima.

Samtang, nagtotoo naman an pira nga mga kasangkayan ni Atty. Elmer Mape nga may kalabutan ha politika an motibo han pagpataya hini matungod han pagigin kritiko hini ha usa nga anay opisyal han probinsya.

Radyo Bandera Tacloban 103.1

Eunice Lagado | August 24, 2023

23/08/2023

OPERATION TULI GINDUMARA HA TACLOBAN NORTH

Nakatagamtam an masobra mil nga mga kabataan han libre nga panuri nga gindumara ha Norte nga parte han Tacloban.

Kasugbong an Department of Health ngan mga Eastern Visayas Medical Center naging manilampuson an Operation Tuli nga programa han City Government han Tacloban.

Tungod naman han kadamo han ihap ha mga nagpaturi in waray maakomodar an ngatanan.

Mababaruan nga sakop han Sto. District Health Center an walo nga barangay ha norte amu ini an Brgy. 97 Cabalawan, 98 Camansihay, 101 New Kawayan, 102 Old Kawayan, 105 San Isidro, 106 Sto. Niño, 107 Sta. Elena, ngan 108 Tagpuro.

Radyo Bandera Tacloban 103.1

Eunice Lagado | August 24, 2023
📸Tacloban CIO

23/08/2023

300 NGA MGA BENEPISYARYO HAN PABAHAY HA TACLOBAN NAKARAWAT NA AN IRA MGA TITULO

Maabot ha 300 nga mga benepisyaryo han pabahay ha siyudad han Tacloban an nakakarawat na han ira Transfer Certificate of Title (TCT).

An mao nga mga benepisyaryo in tikang ha mga resettlement sites han North Hill Arbours, St. Francis Village, Greendale Residence, Villa Sofia, ngan Villa Diana.

Gin-aaghat naman han Tacloban Task Force Titulo an mga benepisyaro han pabahay nga nakakarawat na han ira Deed of Conveyance, Transfer Title, ngan tificate of Certificate of Award nga mag apply na para han Transfer Certificate of Title.

Nagpatapod naman an siyudad nga tatalinguhaon nira nga makagdumara hin kinada bulan nga pan release han titulo agud nga makab-ot an target nga sobra mil nga mga titulo ugsa mahuman an tuig.

Radyo Bandera Tacloban 103.1

Eunice Lagado | August 24, 2023
📸 Tacloban CIO

23/08/2023

250 MERIDANON BENEFICIARIES, NAKA KARAWAT HIN KWARTA TIKANG HA TUPAD PROGRAM

Naka karawat hin tag P3,750 an kada TUPAD Beneficiaries para han ira 10 ka-adlaw nga community service nga gin hatag han Western Leyte Field Office para ha Merida Leyte.

Gin pasalamatan ni Mayor Rolando M. Villase hira TINGOG-Partylist Representatives Hon. Yedda Marie K. Romualdez ngan hi Hon. Jude A. Acidre, pati hi House Speaker Ferdinand Martin G. Romualdez, para han ira pag suporta ha Merida.

Dugang pa niya, an sweldo nga nakarawat han mga Mediranon TUPAD Beneficiaries in dako nga bulig para han mga tawo para makapalit hira hiton ira mga kinahanglanon.

Radyo Bandera Tacloban 103.1
By: Mary Lore Doque | August 24, 2023

23/08/2023

ARESTADO AN MOST WANTED PERSON HA EASTERN SAMAR

An usa nga lalaki nga Municipal Most wanted person ha kaso nga homicide ha Brgy. Maybocog, Maydolong Eastern Samar nadakop yana nga adlaw, Agosto 23

An suspetsado gin kilala nga hi Teofilo, 59 anyos, usa nga mag-uruma nga nag ukoy ha mao nga syudad.

Nadakop an suspek mga alas 3 han kaagahon ha usa nga warrant of arrest para ha kaso nga homicide nga may ada ginrekomendar nga piyansa nga P120,000

Aada na ha kustodiya han Maydolong MPS an suspek para han dokumentasyon ngan sakto nga disposisyon.

Radyo Bandera Tacloban 103.1
Diane Ganar | August 23, 2023
Via: PCADG Eastern Samar

23/08/2023

PANAGANG KONTRA BAHA, GIN AYAD HA TULAY HAN BARANGAY BUENAVISTA

Nag ayad hin panagang kontra baha an Department of Public Works and Highways ha tulay han Buenavista ha Barangay Buenavista, San Jorge, Samar

An gin himo nga construction in may total budget nga P52.49 milyon ka pesos na tikang ha General Appropriations Act (GAA) para hiton FY 2023

Ini naman in may-ada kahirayo nga 200 ka metros, 7.2 metros nga kahitaas, 1.2 metros nga kahilapad hiton walkway, 0.8 metros parapet nga asya iton nag po-protektar ha mga residente han Barangay

Mahibabaruan An Gandara River in usa ha major river systems ha 1st District hiton Samar nga prone hiton baha

Carol Medino | August 23, 2023
photo courtesy Calbayog Journal

23/08/2023

900 KAPULISAN GIN PADARA HA N. SAMAR PARA BUMULIG HA ANTI-INSURGENCY HA 14 NGA MGA BARANGAY

Nag padara hin maabot 900 nga kapulisan an Philippine National Police para bumulig ha anti-insurgency ha 14 nga mga Barangay ha Northern Samar

Ini nga pitad in kasumpay han “Revitalized Pulis sa Barangay” Program hiton PNP agud malikayan an pag sulod han grupo hiton New People’s Army o kun NPA ha mga Barangay ha mao nga probinsya.

Gin pili an mga kapulisan nga gin pakalat ha iba iba nga parte hiton Northern Samar sugad hiton mga pulis nga eskperyensya ha farming, nursing, engineering, plumbing, electrical, ngan healthcare.

Ini naman nga mga PNP personnel in mag babantay ha iba iba Barangay ha sulod hiton unom kabulan

Carol Medino | August 23, 2023

Photo courtesy PRO 8

Radyo Bandera Local/Regional News

24/08/2023

24/08/2023

24/08/2023

24/08/2023

24/08/2023

24/08/2023

23/08/2023

23/08/2023

23/08/2023

23/08/2023

23/08/2023

23/08/2023

Address

Telephone

Website

Alerts

Contact The Business

Shortcuts

Share

Category