19/06/2026
Ocean Jet Magpakunhod og Fuel Surcharge; Pamasahe sa Daghang Rota sa Kabisaya-an Mubarato Sugod Hunyo 20
Mopatuman sa OceanJet ang ikaduhang pagpaubos sa temporaryong fuel surcharge sugod Hunyo 20 subay sa MARINA Advisory 2026-33, nga mosangpot sa pagkunhod sa pasahe sa pipila ka dagkong inter-island nga mga rota sa Kabisay-an.
Matod sa kompanya, ang pag-usab sa pasahe resulta sa pagkunhod sa presyo sa krudo kon itandi sa miaging mga bulan. Bisan pa niini, nagpabilin gihapong mas taas ang gasto sa gasolina ug diesel kumpara sa lebel niini sa wala pa ang krisis sa presyo sa petrolyo.
Gipasabot sa OceanJet nga magpabilin sa pagkakaron ang bahin sa temporaryong fuel surcharge aron masuportahan ang luwas, kasaligan, ug episyenteng operasyon samtang wala pa hingpit nga mibalik sa normal ang presyo sa krudo.
Lakip sa mga rotang maapektuhan sa pagkunhod sa surcharge mao ang Cebu–Tagbilaran, Cebu–Ormoc, Cebu–Getafe, Tagbilaran–Siquijor, Siquijor–Dumaguete, Tagbilaran–Dumaguete, Cebu–Palompon, Cebu–Maasin, ug Maasin–Surigao.
Ubos sa bag-ong fare matrix, ang pasahe sa rutang Cebu–Tagbilaran mahimong ₱920 alang sa Tourist/Open Air ug ₱1,450 alang sa Business Class. Sa Cebu–Getafe, ang pasahe itakda sa ₱540 alang sa Tourist/Open Air ug ₱960 alang sa Business Class.
Samtang sa rotang Tagbilaran–Siquijor, ang pasahe mahimong ₱950 alang sa Tourist/Open Air ug ₱1,450 alang sa Business Class.
Gipasidaan sa OceanJet nga bisan magsugod ang bag-ong mga pasahe sa Hunyo 20, posible nga dili dayon kini makita sa tanang booking channels tungod sa nagpadayong pag-update sa ilang sistema.
Gidugang sa kompanya nga walay kausaban sa pasahe sa mga rutang wala malakip sa advisory. Ang posibleng umaabot nga pag-usab sa pasahe magdepende gihapon sa kahimtang sa merkado sa krudo ug sa operational requirements sa kompanya.
Gipasiugda sa OceanJet nga magpadayon kini sa paghatag og luwas, episyente, ug kasaligan nga serbisyo sa pagbiyahe sa dagat samtang gitimbang usab ang kaharuhay sa mga pasahero ug ang pagpadayon sa lig-on nga operasyon.
Via Dave Charles Responte
