11/08/2026
REP. ORTEGA, SINABING MAHALAGA NA MABIGYAN NG PONDO ANG ILANG LUGAR PARA SA FLOOD MITIGATION PROJECTS
Naniniwala si La Union Rep. Paolo Ortega na dapat ay gawing prayoridad sa national budget ang pagbibigay ng pondo para sa mga flood mitigation infrastructure projects sa mga lugar na maituturing na bahain.
Kasama umano sa mga lugar na ito ay ang kanyang distrito na umano'y maituturing na catch basin kaya binabaha.
Ayon kay Ortega, sapat na umano ang mga teknolohiya para malaman kung ano ang mga maituturing na 'red zones' pagdating sa pagtaas ng tubig na dapat mabigyan ng proyekto.
"Importante na mabigyan po ng pondo 'yung mga flood mitigation na infrastructure projects 'no, kasi like dun sa isang lugar ko totoo naman na meron pong konting pagbaha don na hanggang lampas po ng ankle. Pero 'yun nga po, catch basin siya," ani Ortega.
"Isang taon po, halos isang taon po higit na wala pong flood mitigation projects. Maganda po na balikan ito. Tutal nandiyan naman po 'yung teknolohiya, may Project NOAH po, meron na po tayong mga drones. Meron na pong iba't ibang ah klase po ng pagva-validate dun sa mga lugar po na mga red zones na nangangailangan po ng ganitong klase ng imprastraktura at mitigation," dagdag pa niya.
Ngunit ayon sa mambabatas ay kailangan pa itong pag-usapan kung gagawin itong prayoridad ng gobyerno.
"Well, pag-uusapan din po 'yan. Ang alam ko naman po, ah, 'yung mga nandun po sa red zones, ah, at saka orange zones sa Project NOAH po, sila po 'yung parang mabibigyan ng prayoridad ng national government. I'm sure nakalagay din po sa NEP 'yun, 'yung mga lugar na 'yun," aniya.
