14/08/2026
Halintulad
Para kang sinag mula sa silanganan -
Silip ng liwanag mula sa langit na lagusan;
Bagong umuusbong na mga kanta,
Ang sa akin ay nagpapagunita.
Para kang lunti sa kabukiran -
Kay inam kung pagmamasdan;
At habang humihigop ng mainit na kape,
Naalala ko ang matamis na mensahe mo kagabi!
Para kang lilim sa tanghaling tapat -
Kapahingahan sa ilalim ng punong may malalaking ugat.
Ang hangin ang humahawi sa bawat pahina,
Upang harapin ang nagbabagong kabanata.
Para kang langit sa paglipas -
Sa iyo’y walang puwang ang pagkupas,
Bagkus ay patuloy pa ngang tumitingkad,
Kapag ang araw ay pakanlurang naglalayag.
Para kang takip-silim.....
Huling sulyap mo’y nag-iiwan ng ngiti!
Oo, kahit dumidilim ay tila mayro’ng bahaghari-
Kumukulay sa tikom kong mga labi.
Para kang buwan......
Na sa tuwing tinititigan,
Ay hindi ko maiwasang matulala;
At parang naging bahagi na rin ako ng mga tala.
Para kang himig sa hating gabi -
Habang nakahiga sa sapot na hinabi;
Habang tahimik at nalulumbay,
Ikaw ang musika na sa tula ko’y maisasabay.
Para kang hamog na mahimbing -
Sa panaginip ko ay nakasiping,
Kahit nilupig ng guni-guni,
Panatag pa rin akong nabibighani!
Para akong nahuhulog sa kalawakan,
Kapag ang sulyap mo ay sa akin tumatahan.
Sa tingin ko.....hindi sapat ang dalampo’t apat na oras...
‘Di bale, umaasa pa rin ako sa araw ng bukas.
by Roj Rodriguez
August 08, 2026
