24/03/2026
“BAKIT BIGLANG ₱110?”
Umani ng atensyon ang naging pahayag ni Senador Rodante Marcoleta matapos niyang kwestyunin ang tila biglaang pagsipa ng presyo ng langis sa bansa, sa kabila ng naunang pahayag na may sapat na suplay ang Pilipinas.
Sa isang talakayan sa programang “Sa Ganang Mamamayan” ng Net25, diretsahan niyang tinanong ang tila hindi tugmang sitwasyon ng suplay at presyo:
“2 weeks ago, sinabi ng Pangulo mayroon tayong stock, 50 to 60 days [buffer stock]. Eh 2 weeks pa lang ang nakaraan eh—BAKIT BIGLANG NAGING ₱110?”
DIKTA NG MERKADO O DIKTA NG KITA?
Sa gitna ng paliwanag na ang presyo ay nakaangkla sa galaw ng world market, hindi kumbinsido si Marcoleta. Iginiit niya na dapat busisiin kung ang pagtaas ay tunay na dulot ng pandaigdigang presyo—o kung may ibang salik na nakakaapekto.
“Dikta ng mercado, o dikta ng kanilang kagustuhan na kumita ng limpak-limpak sa gitna ng pagdadalamhati at pasakit na dinaramdam ng ating mga kababayan?”
HAMON SA MGA OIL COMPANIES
Hinamon din ng senador ang malalaking oil companies na maging transparent sa pinanggagalingan ng kanilang suplay:
“Ipakita ninyo sa libro ninyo na 100% ng inyong supply nanggagaling sa Persian Gulf, para lang ako maniwala na kailangang itaas mo ng ₱110.”
Ipinunto rin niya na hindi lamang sa Middle East kumukuha ng suplay ang rehiyon, at may mga refinery at imbakan sa ibang bansa tulad ng Singapore na maaaring makaapekto sa presyo.
Ang mga pahayag na ito ay lumalabas sa gitna ng tumitinding panawagan para sa masusing imbestigasyon sa oil pricing sa bansa, lalo na’t direktang naaapektuhan ang transportasyon, presyo ng bilihin, at kabuhayan ng mga Pilipino.
