20/10/2025
TAN-AWA| DUHA KA INDIBIDWAL, SIKOP SA KASONG CARNAPPING!
Arestado sa Butuan City Police Office kun (BCPO) ang duha ka suspetsado sa duha ka managlahing kaso sa carnapping pinaagi sa paspas nga pagresponde ug hot pursuit operations niadtong Oktubre 18 ug 19, 2025, didto sa syudad sa Butuan.
Subay sa press release sa BCPO, niadtong Oktubre 18 sa alas 10:35 sa gabii, malampusong nadakpan didto sa Brgy. Port Poyohon sa nahisgutang syudad ang suspetsado nga si alyas “Per”, 28 anyos, ulitawo, ug residente sa Brgy. Jaliobong, Kitcharao, Agusan del Norte.
Diin, ang maong pagdakop subay sa reklamo sa biktima nga giilang si alyas “Shen”, 22 anyos, dalaga ug taga Brgy. Ong Yiu.
Sumala pa sa biktima, iyang giparking ang iyang motorsiklo sa gawas sa usa ka gasoline station sa G. Flores Street, Brgy. Humabon.
Human sa pipila ka minuto, iyang namatikdan nga gimaniobra sa suspetsado ang ignition sa motor ug gidrayban kini palayo, apan dali ra kining narespondehan sa kapulisan hinungdan sa pagkasikop sa suspetsado.
Sa sunod adlaw, Oktubre 19, nagpatuman usab ang mga personahe sa BCPS 2 og hot pursuit operation nga miresulta sa pagkadakop sa suspetsado nga si alyas “Ken”, 22 anyos, taga Brgy. Holy Redeemer, Butuan City.
Subay sa report, sa alas 4:00 sa kadlawon, pugsanong misulod ang suspek sa usa ka istasyon sa Gasolinahan sa Ochoa Avenue, Brgy. Limaha pinaagi sa pagguba sa bintana.
Diin, gikawat niya ang usa ka cellphone nga nagkantidad og ₱20,000, kwarta nga ₱10,000, ug usa ka motorsiklo nga gipanag-iyahan sa empleyado nga si alyas “June”, 26 anyos.
Pinaagi sa CCTV ug tabang sa mga testigo, nasubay ang suspek ug nadakpan sa Brgy. Port Poyohon, ingon man nga narecover usab ang gikawat nga motorsiklo.
Sa pagkakaron, ang duha ka suspetsado naka-kustodiya na sa gikabutyag nga istasyon sa kapulisan, samtang giandam na ang mga dokumento alang sa pagpasaka sa tukmang kaso batok kanila ngadto sa City Prosecutor’s Office.
Courtesy: Butuan City Police Office
📜: Niel Ayala Otacan
