Calapan City News Updates

07/10/2025

07/10/2025

SP VS. EHEKUTIBO: 'LARGE-SCALE DREDGING,' IPINILIT SA GITNA NG BUDGET PARA SA KABATAAN; GOV. DOLOR, NAG-WALKOUT KASAMA ANG DEPARTMENT HEADS

CALAPAN CITY, Oriental Mindoro — Nag-walkout si Governor Humerlito "Bonz" Dolor kasama ang ilang Department Heads mula sa sesyon ng Sangguniang Panlalawigan (SP) matapos umanong ipilit na talakayin ang isyu ng Large-Scale Dredging habang ang agenda ay ang mga programa para sa scholarship at employment ng mga kabataan.

Nagpahayag ng pagkadismaya si Gov. Dolor sa paulit-ulit na pag-ungkat sa "rinding-rindi" na raw niyang usapin. Giit niya, walang katotohanan ang paratang na may intensiyon siyang magsagawa ng komersyal na dredging o quarrying, at bilang patunay, pormal niyang pinirmahan ang Provincial Ordinance No. 197-2025 na nagbabawal sa sea bed quarrying.

Nanawagan ang Gobernador sa SP na itigil na ang paggamit sa sesyon para sa isyu at sa halip ay tutukan ang mga programang magpapaunlad sa lalawigan.

07/10/2025

Governor Bonz Dolor, Hinarap ang mga Akusasyon ng Substandard at Overpriced na Proyekto: Kapitolyo Grandstand, Mas Mura Kaysa Bongabong Tent!

Calapan City, Oriental Mindoro — Mariing pinabulaanan ni Governor Humerlito "Bonz" Dolor ang mga akusasyon mula sa mga kritiko at social media pages, partikular ang "Mindoro Unfiltered," na overpriced at substandard ang Grandstand at Sports Complex Project ng Kapitolyo.

Sa isang video statement, diretsahan niyang kinumpara ang halaga ng proyektong itinayo noong 2021 sa ilalim ng kanyang administrasyon sa isang "tent" project sa Bongabong na ipinagawa ng kinatawan ng Ikalawang Distrito.

Ang Komparison:

✅Kapitolyo Grandstand: Nagkakahalaga ng P25 milyon (P25,526,000) at may lawak na 1,200 square meters.

✅Bongabong Tent: Nagkakahalaga ng P37 milyon at may lawak na 900 square meters.

Ayon kay Dolor, kung pagbabatayan ang presyo kada metro kuwadrado (per square meter), mas mahal pa ang proyekto sa Bongabong. Aniya, ang grandstand ng Kapitolyo ay P20,800 bawat metro kuwadrado, samantalang ang Bongabong Tent ay umabot sa P40,600.

"Doble ang halaga no'n nito (Bongabong Tent)!" diin ni Dolor. "Tapos sasabihin niyong ito ang overpriced, substandard? Paano naging overpriced?"

Kinontra rin ng gobernador ang mga ulat na umabot sa P300 milyon ang halaga ng Kapitolyo Grandstand, aniya'y kasama na sa tinutukoy na halagang P200 milyon ang buong Sports Complex (kabilang ang oval, gymnasium, bleachers, tennis/volleyball courts, at landscaping).

Tungkol sa isyu ng substandard na gawa, iginiit ni Dolor na ang proyekto ay "certified na ng structural engineer... standard ang design" bago at matapos ang konstruksiyon. Hinamon niya ang kanyang mga kritiko, na aniya'y gumagamit ng mga fake accounts at trolls, na harapin siya sa katotohanan.

"Bato ang ipinukol niyo sa akin pero ginto ang isinukli ko sa inyo," pahayag ni Dolor. "Hindi ako papayag na ang pangalan ko'y madudungisan ninyo. Ang gusto niyong kalabanin ang totoo. Iyan ang kalabanin niyo."

07/10/2025

Dolor, May DOKUMENTADONG BWELTA: Datos ng PSA, SINALAG ang 'Maling Akusa' ni Bokal Buenaventura Hinggil sa Kahirapan ng Mindoro.

"Ang poverty incidence, dati 35%, Ngayon 14% na lang"

CALAPAN CITY, ORIENTAL MINDORO– Tiyak na mapupunta sa mainit na debate ang isyu ng kahirapan sa Oriental Mindoro matapos salagin at pabulaanan ni Gobernador Humerlito "Bonz" Dolor ang mga pahayag ni Bokal Manny Buenaventura na lumalala ang poverty incidence sa probinsya sa mga nagdaang taon.

Naging sentro ng kontrobersiya ang obserbasyon ni Bokal Buenaventura sa isang pagdinig, kung saan sinabi niya: "Hindi ko pa po na-discuss sa SP but I've noticed from the time I joined the Sangguniang Panlalawigan that over over the years, siguro for the last three to five years, the poverty incidence in Oriental Mindoro has has, you know, deteriorated. Mataas ang poverty incidence natin sa Oriental Mindoro."

Ngunit agad itong sinagot ni Governor Dolor, tinawag na "malaking pagkakamali" ang akusasyon at ipinrisinta ang opisyal na datos ng Philippine Statistics Authority (PSA) upang patunayang bumaba ang antas ng kahirapan, taliwas sa pahayag ng Bokal.

"Sinabi niyo kanina, pinalalabas niyo, the past five years pataas nang pataas ang poverty incidence? Eh ito ang facts oh," mariing hamon ni Dolor, kasabay ng pagbanggit sa mga nakaraang datos:

2006: Umabot sa 33.5% ng populasyon ang mahirap, na aniya ay "all time high."

2015: Bumaba ito sa 15.3% bago siya maupo.

Sa ilalim ng kanyang termino: Naitala ang poverty incidence na 7.3%, 12.8%, at 14.1%.

"Sasabihin niyo bokal, napakahirap natin, 14%. Eh dati 35%," diin ng Gobernador.

Tahasang iginiit ni Dolor na kung pagbabatayan ang kasaysayan, mas mataas ang bilang ng mahihirap noong panahon ng "mga boss" ni Buenaventura, lalo na noong 2006 at 2009. Aniya, kahit pa tumaas ang huling datos (14.1%), ito ay sanhi ng mga pambansang krisis tulad ng COVID-19 at sunod-sunod na bagyo, mga kaganapang wala noong administrasyon ng mga kakampi ni Buenaventura.

"Nung bang sila ang gobernador, may COVID? Nawala 'yung economics? Walang ayuda? Nung panahon ng mga boss niyo, 'nun mahirap ang tao. Tapos ngayon niyo isisisi sa akin," pagtatapos ni Dolor, na nagpapahiwatig na pulitika at hindi tunay na datos ang nagtutulak sa akusasyon ni Buenaventura.

07/10/2025

Isang taos-pusong pasasalamat ang ipinaabot ng Voyage: The Mindoro Artists Group sa Department of Trade and Industry (DTI), kabilang ang DTI Oriental Mindoro at DTI MIMAROPA, matapos mapalawak ang exposure ng kanilang mga likha.

Kinilala ng grupo ang malaking ambag ng DTI sa pagpapatupad ng mga proyektong tulad ng Maharlikhaing Mindoreño at OBRA MIMAROPA. Ayon sa Voyage Artists, ang suportang ito ay nagbigay ng panibagong pag-asa at sigla sa maraming visual artists na minsan nang pinanghinaan ng loob.

"Ang karanasang ito ay tunay na napakahalaga—nagbukas ito ng pintuan ng pagkakataon at nagpatibay ng aming paniniwala sa halaga ng sining at kultura," pahayag ng grupo. Ayon sa kanila, muling nabuhay ang art community sa kanilang komunidad.

Bukod sa DTI, pinasalamatan din ng Voyage Artists ang iba pang sangay ng pamahalaan na patuloy na sumusuporta sa sining. Bilang tugon sa ibinigay na tiwala, nangako ang grupo na lalo pa nilang paghuhusayan ang kanilang sining upang maipagmalaki ang kultura at talento ng Mindoro.

📸 DTI OrMin

07/10/2025

PUERTO GALERA – Isang malaking pagbabago ang naganap para sa komunidad ng mga Mangyan sa Malago matapos silang pagkalooban ng Starlink internet connection ngayong araw, Oktubre 7, 2025. Ang hakbang na ito ay inaasahang magbubukas ng mas malawak na access sa teknolohiya at de-kalidad na edukasyon para sa mga mag-aaral.

Ang proyektong ito ay pinangunahan ng Sangguniang Kabataan (SK) Federation ng Puerto Galera sa pangunguna ni SK Federation President Clyde Marcus I. Bunquin, at sinuportahan ni Congressman Arnan C. Panaligan.

Patuloy ang suporta ng lokal na pamahalaan sa mga inisyatibang nagtataguyod ng inklusibong pag-unlad at nagbibigay ng pantay na oportunidad, lalo na sa mga liblib na lugar. Layon nitong isulong ang access sa impormasyon at edukasyon para sa lahat.

📸 PIO Puerto Galera

07/10/2025

LUNGSOD NG CALAPAN — Pormal nang ipinamahagi ang P1.4-milyong seed capital sa mga napiling benepisyaryo ng Sustainable Livelihood Program (SLP) ng DSWD sa Lungsod ng Calapan.

Ang panimulang pondo ay iniabot noong Oktubre 6 kina Calapan City Vice Mayor Bim Ignacio at CSWDO Juvy Bahia, RSW.

Tumanggap ng tulong-kabuhayan ang tatlong (3) grupo: ang Sta. Isabel Rainbow, Buhuan Comunal SLPA, at Asenso Comunal SLPA.

Ito ay paunang grupo pa lamang. Inaasahang susunod na makatatanggap ng pondo ang mga samahan mula sa mga Barangay ng Lazareto, Canubing II, at Balite.

Ang inisyatibang ito ay naglalayong magbigay ng puhunan para sa pagpapaunlad ng micro-enterprise projects sa mga komunidad.

📸 Tatak Calapeño FB page

07/10/2025

POLA, ORIENTAL MINDORO – Pinalakas ng Lokal na Pamahalaan ng Pola ang implementasyon ng Early Childhood Care & Development (ECCD) Program matapos isagawa ang isang mahalagang pulong at personal na maghandog ng kagamitan si Ms. Patricia Angela M. Cruz, o "Ate Pat," anak ni Mayor Jennifer M. Cruz ("Ina ng Mindoro").

Isinagawa ang Regular na Pulong ng mga Child Development Workers (CDWs) upang tiyakin ang maayos na daloy ng programa at ihanda ang lahat ng nakatakdang gawain para sa mga bata at Child Development Centers. Ayon sa ulat, naging pangunahing layunin ng pagpupulong ang pagtukoy sa mga umiiral na isyu at alalahanin (issues and concerns) na nangangailangan ng agarang solusyon.

Bilang direktang suporta sa mga CDWs, personal na inabot ni "Ate Pat" ang tatlong (3) unit ng bagong Computer Laptops. Ang nasabing donasyon ay inaasahang makagagaan sa administratibong gawain ng mga CDWs at makatutulong sa pagpapahusay ng kanilang pagtuturo.

Ayon kay "Ate Pat," ang iba pang mga pangangailangan ng Child Development Centers ay kasalukuyan pa ring tinutugunan. Aniya, "on process" pa ang pagkuha ng tulong mula sa mga posibleng Sponsors at good Samaritans upang mapunan ang natitirang kakulangan.

Ang pulong ay naging kapaki-pakinabang para sa lahat ng dumalo at nagtataguyod ng pag-asa para sa tagumpay ng programa na nakatuon sa paghubog ng kinabukasan ng mga kabataan.






📸 Russel Bugarin Tan

07/10/2025

Isinagawa ng 2nd Infantry (Jungle Fighter) Division (2ID) ang paglilipat ng mga tropa noong Sabado, Oktubre 4, bilang bahagi ng kanilang patuloy na pagtiyak sa operational readiness at balanseng deployment ng puwersa.

Ang mga tauhan ng 68th Infantry (Kaagapay) Battalion ay ipinadala sa Mindoro upang palakasin ang seguridad at suportahan ang kapayapaan doon. Ang deployment ay isinagawa matapos makumpleto ng 68IB ang kanilang Battalion Evaluation and Capability Program (BECP), na nagpapatunay na handa sila sa misyon.

Samantala, inilipat naman ang mga tropa ng 4th Infantry (Scorpion) Battalion mula Mindoro patungong Camp General Mateo Capinpin upang doon sumailalim sa BECP.

Ayon sa 2ID, ang hakbang na ito ay nagpapakita ng kanilang dedikasyon na panatilihin ang mga yunit na de-kalidad ang pagsasanay at may kakayahang tumugon sa anumang hamon sa seguridad.

📸 2nd Infantry Division

06/10/2025

ISANG magnitude 3.5 na lindol ang naitala malapit sa bayan ng Abra De Ilog, Occidental Mindoro, kaninang madaling araw ng Martes, Oktubre 7, 2025.

Batay sa impormasyon mula sa Philippine Institute of Volcanology and Seismology (PHIVOLCS), nangyari ang pagyanig bandang 12:18 ng umaga.

Ang sentro ng lindol ay natukoy sa 13.54° Hilaga, 120.68° Silangan, o humigit-kumulang 11 kilometro hilagang-kanluran (N 25° W) ng Abra De Ilog.

May lalim itong 10 kilometro.

Ayon sa PHIVOLCS, ang lindol ay tectonic ang pinagmulan, ibig sabihin ay sanhi ito ng paggalaw ng mga fault sa ilalim ng lupa.

Sa kasalukuyan, wala pang naiulat na pinsala sa mga ari-arian o istruktura, at inaasahang wala ring magiging aftershocks kasunod ng nasabing pagyanig dahil sa katamtaman nitong lakas. Patuloy na minomonitor ng PHIVOLCS ang sitwasyon.

SOURCE: PHIVOLCS