18/07/2025
NANGAWAT NADAKPAN, MGA ALAHAS NAKUHA
Nadakpan sa kapulisan ang usa ka suspek sa pagpangawat pipila ka oras human ang giingong krimen sa Tagum City karong buntag.
Sumala ni Lt. Col. Frederick Deles, acting Tagum City police chief, nabawi sab gikan kang alyas Erwin ang mga alahas, relo ug uban pang mahalon nga mga gamit sa biktimang usa ka financial advisor.
Matud sa report sa Tagum City Police Office, si Erwin nadakpan sulod sa iyang balay didto sa Purok Garcia, Barangay Mankilam alas-6:20 sa buntag sa gilusad nga hot pursuit operation sa mga elemento sa Tagum City police.
Sa imbestigasyon sa kapulisan, alegasyon nga gisulod sa 27-anyos nga suspek ang girentahang kwarto ni Virhel, 28, didto sa Purok Nazareno, Barangay Visayan Village mga alas-12:05 sa kaadlawon.
Nabawi gikan sa suspek ang mga gamit sa biktima sama sa lima ka mga G-shock brand nga relo, usa ka Bulgari brand nga relo, usa ka Tory Burch wristwatch, tulo ka mga Hermes bracelet, uban pang mga alahas ug usa ka jewelry box.
Matud sa kapulisan nga natultolan ang suspek dihang gisundan ang geolocator app sa usa sa mga relo sa biktima.
Tukmang kaso gihikay na batok sa suspek kinsa kasamtangang naa sa kustodiya sa kapulisan.
📸 Tagum PNP, CJanice
