02/09/2026
BALITANG REGIONAL : 𝗗𝘂𝗹-𝗮𝗻 𝘀𝗮 𝗺𝗶𝗹𝘆𝗼𝗻 𝗮𝗻𝗴 𝗸𝗮𝗻𝘁𝗶𝗱𝗮𝗱 𝘀𝗮 𝗜𝗟𝗘𝗚𝗔𝗟 𝗡𝗚𝗔 𝗱𝗿𝗼𝗴𝗮 𝗻𝗮𝗸𝘂𝗺𝗽𝗶𝘀𝗸𝗮 𝗴𝗶𝗸𝗮𝗻 𝘀𝗮 𝗱𝘂𝗵𝗮 𝗸𝗮 𝗺𝗴𝗮 𝗹𝗮𝗹𝗮𝗸i
Mokabat sa ₱788,800.00 ang gibanabang kantidad sa gituohang shabu nga nakumpiska gikan sa duha ka High-Value Individual (HVI) atol sa buy-bust operation nga gihimo sa kapulisan pasado alas 7:20 sa gabii niadtong Septiyembre 1, 2026, sa San Isidro Labrador, Barangay Lapasan, Cagayan de Oro City.
Nasikop sa operasyon sila Jumar Salapang Suico, alyas “Jumar,” 33 anyos, driver, ulitawo ug residente sa maong lugar, ug Wilson Obianda Aceron, 29 anyos, laborer, ulitawo ug residente usab sa San Isidro Labrador, Barangay Lapasan.
Ang operasyon gipangulohan sa PNP DEG SOU 10, ubos sa pagpangulo ni PLT Laurence W. Linmayog, uban sa mga operatiba sa Police Station 3 Agora, COCPO, Regional Drug Enforcement Unit 10, Regional Intelligence Division PRO 10, Regional Intelligence Unit 10, Maritime Group 10, Regional Mobile Force Battalion 10, ug Integrity Monitoring and Enforcement Group-Mindanao Field Unit 10.
Base sa report, ang operasyon gitabonan sa TIP Code No. A-2026-295-PNPDEG-SOU10 ug PDEA Pre-Operations number. Misangpot kini sa pagkadakop sa duha ka suspek tungod sa paglapas sa Republic Act 9165 o Comprehensive Dangerous Drugs Act of 2002.
Nakuha gikan sa mga suspek ang usa ka medium-sized nga heat-sealed transparent sachet nga adunay puti nga crystalline substance nga gituohang shabu ug gigamit isip buy-bust item, nga nagkantidad og ₱16,000.
Nakumpiska usab ang usa ka gamay ug upat ka dagkong heat-sealed transparent sachet nga adunay gituohang shabu, ingon man ang 16 ka piraso nga ₱1,000 bills, diin usa ang tinuod nga buy-bust money nga adunay serial number K8317217, samtang ang 15 ka piraso kay photocopied bills, nga mikabat sa ₱16,000.
Lakip usab sa mga nakumpiska ang usa ka green nga Redmi smartphone, usa ka multicolor sling bag, ug usa ka medium transparent plastic cellophane.
Ang kinatibuk-ang gibug-aton sa gituohang illegal nga droga nga nakumpiska gikan sa possession ug control sa duha ka suspek mokabat sa 116 gramos, nga adunay Standard Drug Price (SDP) nga ₱788,800.00.
Gipahibalo sa mga otoridad ang duha ka nasikop sa ilang mga katungod ubos sa Konstitusyon ug sa Anti-Torture Act, gamit ang pinulongan nga ilang nasabtan ug atubangan sa mga gitudlong saksi gikan sa barangay ug media.
Ang operasyon gitabonan usab sa usa ka Body-Worn Camera (BWC) ug usa ka Alternative Recording Device (ARD).
Ang duha ka suspek ug ang mga non-drug evidence anaa na sa kustodiya sa SOU 10, PNP DEG alang sa dokumentasyon ug hustong disposisyon, samtang ang mga gituohang shabu itugyan ngadto sa Regional Forensic Unit 10 sa Patag, Cagayan de Oro City, alang sa forensic ug laboratory examination.
Ang mga nadakpan nga suspek ipailalom sa hustong proseso sa balaod ug temporaryong nakadetena sa maharlika detention cell samtang giandam na Ang kasong paglapas sa R.A 9165/comprehensive dangerous drugs act of 2002.
