11/04/2026
SINO ANG LEGAL NA WALI “CONSENT” NG BABAE SA KANYANG KASAL?
Ang pagkakaroon ng WALI “consent” ng babae sa kanyang kasal ay sadyang napakahalaga at dito nakasalalay ang legalidad ng kanyang kasal.
Ipinag-utos ni Allâh ang pagkakaroon nito (wali) upang mapangalagaan ang kababaihan sa kanilang mga karapatan at higit sa lahat para sa kanilang kapakanan.
Hindi maging legal ang kasal ng babae na walang tumayong WALI (consent) at hindi rin siya pinahintulutan na maging WALI (consent) ng iba.
Kapag ang babae ay ikinasal na walang WALI o siya ang tumayong WALI sa sarili o sa ibang tao, ang nasabing kasal ay walang saysay (invalid) alinsunod sa naisalaysay mula sa Propeta ﷺ na kanyang winika: Sinumang ikinasal na babae na walang pahintulot mula sa kanyang WALI ay ang kanyang kasal ay BATIL (hindi tanggap), ang kanyang kasal ay BATIL (hindi tanggap), ang kanyang kasal ay BATIL (hindi tanggap).” Iniulat ni Imam Abu Dawuod at ang Hadith ay authentic ayon kay Shaikh Al-Albani
عن النبي ﷺ أنه قال : (أَيُّمَا امْرَأَةٍ نَكَحَتْ بِغَيْرِ إِذْنِ وَلِيِّهَا فَنِكَاحُهَا بَاطِلٌ ، فَنِكَاحُهَا بَاطِلٌ ، فَنِكَاحُهَا بَاطِلٌ) رواه أبو داود (1102) وصححه الألباني في " صحيح أبي داود " .
• Walang pinagkaiba ang kalagayan ng babaeng ikinasal na siya ay dalaga, matanda, balo o biyuda.
Binanggit ng Propeta ﷺ sa ibang salaysay: “Walang tanggap na kasal maliban lamang sa may Wali”
يقول ﷺ في الحديث الصحيح : لا نكاح إلا بولي”
• Ang pagtatalaga ng WALI (consent) ay mula sa batas ni Allâh at hindi sa kagustuhan ng sinuman!!
NARITO ANG PAGKAKASUNOD SUNOD NG WALI NG BABAENG IKAKASAL (consent):
A. AMA (hindi kabilang ang ina).
B. LOLO (ama ng kanyang ama) pataas.
C. ANAK NA LALAKI NASA TAMANG GULANG (hindi kabilang ang anak na babae).
D. KAPATID NA LALAKI SA AMA AT INA MULI AY ANG KAPATID NA LALAKI SA AMA. (hindi kabilang ang kapatid na babae).
E. PAMANGKIN NA LALAKI NA NASA TAMANG GULANG (anak ng kanyang kapatid na lalaki).
F. ANG KANYANG TIYO (kapatid ng kanyang ama), hindi kabilang ang tiya.
H. ANG ANAK NG KANYANG TIYO (pinsan niya sa ama), mga lalaki lamang.
Hindi maaaring ikasal ng malayong kamag-anak hangga’t mayroon pang mas malapit sa kanya ayon sa pagkakasunod-sunod nito maliban na lamang sa kapahintulutan nila.
Hindi maaaring ikasal ng lolo ang kanyang apo hangga’t mayroon pang ama at hindi maaaring ikasal ng anak ang kanyang ina hangga’t mayroon pang lolo.
Kaya, nararapat sundin ang pagkakasunod sunod nito at iuna ang malapit kaysa sa malayong kamag-anak maliban lamang kung ang WALI na malapit ay hindi maaaring tumayo sa mga kadahilanan pinahintulutan ng batas: (murang edad, hindi matuwid, hindi matagpuan o hindi makontak etc..).
Kapag wala ang mga sumusunod (mga WALI), ililipat ang WALI sa pinaka malapit na kamag-anak na lalaki.
Kung wala paring malapit na kamag-anak ay ililipat ang WALI sa malayong kamag-anak at kung wala parin ay ang pinunong Muslim sa lugar o ang husgado sa isang korte ang magiging WALI.
Tatayo ring WALI ang pinunong Muslim o husgado kapag ang isang bagong yakap sa Islam na babae ay siya lamang nag-iisang Muslim sa pamilya.
Ang importante ay pagsang-ayon ng WALI at kung hindi man siya makadalo sanhi ng karamdaman o mga kadahilanan ay maaari siyang magtalaga ng sinumang taong tatayo bilang kapalit niya!!
Kapag may naganap na kasalan na ang tanging nagbigay ng pahintulot ay ang kanyang ina at hindi nakuha ang pagsang-ayon ng kanyang ama sa kadahilanang ipinagkait ito sa kanya (tinanggalan ng karapatan), sila ay nagtampo sa kanya, dahil ang ama ay nagkulang ng kanyang tungkulin o sa tingin nila ay hindi ito papayag kung ipapaalam sa kanya, sa ganitong kalagayan ay kailangan ulitin ang nasabing kasal at ituwid dahil ang nasabing kasal ay hindi valid (hindi tanggap)!!
PAALAALA:
A. Ang babae lamang na ikakasal ang nangangailangan ng pahintulot ng WALI, at lalaking ikakasal ay hindi kailangan ang WALI.
B. Kung ikasal ang lalaki na walang nakadalo mula sa kanyang pamilya o kamag-anak, ang kanyang kasal ay tanggap (valid).
Ngunit kung makadalo naman ay siyang mainam upang magkaroon ng magandang ugnayan sa pagitan ng pamilya ng mag-asawa!!
C. Ang babaeng ipinanganak mula sa Zina (nabuntisan ang kanyang ina mula sa relasyong sekswal na hindi kasal) ay ang magiging WALI nito ay ang pinunong Muslim sa lugar.
Alinsunod sa sinabi ng Propeta ﷺ: ❝Ang pinuno (pinunong Muslim) ang magsisilbing WALI sa sinumang walang WALI.❞ Iniulat nila Imam Abu Dawoud at Tirmidhie at ang HAdith ay authentic ayon kay Shiekh Al-Albani
قول النبي ﷺ : ❞ السلطان ولي من لا ولي له ❝ رواه أبو داود ( ٢٠٨٣ ) والترمذي ( ١١٠٢ ) وصححه الألباني في صحيح أبي داود .
D. Kapag ang bansa o lugar ay walang namumunong Muslim ay maaaring tatayong Wali ang namumuno sa Islamic Center o ang Imam ng Masjid sa lugar.
E. Ang Wali (consent) ay sa pagitan lamang ng mga Muslim, kung ang ama ng babaeng Muslim ay hindi Muslim, sa ganitong kalagayan ay ililipat ang Wali sa pinaka malapit na kamag anak ng babae na Muslim at kung wala paring Muslim na kamag anak ay tatayong WALI ang pinuno ng lugar o di kaya ay ang husgado sa korte.
Gayundin hindi maaaring tumayong Wali ang ama na Muslim sa kanyang anak na Kristiyana, bagkus maaaring tatayong WALI sa kristiyanang babae ang kapatid nitong Kritiyano o sinumang malapit sa kanya na Kristiyano rin.
📚Sinulat at inipon ni Shiekh Zulameen Sarento Puti (hafidhahullâh)
____________________
🔎 (FaceBook | X | Instagram | YouTube | SnapChat | Google)
