https://issuu.com/vistadeaguila

Vista de Aguila, La Purisima Street, Zamboanga City (2026)

26/12/2025

BALIK-TANAW | G12 Titans, nasungkit ang ikalawang puwesto sa AtFest Debate Cup

Isinagawa ang Ateneo Fiesta (AtFest) Debate Cup noong ikasiyam ng Disyembre sa Gusaling Bellarmine-Campion, kung saan nagtipon ang mga kinatawan mula sa iba’t ibang Academic Organizations (AOs) upang magtagisan ng talino at husay sa isang serye ng mga debate.

Pinangunahan ni Ryan Tahamid, Chief Adjudication Panel (CAP), ang pangangasiwa sa kompetisyon, na nagbigay ng maayos at organisadong daloy ng mga debate sa buong paligsahan.

Mula sa mga pares na lumahok sa tatlong preliminary rounds, 12 ang umusad sa mga susunod na yugto ng kompetisyon. Ang mga pares na nagtala ng una hanggang ikaapat na ranggo sa preliminary round ay awtomatikong umabante sa semi-finals, habang ang natitirang kalahok ay dumaan sa elimination rounds upang mabuo ang mga maglalaban sa grand finals.

Kabilang sa mga nakapasa ang pares nina Jaden Barredo at Dale Peñano mula sa Baitang 12 (G12) Titans, na nagtala ng ikaapat na puwesto at awtomatikong umabante sa semi-finals. Nakapasok din sa susunod na yugto ang pares nina Chelzy Cepalon at Haleema Kho sa ikasiyam na puwesto, gayundin sina Amreigh Ahmad at Nigella Tan mula sa Baitang 11 (G11) Direwolves sa ika-12 puwesto.

Sa huling araw ng kompetisyon noong ika-10 ng Disyembre, nagpatuloy ang matibay na pagganap nina Barredo at Peñano hanggang sa makapasok sila sa grand finals. Umiikot ang pinal na mosyon sa positibong obligasyon ng isang tao sa isang estranghero, na nagbunga ng isang dikit at masusing laban. Kabilang sa mga hurado si Ali Umabong, kinatawan ng G12 Titans, na kinilala bilang ikatlong pinakamahusay na adjudicator.

Sa pagtatapos ng patimpalak, nagtapos ang pares nina Barredo at Peñano sa ikalawang puwesto. Bukod dito, kinilala si Barredo bilang pinakamahusay na mananalita sa grand finals.

Pinatunayan ng resulta ng kompetisyon ang halaga ng mahusay na pagtutulungan at compañerismo sa pagbubuo ng matitibay na argumento sa loob ng akademikong larangan.

Isinulat ni Ali King Umabong
Larawang Kuha ni Arreah Lim
Edit ni Riyo Pampora

25/12/2025

Maligayang Pasko, mga Atenista!

Sa araw na ito, ating ipinagdiriwang ang kapanganakan ni Hesus—ang pagsilang ng pag-asa, pagmamahal, at mga bagong simula. Ito ay panahon ng pagninilay at pasasalamat—pag-alala sa mga biyayang natanggap at pagbabahagi ng kabutihan sa kapwa. Nawa’y magsilbi itong paalala na sa mga simpleng gawa ng pag-unawa at malasakit, higit na nagiging makabuluhan ang tunay na diwa ng Pasko.

Habang nagsasama-sama ang bawat isa sa diwa ng pagkakaisa, nawa’y mapuno ang ating mga puso ng kapayapaan, saya, at pag-asa. Maligayang Pasko sa lahat, at nawa’y manatili ang liwanag ng panahong ito sa ating mga tahanan at puso—ngayon at sa mga darating pang araw.

Sa huli, taos-pusong nakikiisa ang Vista de Aguila sa pagbati ng Maligayang Pasko sa lahat.

Isinulat ni Allysa Cardoza
Disenyo ni Alexandria Ibrahim

24/12/2025

PULSO: Isang Ganap, Isang React!

Nakakapagod ang paghihintay, ngunit mas nangingibabaw ang saya. Kumusta kayo ngayong araw bago ang Pasko, mga Atenista? Handa na ba ang puso, tiyan, at mga regalo?

Ngayong ika-24 ng Disyembre 2025, ramdam na ramdam na ang diwa ng Pasko—mula sa tunog ng mga kampana at awitin, hanggang sa amoy ng handang pagkain na unti-unting niluluto sa bawat tahanan. Ang Bisperas ng Pasko ay isa sa mga okasyong hinihintay ng lahat. Kalakip nito ang saya ng salusalo, tawanan ng pamilya, at pananabik sa mga regalong matagal nang inaabangang buksan. Sa bawat mesa, may kwento. Sa bawat tawa, may pasasalamat.

Habang abala ang ilan sa paghahanda ng pagkain at dekorasyon, ang iba nama’y abala sa pagbuo ng mga mensahe—para sa pamilya, kaibigan, at oo, pati na rin sa isang espesyal na tao. Simpleng “Merry Christmas” man o mahabang pagbati, ang mahalaga ay nagmula ito sa puso.

Sa araw na ito, hindi kailangang maging engrande ang pagdiriwang. Sapat na ang sama-samang kainan sa isang munting tahanan, ang taos-pusong pagbibigayan, at ang paalalang sa gitna ng lahat ng pagbabago at pagsubok, ang Pasko ay patuloy na nagbubuklod sa atin. Higit sa lahat, ito ay araw ng tahimik na paghahanda at pasasalamat—sapagkat sa loob lamang ng ilang oras, ipagdiriwang na ang kapangakan ni Hesus.

Hali na’t makibahagi sa isang gabing puno ng liwanag, pag-asa, at pagmamahal. Isang mapayapa at makahulugang Bisperas ng Pasko, mga Atenista!

Isinulat ni Clea Marie Filoteo
Disenyo ni Alexandria Ibrahim

24/12/2025

BALIK-TANAW | Sa Gitna ng Nota at Paghinga

Ang Tinig ng G12 Titans at SHS sa Entablado
Sa tanaw ni: Marshella Mae Ong

Hindi palakpakan ang unang narinig ng mga banda, kundi ang mga tanong na sabay-sabay umusbong sa pagitan ng paghinga at pag-asa—“Totoo ba?”, “Kakayanin ba?”

Sa isang gabing puno ng tugtugin at talento, ang pagbanggit sa pangalan ng Baitang 12 (G12) Titans bilang kabilang sa Top 3 ng Banda Batalia ng Ateneo Fiesta 2025 ay wari’y isang himig na naglalakbay sa hangin—mailap kapain, hindi agad mapaniwalaan. Hindi ito bunga ng kakulangan ng tiwala, kundi ng hayag na husay ng mga bandang nauna at kasabay nilang humabi ng musika sa entablado.

Sa likod ng maningning na ilaw, nanahan ang mga salaysay ng pagod na piniling yakapin kaysa talikuran. Ayon sa banda ng Titans, ang kanilang paglalakbay ay hinubog ng magkakapatong na pagsubok—ng mga oras na isinakripisyo ang pahinga alang-alang sa ensayo, at ng mga araw na halos sumuko ang katawan.

Gayunpaman, sa gitna ng lahat, nanatiling buo ang kanilang sandigan: ang compañerismo—ang pagkakaisang hindi humihiwalay sa indibidwal na lakas, kundi higit pang nagpapatibay rito. Wari pa ng grupo, pag-akyat nila sa entablado, ang bigat ng sakripisyo ay unti-unting naglaho, pinalitan ng sigla, lakas ng loob, at determinasyong ipamalas ang pinakamahusay na anyo ng kanilang musika.

Ang awiting tinugtog ay hindi lamang koleksiyon ng mga nota at liriko, kundi isang kolektibong paninindigan. Taglay nito ang mensahe ng pagkakaisa sa kabila ng mga hamong hindi maiiwasan—isang temang umaayon sa diwa ng Ateneo Fiesta, kung saan ang sining ay nagiging daluyan ng pagkakapit-bisig at pagbubuklod ng pamayanan. Ang mga kantang itinanghal ng banda ay isang paalala na sa gitna ng pagkabasag at pangamba, may lakas sa paniniwala sa sarili at sa isa’t isa—isang diwang patuloy na hinuhubog sa kabataang Atenista.

Sa huli, hindi lamang ang tagumpay ng G12 Titans ang ipinagdiwang, kundi ang kolektibong lakas ng Mataas na Paaralang Senior (SHS). Ang pagkilala sa Best Drummer mula sa Baitang 11 (G11) Direwolves at ang Best Keyboard Player mula sa G12 Titans ay patunay na ang kahusayan ay hindi ikinukulong ng antas o baitang, at ang musika ay umuusbong sa diwa ng pagtutulungan. Sa halip na indibidwal na tagumpay, ang bawat parangal ay naging bunga ng sama-samang paglalakbay.

Sa pagitan ng mga nota, palakpak, at sandaling paghinga, nahubog ang isang malinaw na katotohanan: ang musika ng kabataan ay hindi lamang nililikha upang pakinggan, kundi upang damhin, paniwalaan, at pagsaluhan. At sa entabladong iyon, ang SHS ay hindi lamang nakilahok—nangibabaw.

Larawang Kuha ni Kylie Isahac
Edit ni Riyo Pampora

24/12/2025

BALIK-TANAW | AtFest Day 5, pinagtagpo ang akademya, kalusugan, musika

Ginanap ang ikalimang araw ng Ateneo Fiesta (AtFest) 2025 noong ika-11 ng Disyembre kung saan magkasabay na isinagawa ang iba’t ibang programang tumalakay sa akademiko, pisikal, at malikhaing aspeto ng buhay-Atenista.

Nagsimula ang umaga sa pagtatanghal ng BAELS Research Summit na sinundan naman ng FS Appreciation Day, na nagbigay-pagkilala sa dedikasyon at serbisyo ng mga kawani ng unibersidad. Isinagawa rin ang “Tinta’t Tinig: The Ateneo Campus Journalism Cup”, kung saan ipinamalas ng mga kalahok na mamamahayag ang kanilang kasanayan sa pagsulat at pagsasalita.

Habang nagpapatuloy ang mga talakayan at palihan, isinagawa rin sa kampus ang AtFest Fitness Challenge, —isang pagtitipon na nakatuon sa pagninilay at personal na paghubog—at ang mga larong hatid ng Minute to Win It na bukas para sa buong komunidad.

Nagsilbi namang panimula sa pinakahihintay na gabi ang meet and greet kasama si Earl Agustin noong umaga, na agad umani ng pananabik mula sa mga Atenistang tagahanga. Pagsapit ng gabi, tuluyang umangat ang selebrasyon sa “Intimo: Ateneo Music Festival 2025” — ang tampok na kaganapan ng araw na pinangunahan ng artistang si Earl Agustin — isang gabing puno ng musika, hiyawan, at sabayang pag-awit ng buong komunidad.

Isinulat ni Samantha Jamolod
Larawang Kuha ni Kristienne Diu
Edit ni Riyo Pampora

24/12/2025

BALIK-TANAW | Pagtutok sa talento, talino, galing, umarangkada sa AtFest Day 4

Masiglang umusad ang ikaapat na araw ng Ateneo Fiesta (AtFest) 2025 noong ika-10 ng Disyembre, na puno ng iba’t ibang aktibidad para sa larangan ng isports, sining, talakayan, at pakikipag-ugnayan ng komunidad— mula umaga hanggang gabi, umikot ang selebrasyon sa pagpapamalas ng husay at diwa ng compañerismo ng mga Atenista.

Maagang nagbukas ang araw sa pagdaraos ng AtFest Sports Finals, kung saan nagtagisan ng lakas at galing ang mga atleta mula sa iba’t ibang Academic Organizations (AOs).

Kasabay nito, isinagawa ang Project Suga Community Turnover, kung saan naghatid ng ilaw ang komunidad ng AdZU sa Simariki Island bilang bahagi ng patuloy na adbokasiya na samahan ang mga katuwang na pamayanan sa pagtataguyod ng sama-samang pag-asa.

Nagpatuloy ang daloy ng aktibidad sa Terno Con Exhibit at AtFest Debate Cup Finals, na nagbigay-daan sa pagpapakita ng talino at kritikal na pag-iisip ng mga kalahok.

Samantala, napuno ng sigla ang kampus sa Grade School Kids Fun Day, kung saan nagsama-sama ang mga kabataan at g**o sa iba’t ibang laro at aktibidad.

Umigting ang hapon sa pagsasagawa ng AtFest Pop Quiz Bowl at pagbubukas ng Imahe Ateneo Exhibit, na nagbigay-diin sa pagpapahalaga sa talino at sining ng pamantasan.

Pagsapit ng hapon, lumiyab ang kompetisyon sa AtFest E-Sports Finals, na sinundan ng sports finals ng basketball at volleyball, na umani ng suporta mula sa mga manonood.

Bilang pagtatapos ng araw, pinuno ng musika ang kampus sa Noches de Canciones: The Ateneo Fiesta Open Mic Series, kung saan malayang naipamalas ng mga kalahok ang kanilang talento sa musika.

Isinulat ni Mhadina Muarip
Larawang Kuha ni Ella Rivera
Edit ni Riyo Pampora

24/12/2025

BALIK-TANAW | Bailes Ateneo, ibinida sa AtFest ‘25

Isa sa mga tampok na aktibidad ng Ateneo Fiesta (AtFest) 2025 ang Bailes Ateneo: The Ateneo Fiesta 2025 Dance Sports Competition, kung saan nagtagisan ng husay ang iba’t ibang Academic Organizations (AOs) sa mga kategoryang Modern Standard at Latin American dance sports.

Lahat ng AOs ay nagpakitang-gilas, tangan ang determinasyon at compañerismo na nagbigay-kulay at sigla sa kompetisyong ginanap sa Multi-Purpose Covered Courts (MPCC) 1, noong ikasiyam ng Disyembre.

Sa huli, nasungkit ng Junior High School (JHS) Falcons ang kampeonato sa parehong kategorya, sinundan ng Accountancy Academic Organization (AAO) Tigers sa ikalawang puwesto, habang pumangatlo naman ang Nursing Academic Organization (NAO) Angels sa dalawang kategorya.

Isinulat ni Ashley Mexel Planas
Larawang Kuha ni Ella Rivera, Jasmine Sterling
Edit ni Riyo Pampora

24/12/2025

BALIK-TANAW | Pamamayagpag ng kahusayan, pagkatuto, serbisyo, itinatampok sa AtFest Day 3

Ipinagpatuloy ang masiglang pagdiriwang ng Ateneo Fiesta (AtFest) 2025 sa ikatlong araw nito noong ikasiyam ng Disyembre, kung saan ibinida sa buong araw ang kahulugan ng compañerismo sa isang matagumpay na pagdaraos ng selebrasyon sa mga aktibidad na nagbigay-kulay sa talento, talino, at kasanayan ng mga mag-aaral.

Unang bumungad sa araw na ito ang Ateneo Masterchef, kung saan ipinamalas ng mga kalahok mula sa iba’t ibang Academic Organizations (AOs) ang kasiningan at kahusayan sa paghahanda ng mga putahe na may kaugnayan sa tema ng pista.

Kasabay nito, napuno ng katuwaan ang kampus sa pagdaraos ng Kids Fun Day para sa mga mag-aaral ng Paaralang Elementarya ng Pamantasang Ateneo de Zamboanga.

Samantala, patuloy na nagpakita ng galing at tikas ang mga manlalaro sa AtFest Sports Semi-Finals mula umaga hanggang hapon, kabilang ang basketball, volleyball, at iba pa.

Namayagpag naman ang diwa ng paglilingkod at kabutihang-loob sa pagkakaroon ng legal at medikal na serbisyo para sa komunidad ng Ateneo.

Naging oportunidad din ito para sa mga kalahok ng AtFest Debate Cup upang ipakita ang kanilang kakayahan sa analitikal na pag-iisip, pangangatwiran, at pagpapatibay ng kanilang panig, kasama ang pagpapakita ng tiwala sa sarili.

Patuloy ang pagpapaunlad ng mga mag-aaral sa kanilang kaalaman sa iba’t ibang kasanayan sa pakikilahok sa AtFest LearnFest: The Ateneo Fiesta Workshop Series, na naglalayong magbigay ng karagdagang karunungan sa mga kalahok.

Nagbigay-buhay naman ang mga mananayaw sa kampus sa pagdaraos ng kaganapang “Bailes Ateneo: The Ateneo Fiesta 2025 Dancesports” sa hapon, kung saan ipinamalas nila ang kanilang mga sayaw kasabay ng ritmo ng musika.

Umigting ang gabi nang nagsimula ang pagtatanghal ng mga kalahok mula sa iba't ibang AOs ng kapanapanabik na kompetisyon “Hiyaw Ateneo: Yell Competition” at “Indak Ateneo: The Ateneo Fiesta 2025 Pop Dance Competition”, na itinampok ang pagtutulungan, pagsisikap, at determinasyon ng bawat kalahok.

Himig at ritmo ng musika ang nadama sa kampus sa “Noches de Canciones: The Ateneo Fiesta Open Mic Series,” bilang pagtatapos sa araw kung saan ipinamalas ng mga mag-aaral ang kanilang galing sa musika.

Layunin ng ikatlong araw ng pagdiriwang na patibayin ang ugnayan at pagkakaisa ng komunidad ng Ateneo, habang binibigyang-pansin ang pagbabahagi ng kahusayan at aktibong pakikilahok ng mga mag-aaral at pagsasabuhay ng tunay na diwa ng compañerismo.

Isinulat ni Rayyana Reem S. Pandaog
Larawang Kuha ni Jasmine Sterling, Kristienne Diu
Edit ni Riyo Pampora

24/12/2025

BALIK-TANAW | INDAK ATENEO: Compañerismo sa bawat galaw

Isinagawa ang Indak Ateneo noong ikasiyam ng Disyembre sa Multi-Purpose Covered Courts (MPCC) 1 bilang isa sa mga tampok at inaabangang kompetisyon ng Ateneo Fiesta (AtFest) 2025.

Umani ng palakpakan ang entablado ng Indak Ateneo matapos ipamalas ng iba’t ibang academic organizations (AOs) ang kanilang husay, dedikasyon, at koordinasyon sa kani-kanilang inihandang sayaw.

Higit pa sa kompetisyon, nahayag sa bawat pagtatanghal ang diwa ng compañerismo kung saan nagniningning ang galing ng bawat isa at naging mas makabuluhan ang kilos ng bawat mananayaw sapagkat ito ay isinagawa para sa iisang layunin—ang ipakita ang lakas ng sama-samang pagkilos at pagtutulungan ng komunidad ng Ateneo.

Pinagtibay ng Indak Ateneo ang halaga ng oras, pagsisikap, at disiplina na iginugol ng mga kalahok para sa kanilang pagtatanghal.

Sa pagtatapos ng kompetisyon, kinilala ang mga nagwaging AOs, kung saan hinirang na Kampeon ang Accountancy Academic Organization (AAO), sinundan ng Junior High School bilang First Runner-Up, at Science, Information Technology, and Engineering Academic Organization (SITEAO) bilang Second Runner-Up. Kasabay nito, binigyang-pagkilala rin ang lahat ng lumahok na naging bahagi ng matagumpay at makabuluhang pagdaraos ng Indak Ateneo bilang bahagi ng AtFest 2025.

Isinulat ni Samantha Jamolod
Larawang Kuha ni Kyra Flores, Miguel Cudal
Edit ni Riyo Pampora

23/12/2025

BALIK-TANAW | Hiyaw Ateneo ‘25 umarangkada; Sigaw ng Direwolves at Titans, umalingawngaw

Bilang bahagi ng Ateneo Fiesta (AtFest), ginanap ang taunang kompetisyon na “Hiyaw Ateneo: The Ateneo Fiesta Yell Competition” noong ikasiyam ng Disyembre 2025 sa Multi-Purpose Covered Courts (MPCC) 1, na dinaluhan ng mga kinatawan mula sa iba’t ibang Academic Organizations (AOs).

Sa siyam na grupong kalahok, ang Baitang 12 (G12) Titans ang huling nagtanghal ng kanilang hiyaw, at dahil sa kanilang pinatinding na sigasig at kahanga-hangang pagpapakitang-gilas, muling nasungkit ng G12 Titans ang ikatlong puwesto—ang kanilang back-to-back placement mula sa Hiyaw Ateneo 2024.

Sa isang eksklusibong panayam kay Jarell Jay Alfaro, ang “point person” ng G12 Titans Hiyaw, inilahad niya na nakaramdam siya ng lubos na kasiyahan at pagpapasalamat sa mga pagsisikap ng kaniyang mga kasamahan, lalo na’t ito na ang kanilang huling AtFest bilang Titans.

“Parati ko sa kanila sinasabi to enjoy the moment and to really feel the essence of Ateneo Fiesta because this is our last AtFest as Grade 12 Titans.” aniya.

Ibinahagi rin ni Alfaro na humarap ang kanilang grupo ng ilang hamon, gaya ng hindi pagkakaunawaan at kalituhan, ngunit nalampasan nila ang mga ito sa pamamagitan ng maayos na komunikasyon at pananagutan bilang isang grupo, alinsunod sa kanilang paniniwalang, “We are one family.”

Sa kabilang dako, hindi naman nagpatinag ang Baitang 11 (G11) Direwolves kung saan ipinamalas nila ang kahusayan, disiplina, at pagkakaisa sa kanilang pagtatanghal, na nagbigay-diin sa kanilang kakayahang makipagsabayan sa iba pang mga kalahok sa kompetisyon.

Samantala, itinanghal na first runner-up ang Accountancy Academic Organization (AAO) habang kinoronahan na kampeon ang Nursing Academic Organization (NAO).

Nagsilbi ang “Hiyaw Ateneo: The Ateneo Fiesta Yell Competition” bilang plataporma upang maipamalas ng mga mag-aaral ang kanilang talento, disiplina, at pagkakaisa habang pinatitibay ang diwa ng pakikilahok at pagmamahal sa komunidad ng Ateneo.

Isinulat ni Al-suwaidi Asanji
Larawang Kuha ni Kyra Flores
Edit ni Riyo Pampora

23/12/2025

BALINTATAW | Matang Nagmamanman, Sa Bawat Sulok ng Paaralan

Inilunsad ang iba’t ibang aktibidad sa ikalawang araw ng Ateneo Fiesta (AtFest) 2025, na nagbuklod sa buong komunidad upang ipagdiwang ang diwa ng compañerismo at kasiyahan.

Tampok noong ikawalo ng Disyembre 2025 ang semi-finals ng iba’t ibang larong sports, kung saan damang-dama ang sigla at pakikibahagi ng mga mag-aaral sa bawat laban. Sa larangan naman ng pagkakaisa at pagtutulungan, isinagawa ang Ateneo Century Tree Planting Activity at ang AtFest Community Mass, na nagbigay-diin sa kahalagahan ng pangangalaga sa kalikasan at espiritwal na pagsasama-sama ng komunidad.

Para sa mga mahilig sa malikhaing pagpapahayag at sining, punong-puno ng talento ang campus sa AtFest Filipino Inter-School Patimpalak, Fusion Fest: CosPop Craze, Noches de Canciones: The AtFest Open Mic Series, at Coro Ateneo: Chorale Competition. Mula sa masining na pagkukuwento, makukulay na cosplay performances, kantang bumabalot sa puso, hanggang sa kahanga-hangang pagkakakanta ng mga koro—lahat ng ito ay nagpakita ng talento at imahinasyon ng mga mag-aaral.

Sa mga naunang araw ng AtFest, damang-dama na ang pananabik at kasiglahan ng mga mag-aaral sa bawat aktibidad, at lalo pang tumitindi ang damdaming ito sa mga susunod pang araw.

Kaya naman, mga ka-VDA, balikan natin ang mga kaganapan sa ikalawang araw ng AtFest 2025, at damhin muli ang saya, talento, at enerhiyang bumalot sa buong kampus!

Isinulat ni Emissa Abdulkadir
Ibinalita ni Savina Patrimonio
Bidyo nina Jacob Lim, Bella Rivera
Pag-edit ni Dan Caira Unok

23/12/2025

BALIK-TANAW | Pananampalataya, kultura, sining sa ikalawang araw ng AtFest ‘25

Inilunsad ang ikalawang araw ng Ateneo Fiesta (AtFest) 2025 noong ikawalo ng Disyembre, kasabay ng pagdiriwang ng Pista ng Immaculada Concepcion, kung saan isinagawa ang iba’t ibang programang tumampok sa pananampalataya, kultura, sining, at palakasan ng komunidad ng Ateneo.

Maagang pinangunahan ang araw ng AtFest Sports Semi-Finals at ng Ateneo Century Tree Planting Activity, na sumasalamin sa adbokasiya ng pamantasan para sa pangangalaga ng kalikasan. Isinagawa rin ang AtFest Filipino Inter-School Patimpalak, na nagbigay-puwang sa husay at talino ng mga mag-aaral mula sa iba’t ibang paaralan.

Sa gitna ng pagdiriwang, nagtipon ang komunidad sa University Church of the Sacred Heart of Jesus kung saan ginanap ang Ateneo Fiesta Community Mass sa pangunguna nina Fr. Guillrey Anthony M. Andal, SJ at Fr. Bert Boholst, SJ bilang paggunita sa Pista ng Immaculada Concepcion—ang pinagmulan ng taunang pagdiriwang ng Ateneo Fiesta. Sa homiliya, binigyang-diin ang halimbawa ni Birheng Maria bilang huwaran ng pananampalataya at paglilingkod, at hinikayat ang buong komunidad ng Ateneo na isabuhay ang diwa ng compañerismo at pagkakaisa sa pang-araw-araw na pamumuhay bilang bahagi ng buhay-Atenista.

Nagpatuloy ang kasiyahan sa Fusion Fest: CosPop Craze na nagbigay-buhay sa kampus sa pamamagitan ng malikhaing cosplay at pop culture expressions. Sa pagtatapos ng araw, umani ng palakpakan ang “Noches de Canciones: The Ateneo Fiesta Open Mic Series” at ang “Coro Ateneo: Chorale Competition”, kung saan itinampok ang talento ng mga Atenista sa musika at pagtatanghal.

Isinulat ni Samantha Jamolod
Larawang Kuha ni Ella Rivera
Edit ni Riyo Pampora

Vista de Aguila

26/12/2025

25/12/2025

24/12/2025

24/12/2025

24/12/2025

24/12/2025

24/12/2025

24/12/2025

24/12/2025

23/12/2025

23/12/2025

23/12/2025

Address

Website

Alerts

Contact The Business

Shortcuts

Share

Category