20/05/2026
ایبٹ آباد / ضلع ایبٹ آباد کی امن کمیٹی کے ڈی پی او کی سربراہی میں ہونے والے اجلاس میں محرم الحرام کے جلوس اور دیگر عوامل سے متعلق انتہائی اہم اور کلیدی فیصلے کئے گئے۔ دو ٹوک اعلان کیا گیا کہ محرم الحرام کے جلوس کا روٹ سابقہ ہی ہو گا۔ کوئی نیا جلوس اور مجلس نہیں ہو گی۔ یوم عشور کا جلوس, 10محرم الحرام کو حسب روایت مقررہ وقت اور راستوں سے گزرے گا۔ امن و امان اور محرم الحرام کے حوالے سے منعقدہ اجلاس میں ڈسٹرکٹ خطیب مفتی حمید الرحمن، پیر آف طوری شریف سید کمال حسین شاہ، امن کمیٹی کے ممبران سید فرمان شاہ،، شوکت ہارون خان جدون، اہل تشیع کے رہنما غلام حسین بنگش، سید علی رضا شاہ،نذر خان جدون، تاجر رہنماؤں و قائدین سردار شاہنواز، سردار شیر دل، مفتی جعفر مقبول طیار، بنارس عباسی، رشید لودھی، شہزاد گل، عبدالحمید خان جدون، شبیر قریشی، ممتاز خان اور دیگر بھی موجود تھے، میڈیا کی طرف سے نمائندگی پریس کلب کے صدر سردار نوید عالم، پریس کلب کے سابق صدر راجہ محمد ہارون اور سابق جنرل سیکرٹری سردار شفیق نے کی۔ اجلاس کے شرکاء نے اس بات پر اتفاق کیا کہ محرم الحرام کے جلوس اور دیگر انتظامات ماضی کے اصول، روٹ اور جلوس کے مطابق ہوں گے، شہر کے امن کو برقرار رکھنے کے لئے پولیس اور قانون نافذ کرنے والے اداروں سے مکمل تعاون کیا جائے گا۔ پولیس کی ہر ممکن مدد یقینی بنائی جائے گی۔
