07/08/2026
🚨 بریکنگ نیوز | کوہاٹ بورڈ کا امتحانی فراڈ بے نقاب
کوہاٹ بورڈ آف انٹرمیڈیٹ اینڈ سیکنڈری ایجوکیشن نے انٹر سالانہ امتحان اول 2026 کے دوران مبینہ امتحانی بے ضابطگی کے ایک اہم کیس کا انکشاف کیا ہے۔
بورڈ کی جاری کردہ ابتدائی تحقیقات کے مطابق ضلع کرک کے گورنمنٹ ہائیر سیکنڈری سکول شاہ سلیم میں قائم مردانہ امتحانی مرکز سے متعلق ایسے شواہد سامنے آئے ہیں جن سے منظم امتحانی فراڈ کا شبہ ظاہر کیا گیا ہے۔
رپورٹ کے مطابق ایک پری میڈیکل سیکنڈ ایئر طالب علم کی جوابی کاپیوں میں غیر معمولی تبدیلیوں کے آثار ملے ہیں۔ جدید فرانزک اور تکنیکی جانچ کے دوران بعض کاپیوں کے اندرونی صفحات تبدیل ہونے، صفحات کے رنگ میں فرق اور دو مختلف انداز کی ہینڈ رائٹنگ جیسے شواہد سامنے آئے، جن کی مزید چھان بین جاری ہے۔
کوہاٹ بورڈ کا کہنا ہے کہ ابتدائی شواہد کی روشنی میں امتحانی عملے، متعلقہ ادارے کے ذمہ داران، ریزیڈنٹ انسپکٹر، طلبہ، والدین اور دیگر ممکنہ متعلقہ افراد کو تحقیقات میں شامل کیا جا رہا ہے۔
بورڈ نے واضح کیا ہے کہ امتحانی نظام کی شفافیت، میرٹ اور انصاف پر کسی قسم کا سمجھوتہ نہیں کیا جائے گا۔ اگر تحقیقات میں کسی بھی فرد کا کردار ثابت ہوا تو اس کے خلاف قانون کے مطابق کارروائی عمل میں لائی جائے گی۔
واضح رہے کہ یہ تمام تفصیلات ابتدائی تحقیقاتی رپورٹ پر مبنی ہیں، جبکہ حتمی فیصلہ مکمل تحقیقات اور قانونی کارروائی کے بعد کیا جائے گا۔
