27/09/2026
ایوب ٹیچنگ ہسپتال کی سیکیورٹی کی بروقت کارروائی موبائل چوری میں ملوث نوجوان گرفتار
ایوب ٹیچنگ ہسپتال میں موبائل فون چوری کے حالیہ واقعات پر ہسپتال کی سیکیورٹی ٹیم نے بروقت کارروائی کرتے ہوئے ایک نوجوان کو گرفتار کرلیا۔
تفصیلات کے مطابق گزشتہ چند روز کے دوران ایوب ٹیچنگ ہسپتال میں موبائل فون چوری کے بعض واقعات رپورٹ ہوئے، جن کا نوٹس لیتے ہوئے ہسپتال کی سیکیورٹی ٹیم نے سی سی ٹی وی کیمروں کی مدد سے مشتبہ شخص کی شناخت کی اور اسے حراست میں لے لیا۔
گرفتار نوجوان کو مزید قانونی کارروائی کے لیے ایوب ٹیچنگ ہسپتال کی چوکی میں تعینات پولیس اہلکاروں کے حوالے کر دیا گیا ہے۔
ہسپتال انتظامیہ کے مطابق ایوب ٹیچنگ ہسپتال کی سیکیورٹی ٹیم مریضوں، ان کے لواحقین اور ہسپتال آنے والے دیگر افراد کے تحفظ کے لیے 24/7 متحرک رہتی ہے۔ سیکیورٹی عملہ ہسپتال میں امن و امان برقرار رکھنے چوری سمیت دیگر واقعات کی روک تھام اور کسی بھی ہنگامی صورتحال سے نمٹنے کے لیے ہمہ وقت تیار رہتا ہے۔
انتظامیہ نے مریضوں اور ان کے لواحقین سے بھی اپیل کی ہے کہ وہ اپنے قیمتی سامان اور موبائل فونز کی حفاظت کا خصوصی خیال رکھیں اور کسی بھی مشکوک سرگرمی کی صورت میں فوری طور پر سیکیورٹی عملے کو اطلاع دیں۔
