07/06/2025
تمام عاشقان رسول کو عیدالاضحیٰ مبارک
اللَّهُمَّ صَلِّ عَلٰى سَيِّدِنَا مُحَمَّدٍ وَّعَلٰى آلِهِ وَصَحْبِهِ وَبَارِكْ وَسَلِّمْ
عید کے دن خداوند قدوس کی بارگاہ میں دعا
اے ہمارے رب، اے کریم و رحیم مولا
آج عیـــؔـدالاضـحـــؔـی مبـــؔـارکـــؔـ کا دن ہے،
ہم تیری بارگاہ میں تیرے محبوب کریم صلی اللہ علیہ وسلم کے صدقے، ان کے وسیلے سے،
دستِ دعا دراز کرتے ہیں۔
یا اللہ!امتِ محمدیہ کے تمام مرد و خواتین کی مغفرت فرما،
ان کی نمازیں، قیام، رکوع و سجدے، تلاوت و ذکر اور دعائیں،
سب عبادات کو اپنی بارگاہ میں شرفِ قبولیت عطا فرما۔
اے بخشنے والے پروردگار! ہماری کوتاہیوں، لغزشوں، غفلتوں اور گناہوں کو معاف فرما، ہمیں علم نافع، عمل صالح،
دل کی پاکیزگی، زبان کی صداقت، اور تیری دائمی رضا نصیب فرما۔
یا رب العالمین! جو تنگدست ہیں، ان کے رزق میں کشادگی فرما،
جو بیمار ہیں، انہیں کامل شفا عطا فرما،جو پریشان حال ہیں،
ان کے حالات سنوار دے، جو دکھ و غم میں ہیں، ان کے دلوں کو راحت و اطمینان عطا فرما،
جو اولاد کے متمنی ہیں، انہیں صالح،
نیک سیرت، آنکھوں کی ٹھنڈک بخشنے والی اولاد عطا فرما۔
یا اللہ! جن گھروں میں ناچاقی،
بے برکتی اور بے سکونی ہے،
ان میں محبت، الفت، رزق اور نورِ ایمان داخل فرما،
ہماری جھولیاں اپنی عطاؤں،
رحمتوں، کامیابیوں اور نعمتوں سے بھر دے۔
اے ربِ کریم! دنیا بھر کے مظلوم مسلمانوں پر رحم فرما،
ان کی بے بسی کو طاقت، ان کی پکار کو قبولیت،
اور ان کے لیے عزت، آزادی اور مسرت کی راہیں کھول دے،
خصوصاً فلسطین اور کشمیر اور ہر مظلوم خطے کے اہلِ ایمان کو اپنی خاص مدد و نصرت سے سرفراز فرما۔
اے ربِ ذوالجلال! تجھے واسطہ ہے اپنے محبوب مصطفیٰ صلی اللہ علیہ وسلم کا،
سارے صحابہ کرام رضی اللہ عنہم،
اہلِ بیتِ اطہار و ازواجِ مطہرات رضی اللہ عنہم،
اور تیرے جلیل القدر اولیاء،
بالخصوص سیدنا غوث الاعظم شیخ عبدالقادر جیلانی قدس سرہ کے صدقے سے،
ہمیں اپنی رحمتِ خاص، قربِ خاص اور نعمتِ خاص سے نواز دے۔
آمین یارب العالمین
وصلِّی اللّٰہ على سيدنا محمدٍ وآله وأصحابه أجمعين
