19/05/2022
___
➖➖➖➖➖➖➖
*علم کے ساتھ ساتھ عقل بھی کارآمد ہے*
➖➖➖➖➖➖➖
*دہلی میں ایک صاحب کی اہلیہ تھیں ، جو بار بار اپنے میکے جاتیں ، شوہر نے صورت حال سے تنگ آکر ایک دن کہا کہ اگر آئندہ تم اپنے باپ کے گھر گئیں تو تمہارے پر طلاق ۔*
*اتفاقًا اس عورت کے والد کا انتقال ہوگیا ، اب اگر یہ گھر جائے تو طلاق واقع ہو ، نہ جائے تو یہ ایک اور مصیبت ۔*
*شوہر شاہ عبدالعزیز رحمۃ اللہ علیہ سے مسئلہ پوچھنے کے لیے آیا ، اس وقت قاضی ثناء اللہ پانی پتی رحمۃ اللہ علیہ بھی شاہ صاحب کی خدمت میں موجود تھے ۔*
*شاہ صاحب رحمۃ اللہ علیہ نے مسئلہ سُن کر فرمایا کہ اگر تمہاری اہلیہ اپنے گھر گئیں تو طلاق ضرور پڑجائے گی ۔*
*شوہر یہ جواب سن کر رونے پیٹنے لگا ۔*
*قاضی صاحب رحمۃ اللہ علیہ نے بڑے ادب کے ساتھ عرض کیا کہ حضرت ! میرا تو خیال یہ ہے کہ طلاق واقع نہ ہوگی ، کیونکہ باپ کی وفات کے بعد وہ باپ کا گھر رہا ہی نہیں ، بلکہ بھائیوں کا گھر ہوگیا ، جب کہ وقوع ِ طلاق کی شرط باپ کے گھر جانا تھا ۔*
*شاہ صاحب رحمۃ اللہ علیہ نے باوجودیکہ استاذ تھے ، اپنے شاگرد کے اس اختلاف و نکتہ آفرینی کو بہت سراہا اور دل سے قبول کیا ۔*
*روایت : مولانا انظر شاہ رحمۃ اللہ علیہ*
*علمی ادبی تاریخی جواہر پارے جلد 1 ، ص : 223*
*مرتب : مولانا نعیم الدین*
➖➖➖➖➖➖➖
___
