06/05/2026
کمشنر بہاولپور ڈویژن عرفان علی کاٹھیا کی زیر صدارت ”بنیان المرصوص، معرکہ حق“ کے ایک سال مکمل ہونے کے سلسلے میں تقریبات کے انعقاد کے حوالے سے ایک اہم اجلاس کمشنر آفس بہاولپور میں منعقد ہوا، جس میں یومِ تاسیس کو بھرپور قومی جذبے اور منظم انداز میں منانے کے لیے جامع حکمت عملی اور انتظامات کا تفصیلی جائزہ لیا گیا۔اجلاس میں وائس چانسلر اسلامیہ یونیورسٹی پروفیسر ڈاکٹر محمد کامران، ایڈیشنل کمشنر جنرل خضر حیات منج، ایڈیشنل کمشنر کوآرڈینیشن ڈاکٹر نیئر مصطفیٰ، ایڈیشنل ڈپٹی کمشنر ہیڈکوارٹر ڈاکٹر عائشہ خان، اسسٹنٹ کمشنر بہاولپور سٹی اقرا مبین سمیت ایجوکیشن، ہائر ایجوکیشن (کالجز)، پولیس، میونسپل کارپوریشن، ریسکیو 1122 اور دیگر متعلقہ محکموں کے افسران نے شرکت کی۔کمشنر عرفان علی کاٹھیا نے اجلاس سے خطاب کرتے ہوئے کہا کہ ”بنیان المرصوص، معرکہ حق“ پاکستان کی عسکری تاریخ کا ایک اہم اور سنہری باب ہے جسے قومی سلامتی کے تحفظ اور دشمن کی جارحیت کے منہ توڑ جواب کے طور پر یاد رکھا جائے گا۔ انہوں نے کہا کہ اس عظیم کامیابی کو ایک سال مکمل ہونے پر ڈویژن بھر میں باوقار، منظم اور بھرپور تقریبات منعقد کی جائیں گی تاکہ قومی یکجہتی، حب الوطنی اور ملی شعور کو مزید فروغ دیا جا سکے۔انہوں نے ہدایت کی کہ سرکاری و نجی تعلیمی اداروں میں خصوصی تقریبات، سیمینارز، تقاریر، ملی نغموں، ٹیبلوز اور دیگر پروگرامز کا انعقاد یقینی بنایا جائے تاکہ نوجوان نسل کو قومی تاریخ، افواجِ پاکستان کی قربانیوں اور ملکی دفاع کے تقاضوں سے آگاہ کیا جا سکے۔ کمشنر نے کہا کہ تعلیمی ادارے نئی نسل میں قومی جذبہ بیدار کرنے میں کلیدی کردار ادا کرتے ہیں، اس لیے ان کی بھرپور شرکت ناگزیر ہے۔اجلاس میں فیصلہ کیا گیا کہ تقریبات میں مختلف شعبہ ہائے زندگی سے تعلق رکھنے والے افراد، سول سوسائٹی، طلبہ، اساتذہ اور معززین شہر کی شرکت کو یقینی بنایا جائے گا۔ اس موقع پر سیکیورٹی، ٹریفک مینجمنٹ اور صفائی ستھرائی کے مؤثر انتظامات کرنے کی بھی ہدایات جاری کی گئیں۔ پولیس اور ریسکیو 1122 کو ہنگامی صورتحال سے نمٹنے کے لیے الرٹ رہنے اور مربوط حکمت عملی اختیار کرنے کی تاکید کی گئی۔کمشنر بہاولپور نے متعلقہ محکموں کو باہمی رابطہ مزید مضبوط بنانے اور تمام انتظامات بروقت مکمل کرنے کی ہدایت کرتے ہوئے کہا کہ یومِ تاسیس کی تقریبات کو منظم، باوقار اور یادگار بنایا جائے تاکہ قومی یکجہتی اور حب الوطنی کا پیغام عام ہو اور شہریوں میں ملک و قوم کے لیے جذبہ فخر مزید مستحکم ہو۔اجلاس کے اختتام پر مختلف محکموں کے افسران نے اپنی تیاریوں اور مجوزہ پروگرامز کے حوالے سے بریفنگ دی جبکہ کمشنر نے انتظامات کو حتمی شکل دینے کے لیے آئندہ جائزہ اجلاس منعقد کرنے کا عندیہ بھی دیا۔
