Daily Chakwal

07/08/2026

07/08/2026

فری عمرے کا جھانسہ، سعودی جیل اور پھر موت؛ مائی انور بی بی کی میت وطن پہنچ گئی
تحریر فیضان شیخ
جڑانوالہ: فری عمرے کا جھانسہ دے کر سعودی عرب بھجوائے گئے پاکستانی شہریوں کی دردناک داستان میں ایک اور المناک باب رقم ہوگیا۔ سعودی جیل میں گزشتہ دو سال سے قید مائی انور بی بی دورانِ قید دم توڑ گئیں، جن کا جسدِ خاکی سعودی عرب سے ان کے آبائی گاؤں چک نمبر 368 گ ب، تحصیل جڑانوالہ، ضلع فیصل آباد پہنچ گیا ہے۔

فیملی ذرائع کے مطابق مائی انور بی بی سمیت جڑانوالہ کے نواحی علاقے سے تعلق رکھنے والے پانچ افراد کو مبینہ طور پر فری عمرے کا جھانسہ دے کر سعودی عرب بھجوایا گیا تھا۔ اہلِ خانہ کا دعویٰ ہے کہ عمرہ پر جانے والے ان افراد کو تحائف کے اندر مبینہ طور پر منشیات چھپا کر دی گئی، جس کے نتیجے میں جدہ ایئرپورٹ پر منشیات برآمد ہونے کے بعد پانچوں افراد کو گرفتار کر لیا گیا۔

فیملی ذرائع کے مطابق سعودی عدالت سے مائی انور بی بی سمیت پانچوں پاکستانی شہریوں کو 25، 25 سال قید کی سزا سنائی گئی، جبکہ اہلِ خانہ مسلسل یہ مؤقف اختیار کرتے رہے کہ ان کے پیاروں کو دھوکے سے اس جرم میں ملوث کیا گیا۔

دو سال تک سعودی جیل میں قید رہنے کے دوران مائی انور بی بی بیماری اور کینسر سے بھی لڑتی رہیں، تاہم بالآخر وہ زندگی کی بازی ہار گئیں۔ ان کا جسدِ خاکی پاکستان پہنچ کر آبائی گاؤں پہنچا تو پورا علاقہ سوگ میں ڈوب گیا۔

متاثرہ خاندان کا کہنا ہے کہ انہوں نے حکومت اور متعلقہ حکام سے اپنے پیاروں کی رہائی اور سفارتی مدد کے لیے بارہا امیدیں وابستہ کیں، تاہم ان کے مطابق انہیں وہ مدد نہ مل سکی جس کے وہ منتظر تھے۔

خاندان کے مطابق مسلم لیگ (ن) کے رہنما طلال چوہدری نے بھی اہلِ خانہ کو یقین دہانی کروائی تھی کہ ان معصوم پاکستانی شہریوں کی رہائی کے لیے بھرپور سفارتی کوششیں کی جائیں گی، تاہم خاندان کا کہنا ہے کہ مائی انور بی بی کو اس آزمائش سے نجات نہ مل سکی۔

ایک طرف عمرہ کی نیت سے گھر سے نکلنے والی مائی انور بی بی، دوسری طرف سعودی جیل کی سلاخیں، بیماری اور پھر دیارِ غیر میں موت—یہ واقعہ اپنے پیچھے کئی سوالات چھوڑ گیا ہے۔

آج ان کا جسدِ خاکی اپنے آبائی گاؤں پہنچ چکا ہے، مگر ایک ماں اپنے گھر واپس نہیں آئی۔۔۔ صرف اس کی میت واپس آئی ہے۔

اللہ تعالیٰ مائی انور بی بی کی کامل مغفرت فرمائے، ان کے درجات بلند فرمائے، ان کی قبر کو نور سے بھر دے اور ان کے اہلِ خانہ کو صبرِ جمیل عطا فرمائے۔ آمین۔

إِنَّا لِلّٰهِ وَإِنَّا إِلَيْهِ رَاجِعُونَ

06/08/2026

کوٹگلہ میں جھگڑے کے دوران زخمی ہونے والے محمد عارف جھانڈی انتقال کر گئے

تلہ گنگ: کوٹگلہ میں آج شام پیش آنے والے جھگڑے کے دوران زخمی ہونے والے محمد عارف جھانڈی زخموں کی تاب نہ لاتے ہوئے انتقال کر گئے۔

ذرائع کے مطابق جھگڑے کے دوران انہیں شدید زخمی حالت میں طبی امداد کے لیے منتقل کیا گیا تھا، تاہم وہ جانبر نہ ہو سکے۔

واقعے کے بعد علاقے میں فضا سوگوار ہے، جبکہ اہلِ خانہ، عزیز و اقارب اور اہلِ علاقہ نے گہرے رنج و غم کا اظہار کیا ہے۔

مزید قانونی کارروائی اور واقعے کی تحقیقات متعلقہ اداروں کی جانب سے جاری ہیں۔

06/08/2026

*میٹرک امتحان میں کامیاب طلبہ، والدین اور اساتذہ کو میاں شہر یار علی خان کی مبارکباد*
✍️ رپورٹ: جلیل نقوی

*چکوال:* چکوال شہر کی معروف سیاسی و سماجی شخصیت میاں شہر یار علی خان (حال مقیم ہانگ کانگ) نے میٹرک کے سالانہ امتحان میں کامیابی حاصل کرنے والے تمام طلبہ و طالبات، ان کے معزز والدین اور قابلِ احترام اساتذہ کرام کو دلی مبارکباد پیش کی ہے۔ اپنے مبارکبادی پیغام میں میاں شہر یار علی خان نے کہا کہ طلبہ کی یہ کامیابی ان کی شب و روز محنت، والدین کی دعاؤں اور اساتذہ کی مخلصانہ رہنمائی کا ثمر ہے۔ انہوں نے کامیاب طلبہ و طالبات کے روشن مستقبل کے لیے نیک تمناؤں کا اظہار کرتے ہوئے کہا کہ نوجوان نسل ہی پاکستان کا حقیقی سرمایہ ہے، جو اپنی صلاحیتوں اور علم کے ذریعے ملک و قوم کی ترقی میں اہم کردار ادا کرے گی۔ انہوں نے امید ظاہر کی کہ طلبہ مستقبل میں بھی اسی جذبے، محنت اور لگن کے ساتھ کامیابیوں کا سفر جاری رکھیں گے۔

06/08/2026

بچوں کے تحفظ کے لیے کام کرنے والی تنظیم ساحل نے جنوری تا جون 2026 جرائم سے متعلق ششماہی رپورٹ جاری کر دی

06/08/2026

پابندی کے باوجود مشی واک کا اھتمام۔
سات نامزد افراد سمیت ڈھائی سو افراد کے خلاف مقدمہ درج۔

06/08/2026

12 سال 4 ماہ بعد ICU میں زیرِ علاج محمد اسد انتقال کر گئے

ملتان: ٹریفک حادثے کے بعد گزشتہ 12 سال 4 ماہ سے نشتر ہسپتال کے انتہائی نگہداشت یونٹ (ICU) میں زیرِ علاج رہنے والے محمد اسد انتقال کر گئے۔

اطلاعات کے مطابق محمد اسد تقریباً 15 سال کی عمر میں ایک ٹریفک حادثے کا شکار ہوئے تھے، جس کے بعد وہ مسلسل بے ہوشی کی حالت میں نشتر ہسپتال میں زیرِ علاج رہے۔ طویل عرصے تک زندگی اور موت کی کشمکش میں رہنے کے بعد وہ اپنے خالقِ حقیقی سے جا ملے۔

محمد اسد کی وفات پر نشتر ہسپتال کے ڈاکٹرز، پیرا میڈیکل اسٹاف اور دیگر عملے نے گہرے دکھ اور افسوس کا اظہار کیا، کیونکہ وہ گزشتہ بارہ برس سے زائد عرصے سے ہسپتال میں زیرِ علاج تھے۔

یہ افسوسناک واقعہ ایک بار پھر اس حقیقت کی یاد دلاتا ہے کہ ٹریفک حادثات لمحوں کی غفلت سے پوری زندگی بدل سکتے ہیں۔ ماہرین اور سماجی حلقوں نے والدین سے اپیل کی ہے کہ کم عمر بچوں کو گاڑی یا موٹر سائیکل چلانے سے روکیں، ٹریفک قوانین کی پابندی کو یقینی بنائیں اور احتیاط کا دامن ہرگز ہاتھ سے نہ چھوڑیں تاکہ ایسے المناک سانحات سے بچا جا سکے۔

05/08/2026

*مریم بختاور چکوال کی پہلی خاتون ایڈیشنل ڈپٹی کمشنر (انفورسمنٹ) تعینات، نوٹیفکیشن جاری*

05/08/2026

ویلڈن ڈی پی او چکوال
تلہ گنگ: 17 سالہ لڑکی کے اندھے قتل کا معمہ حل، بہنوئی گرفتار

تلہ گنگ (نمائندہ خصوصی) چکوال پولیس نے تلہ گنگ کے نواحی گاؤں موگلہ کی ڈھوک ڈالی میں 17 سالہ لڑکی کے اندھے قتل کا معمہ چار روز میں حل کرتے ہوئے مقتولہ کے بہنوئی کو گرفتار کر لیا۔

ڈی پی او چکوال کی نگرانی میں ہونے والی تفتیش کے دوران انکشاف ہوا کہ گرفتار ملزم ضلع اٹک کا رہائشی اور مقتولہ کی بڑی بہن کا شوہر ہے۔ پولیس کے مطابق ملزم اپنی سالی سے شادی کرنا چاہتا تھا اور اسی مقصد کے لیے اسے پنڈی گھیب لے گیا، جہاں ایک مقامی مولوی سے نکاح کی درخواست کی گئی۔ تاہم پہلی بیوی کے موجود ہونے اور لڑکی کی کم عمری کے باعث نکاح نہ ہو سکا۔

پولیس کا کہنا ہے کہ 30 جولائی کی رات ملزم لڑکی کو واپس تلہ گنگ لے آیا۔ گاؤں کے قریب پہنچنے پر مقتولہ نے اس کے ساتھ جانے سے انکار کر دیا، جس پر دونوں کے درمیان جھگڑا ہوا۔ مشتعل ہو کر ملزم نے مبینہ طور پر پہلے پتھر سے وار کیا اور بعد ازاں گلا دبا کر اسے قتل کر دیا۔ بعد ازاں لاش کو قریبی دربار کے نزدیک پھینک کر گھاس سے ڈھانپ دیا تاکہ شناخت اور شواہد چھپائے جا سکیں۔

پولیس کے مطابق ملزم نے دورانِ تفتیش خود کو بے گناہ ظاہر کرنے اور پولیس کو گمراہ کرنے کی کوشش کی، تاہم مقتولہ کے زیر استعمال موبائل فون سے حاصل ہونے والے ڈیجیٹل شواہد اور دیگر تفتیشی معلومات کی مدد سے اصل ملزم تک رسائی حاصل کر لی گئی۔

چکوال پولیس نے ملزم کو گرفتار کر لیا ہے جبکہ مقدمے کی مزید تفتیش جاری ہے۔ پولیس حکام کا کہنا ہے کہ ملزم کے خلاف قانون کے مطابق کارروائی عمل میں لائی جائے گی اور کیس کو مضبوط شواہد کے ساتھ عدالت میں پیش کیا جائے گا۔

05/08/2026

*عوام الناس کو اطلاع دی جاتی ہے کہ ضلع چکوال میں آج سے ای چالان (E-Challan) سسٹم کا باقاعدہ آغاز کیا جا رہا ہے۔ تمام شہریوں سے گزارش ہے کہ ٹریفک قوانین کی مکمل پابندی کریں، دورانِ ڈرائیونگ احتیاط برتیں اور محفوظ سفر کو یقینی بنائیں۔ ٹریفک قوانین کی خلاف ورزی کی صورت میں ای چالان جاری کیا جائے گا۔ قانون کی پابندی، آپ کی اور دوسروں کی حفاظت کی ضمانت ہے۔*

*منجانب: حکام سیف سٹی اتھارٹی چکوال*