06/11/2025
سرچینو بي بي سي ته ویلي، په سپین بولدک کې د ډېورنډ کرښې له پورې غاړې لږ تر لږه پنځه هاوانونه د افغانستان خاورې ته توغول شوي چې یو یې په یوه مارکېټ او بل په یوه کور لګېدلي چې زیانونه نه لري. په سپین بولدک کې د روغتون مسوولین وایي، د پاکستان لخوا په یو توغندیز برید کې یوه مېرمنه او یو سړی وژل شوي دي او دوه نور ټپیان شويدي. په روغتون کې د مسوولینو په خبره کله چې دغه بریدونه شوي نو لس نور کسان د برید له سیمې د تېښتې له کبله د موټر په ټکر کې ټپیان شوي دي.
سرچینو بي بي سي ته وویل، دا ډزې او بریدونه وروسته له هغې شوي چې د طالبانو د حکومت ځواکونو د ډېورنډ کرښې دې غاړې ته پوسته جوړوله خو پاکستاني لوري يې د نه جوړولو خبرداری ورکړی و او وروسته پاکستاني ځواکونو ډزې وکړې او لږ تر لږه پنځه توغندي یې وویشل. خو سرچینه وايي، د طالبانو د حکومت سرتېرو یې ځواب نه دی ورکړی.
ځايي اوسېدونکي وايي، د جګړې له وېرې ځینې کورنۍ بې ځایه شوي هم دي خو اوس جګړه نشته. د یادولو وړ ده چې دغه ډزې یوازې له شلو دقیقو نه وروسته غلې شوې. د طالبانو حکومت وایي، تر دې دمه د دواړو خواوو ترمنځ اوربند پر ځای دی. نور معلومات دلته ولولئ:
