02/06/2026
آیون میں مہمان علماء کرام کی پر نور محفل ، سینکڑوں فرزندان توحید نے شرکت کی ، کربوغا شریف کے علماء کی طرف سے امت کو زبوں حالی سے نکلنے کیلئے اللہ و رسول سے قریبی تعلق قائم کرنے پر زور ، ذکر کی محفل بھی سج گئی ،
چترال ( محکم الدین ) مادیت کے اس دور میں جہاں لوگ مادی وسائل کے حصول کیلئےدن رات کی تمیز کئے بغیر سرگردان ہیں ، وہاں بعض خوش نصیب حضرات ذات باری تعالیٰ کی خوشنودی حاصل کرنے اور لوگوں کا تعلق اللہ سے جوڑنے کے عظیم مقصد کے تحت سرگرم عمل ہیں ، اور وہ اس کوشش میں ہیں ، کہ امت اپنا اصل مقصد پر واپس آجائے ، ان کا یہ کہنا ہے ۔ کہ آج اللہ پاک کی عنایت کردہ تمام وسائل ہونے کے باوجود امت جس قدر زبوں حالی کا شکار ہے، اس کی بنیادی وجہ اسلامی احکامات و تعلیمات سے دوری اور اللہ و رسول کے بتائے ہوئے راستے سے انحراف ہے ،
اس سلسلے میں آیون کے معروف عالم دین و مبلغ حافظ مولانا خوشولی خان ولی کی دعوت پر ملکی سطح پر دینی خدمات میں نمایاں نام کے حامل خانقاہ کاربوغہ شریف کے علماء مفتی زبیر ، مولانا نورالودود، مولانا ذکریا آیون تشریف لائے ، اور آیون بازار مسجد کورو میں بیان کی ، جس میں سینکڑوں لوگوں نے شرکت کی ، اپنے بیان میں مولانا مفتی زبیر نے کہا، کہ امت کو جس چیز کی سب سے زیادہ ضرورت ہے ، وہ اللہ و رسول سے تعلق ہے ، آج ہم نے اسباب کو خدا بنا لیا ہے ، اور صبح سے لے کر رات تک اپنی ذات کی سہولیات کے پیچھے لگے ہوئے ہیں ، انہوں نے کہا ، کہ حالات کا دارومدار اعمال پر ہے ، اگر ہم اللہ و رسول کے بتائے ہوئے احکامات کی پیروی کریں گے ، تو آسمان سے ہمارے اعمال کے مطابق نتائج آئیں گے ۔ ہمارے دلوں میں اللہ کے غیروں نے جگہ بنا لی ہے ، اس لئے ان غیروں کو دل سے نکالنے اور اللہ کی ذات کو دل میں بسانے کیلئے مسلسل ذکر کی محنت کی ضرورت ہے ، اللہ کا ذکر اور ورد سے ہی دل منور ہو سکتا ہے ،
اس موقع پر مولانا نورالودود نے ذکر کا حلقہ لگایا ، اور اختتام پر اللہ کے حضور خشوع و خضوع سے دعا کی ، اس طرح یہ بابرکت محفل اختتام کو پہنچی ، بعد آزان ان علماء نے تھانہ آیون میں جوانوں اور ڈی ایس پی حسن اللہ سے ملاقات کی ، اور جوانوں سے بھی دینی پہلو پر خطاب کیا ۔
