Press Club Upper Chitral, Chitral (2025)

30/07/2025

30 جولائی 2025

ڈپٹی سپیکر خیبر پختونخوا اسمبلی ثریا بی بی کی سربراہی میں وفد کا واپڈا ہاوس پشاور کا دورہ اور پیڈو و پیسکو اعلی حکام کے ساتھ علاقہ ریشون اپر چترال کے پاور ٹیرف کے حوالے سے اہم اجلاس.
اجلاس میں ڈپٹی سپیکر ثریا بی بی, ریشون اپر چترال کے نمایندہ وفد کی وزیراعلی خیبر پختونخوا کے سپیشل اسسٹنٹ برائے انرجی اینڈ پاور بریگیڈییر (ر)طارق سدوزئی, سابقہ مشیر خزانہ حمایت اللہ خان, چیف ایگزیکٹیو پیسکو انجینیر اختر حمید, چیف ایگزیکٹیو پیڈو اور پیسکو کے دیگر حکام موجود تھے. پیڈو و پیسکو حکام نے ریشین کے عمائدین کو معاہدے کے لیے پشاور بلا لیا ہے. اگلے اجلاس میں ریشین کے عمائدین کی موجودگی میں عملی جامہ پہنایا جایگا.

30/07/2025

پاکستان پیپلز پارٹی ضلع اپر چترال کے کارکنان دل کی گہرائیوں سے محترم سینیٹر طلحہ محمود صاحب کو سینیٹ انتخابات میں شاندار کامیابی کے بعد جیالوں کی سرزمین، چترال آمد پر خوش آمدید کہتے ہیں۔

آپ کی کامیابی نہ صرف پاکستان پیپلز پارٹی کے لیے باعثِ فخر ہے بلکہ خیبرپختونخوا خصوصاً چترال کے عوام کے لیے بھی امید کی نئی کرن ہے، ہم امید کرتے ہیں کہ سنیٹر صاحب اپنی قائدانہ صلاحیتوں کو بروئے کار لاتے ہوئے ایوانِ بالا میں چترال کے مسائل کو حل کرنے کے لیے اپنا بہترین کردار ادا کرینگے۔

سردار حسین
ممبر صوبائی کونسل
پاکستان پیپلز پارٹی، خیبرپختونخوا

30/07/2025

عوامی اطلاع:
عوام الناس کو اطلاع دی جاتی ہے کہ کل یعنی 31 جولائی 2025 سے اسفالٹ پلانٹ بمقام جنالی کوچ سے تھورکو روڈ تک سڑک کی چوڑائی کے کام کے باعث ٹریفک صبح 10:00 بجے سے 12:00 بجے دوپہر تک جبکہ 4:00 بجے شام سے 6:00 بجے شام تک دوبارہ بند رہے گی۔
آپ کے تعاون کا شکریہ۔
عمر جان اینڈ کمپنی، این ایچ اے۔

30/07/2025

پولیس شہداء کو خراجِ عقیدت – اپر چترال پولیس کی جانب سے بونی چوک میں خصوصی کیمپ کا انعقاد
رپورٹ: اپر چترال پریس کلب

بونی (شہزاد احمد) — ڈسٹرکٹ پولیس اپر چترال کی جانب سے پولیس شہداء کی قربانیوں کو خراجِ عقیدت پیش کرنے کے لیے بونی چوک میں ایک روزہ خصوصی کیمپ کا انعقاد کیا گیا۔ اس کیمپ میں راہ گیروں کو ٹھنڈے شربت پیش کیے گئے جبکہ پولیس شہداء کی بلندی درجات کے لیے خصوصی دعاؤں کا بھی اہتمام کیا گیا۔

کیمپ کے انعقاد کا مقصد وطن عزیز کے تحفظ کی خاطر اپنی جانوں کا نذرانہ پیش کرنے والے شہداء کی یاد تازہ کرنا اور ان کی قربانیوں کو سلام پیش کرنا تھا۔

اس موقع پر پولیس اہلکاروں اور شہریوں نے اجتماعی طور پر دعا میں شرکت کی اور شہداء کے اہل خانہ کے لیے صبر و استقامت کی دعا بھی کی گئی۔ عوامی حلقوں نے پولیس کی اس اقدام کو خراجِ تحسین پیش کرتے ہوئے اسے ایک مثبت روایت قرار دیا۔

پولیس حکام کے مطابق، "ہم اپنے شہداء کو کبھی نہیں بھلا سکتے، اُنہوں نے اپنی جانیں قربان کر کے قوم کو امن دیا۔ آج کا دن اُن کے نام ہے۔"

ایسے اقدامات سے نہ صرف شہداء کی یادیں تازہ ہوتی ہیں بلکہ پولیس اور عوام کے درمیان رشتہ مزید مضبوط ہوتا ہے۔

30/07/2025

پریس ریلیز

اویّر وادی کا پلاٹینم جوبلی پروگرامز میں شامل ہونا خوش آئند اقدام ہے – فخرالدین

اپر چترال کے سابق تحصیل ناظم فخرالدین نے محکمہ سیاحت خیبر پختونخواہ کا خصوصی شکریہ ادا کرتے ہوئے کہا ہے کہ اویّر وادی کو پلاٹینم جوبلی تقاریب میں شامل کرنا ایک خوش آئند اور تاریخی قدم ہے، جو علاقے کی ترقی میں ایک مثبت سنگ میل ثابت ہوگا۔

انہوں نے ڈائریکٹر جنرل ٹورزم خیبر پختونخواہ، جناب حبیب اللہ خان عارف اور ان کی پوری ٹیم کا دلی شکریہ ادا کیا جنہوں نے ان کی اور ان کی ٹیم کی درخواست پر عملدرآمد کرتے ہوئے اویر وادی کو پروگرام کا حصہ بنایا۔ انہوں نے کہا کہ یہ سب کچھ جناب حبیب اللہ خان عارف کی ذاتی دلچسپی اور وژن کی بدولت ممکن ہوا۔

فخرالدین نے ڈپٹی کمشنر اپر چترال، جناب حسیب الرحمٰن خلیل کا بھی تہہ دل سے شکریہ ادا کیا جنہوں نے پلاٹینم جوبلی تقاریب کے کامیاب انعقاد میں بھرپور کردار ادا کیا اور تمام انتظامات کو خوش اسلوبی سے پایہ تکمیل تک پہنچایا۔

آخر میں فخرالدین نے امید ظاہر کی کہ محکمہ سیاحت خیبر پختونخواہ مستقبل میں بھی اسی جذبے کے تحت اپر چترال جیسے قدرتی حسن سے مالا مال علاقوں کو ترقیاتی منصوبوں میں شامل رکھے گا تاکہ مقامی سیاحت کو فروغ ملے اور عوام کو روزگار کے مواقع میسر آئیں۔

30/07/2025

احتجاجی بیان

ہم پاکستان تحریکِ انصاف کے کارکنان، ورکرز اور چترال کے عوام کی جانب سے ایم این اے عبد اللہ چیف کو الیکشن کمیشن کی جانب سے آرٹیکل 62,63 کے تحت نااہل قرار دیے جانے پر شدید احتجاج ریکارڈ کرواتے ہیں۔ یہ فیصلہ پاکستان تحریک انصاف کے مینڈیٹ اور عوامی رائے کی توہین ہے۔

عبد الطیف وہ نمائندہ ہیں جنہوں نےچترال کے عوام نے اپنے اعتماد اور ووٹ سے منتخب کیا۔ ان کی نااہلی ہمارے لیے باعثِ صدمہ ہے۔ اس فیصلے سے نہ صرف پاکستان تحریک انصاف چترال کے عوام کے امنگوں کو دھچکہ پہنچا ہے بلکہ جمہوری اقدار کو بھی مجروح کیا گیا ہے۔

ہم اس ناانصافی کے خلاف پرامن احتجاج کرتے ہیں اور اللہ تعالیٰ سے دعا گو ہیں کہ وہ ہمارے بھائی کو ہمت، صبر اور فتح عطا فرمائے۔ آمین۔

ارشاد حسین تاجک
تحصیل صدر لوئر چترال

29/07/2025

چترال، ڈی پی او ہنگو خالد خان کی آبائی وطن واپسی پر پرتپاک استقبال

چترال (فتح اللہ) ہنگو میں دہشتگردوں کے خلاف کارروائی کے دوران شدید زخمی ہونے والے ڈی پی او ہنگو محمّد خالد خان کی چترال واپسی پر چترال بازار میں ایک پرتپاک اور شایانِ شان استقبال کیا گیا۔ خالد خان، جو کہ دہشتگردوں کے خلاف بہادری سے لڑتے ہوئے گولی لگنے کے باعث زخمی ہوئے تھے، کئی ہفتے سی ایم ایچ پشاور میں زیرِ علاج رہے۔ اللہ تعالیٰ کے فضل اور قوم کی دعاؤں سے وہ صحت یاب ہو کر آج اپنے آبائی علاقے چترال واپس پہنچے۔

استقبال کے موقع پر چترال کے سیاسی جماعتوں کے سربراہان، عمائدین، نوجوان، سرکاری افسران اور مختلف مکاتب فکر سے تعلق رکھنے والے افراد کی بڑی تعداد موجود تھی۔ مقامی لوگوں نے خالد خان کو "غازی" کا خطاب دیتے ہوئے ان کی قربانی، بہادری اور فرض شناسی کو خراجِ تحسین پیش کیا۔

تقریب سے خطاب کرتے ہوئے خالد خان نے کہا کہ "چترال کی دھرتی ہمیشہ سے قربانی، وفا اور بہادری کی علامت رہی ہے۔ میں نے جو کچھ کیا، وہ ایک سپاہی کا فرض تھا۔ اللہ کا شکر ہے کہ مجھے اپنی قوم کے لیے کچھ کرنے کا موقع ملا۔"

انہوں نے مزید کہا کہ وطن کی حفاظت ہر پاکستانی کا فرض ہے، اور وہ دہشتگردی کے خلاف جنگ میں کسی قسم کی قربانی سے دریغ نہیں کریں گے۔ اُن کا کہنا تھا کہ ملک میں امن و امان کی بحالی کے لیے پولیس اور سیکیورٹی ادارے ہر وقت سرگرم عمل ہیں۔

مقررین نے اپنے خطاب میں ڈی پی او خالد خان کو خراجِ عقیدت پیش کرتے ہوئے کہا کہ وہ چترال کے نوجوانوں کے لیے ایک رول ماڈل کی حیثیت رکھتے ہیں۔ انہوں نے اہلِ چترال سے مطالبہ کیا کہ وہ اس بہادر سپوت کا بھرپور استقبال کر کے اُن کی قربانیوں کو سراہیں۔

استقبالیہ پروگرام کا اختتام دعا اور نعرۂ تکبیر سے ہوا، جس میں تمام شرکاء نے پاکستان کی سلامتی اور شہداء کے درجات کی بلندی کے لیے دعا کی۔

29/07/2025

الیکشن کمیشن بے فیصلہ سنادیا۔
ایم این اے عبدالطیف چترالی نااہل قرار

29/07/2025

تریچ میر ٹریکنگ مہم کا دوسرا مرحلہ کامیابی سے مکمل، بیس ٹریکرز پر مشتمل ٹیم نے بیس کیمپ پر قومی پرچم لہرادی ،

تریچ میر میں مہم جوئی کو پچھتر برس مکمل ہونے پر ملک بھر سے آئے ہوئے ٹریکرز نے ٹریکنگ مہم کا دوسرا مرحلہ کامیابی سے مکمل کر لیا گیا ہے۔

گزشتہ ہفتے بیس ٹریکرز پر مشتمل دوسری ٹیم نے تریچ میر بیگ پیکر کلب کی رہنمائی میں چترال سے روانہ ہوکر براستہ کوہ ویلی، ریشن اور او-ویر کے راستے شوکھور شال کیمپ میں قیام کیا ۔ جس کے بعد وہ پیدل ٹریک کرتے ہوئے تریچ میر بیس کیمپ تک پہنچنے میں کامیاب ہوگیے۔

ٹریکرز نے 7800 میٹر اونچی چوٹی تریچ میر کے بیس کیمپ پر قومی پرچم لہرا کر بلند ترین چوٹی تک رسائی حاصل کرنے کی خوشی منائی۔

یہ تاریخ میں پہلا موقع ہے کہ تریچ میر سمٹ کی مہم سرکاری سطح پر منعقد کی گئی ۔

واضح رہے کہ آج سے پچھتر برس قبل جولائی انیس سو پچاس کو ناروے کے مہم جوؤں کی ایک ٹیم نے ماہر ماحولیات پروفیسر ارنینس کی قیادت میں اسی شابرونز اویر روٹ کو استعمال کرتے ہوئے تریچ میر کو سر کیا تھا۔

موجودہ ٹریکرز کی ٹیم نے پروفیسر ارنینس کے اسی بیس کیمپ میں دو دن کیمپنگ کی اور یہاں کے قدرتی ماحول، برف پوش پہاڑوں اور بہتے ابشاروں سے خوب لطف اندوز ہوتے رہے۔

29/07/2025

ڈی پی۔ او محمد خالد خان، جو کہ ہنگو میں دہشتگردوں کے خلاف بہادری سے لڑتے ہوئے گولی لگنے کے باعث زخمی ہوئے تھے، سی ایم ایچ کوہاٹ میں زیرِ علاج رہے۔ اللہ تعالیٰ کے فضل و کرم اور قوم کی دعاؤں سے وہ اب روبہ صحت ہیں اور آج چترال واپس تشریف لا رہے ہیں۔

‎چترال کی دھرتی ہمیشہ سے قربانیوں، وفا، غیرت اور بہادری کی علامت رہی ہے۔ یہ سرزمین شہیدوں اور غازیوں کی زمین ہے، اور اب اسی سرزمین کا ایک اور سپوت، غازی خالد خان بن کر اپنے گھر لوٹ رہا ہے۔

‎ڈی ایس پی خالد خان نے وطنِ عزیز کی حفاظت میں جو بے مثال جُرأت، عزم اور حوصلہ دکھایا، وہ نہ صرف چترال بلکہ پوری قوم کے لیے باعثِ فخر ہے۔ اُن کی یہ قربانی ہمیں یاد دلاتی ہے کہ ہم جس سرزمین پر سانس لے رہے ہیں، وہ ہمارے محافظوں کے خون سے مہک رہی ہے۔

‎اہلِ چترال سے گزارش ہے کہ وہ اپنے بہادر بیٹے کا پرتپاک اور پُرعزت استقبال کریں، کیونکہ ایسے محسن قوم کے ماتھے کا جھومر ہوتے ہیں
وصی الدین آکاش

28/07/2025

پولو گراؤنڈ کی تعمیر پر تنقید یا ترقی کی راہ؟
تحریر شہزاد احمد شہزاد
چترال — گزشتہ چند دنوں سے سوشل میڈیا پر ایک ارب روپے کے مجوزہ پولوگرائونڈ کی تعمیر کے منصوبوں کو لیکر مختلف آراء اور تنقید کا سلسلہ جاری ہے۔ یہ معاملہ اس وقت خبروں کی زینت بنا جب پولو ایسوسی ایشن چترال کے صدر شہزادہ سکندر الملک نے ایک ویڈیو پیغام میں خوشخبری سنائی کہ وزیر اعلیٰ خیبرپختونخوا علی امین گنڈاپور نے چترال کے مختلف پولو گراؤنڈز کی مرمت اور توسیع کے لیے ایک ارب روپے دینے کا وعدہ کیا ہے۔

جہاں ایک طرف یہ خبر پولو سے وابستہ حلقوں اور نوجوانوں میں خوشی کا باعث بنی، وہیں دوسری طرف کچھ حلقوں کی جانب سے اس اعلان کو شدید تنقید کا نشانہ بنایا گیا۔ ناقدین کا مؤقف ہے کہ چترال میں جب تک سڑکیں، بجلی، پانی، صحت اور تعلیم جیسی بنیادی سہولیات کی قلت برقرار ہے، ایسے میں کھیلوں پر فنڈز خرچ کرنا ترجیحات کی غلط سمت نشاندہی کرتا ہے۔

تاہم ہم جیسے لوگ اس نقطہ نظر سے اتفاق نہیں کرتے۔ ہمارے مطابق ہر محکمہ کا اپنا بجٹ، دائرہ کار اور اہداف ہوتے ہیں۔ کھیلوں کے فنڈز مخصوص ترقیاتی اسکیموں کے لیے مختص کیے جاتے ہیں، جنہیں صحت یا مواصلات کے منصوبوں میں منتقل کرنا ممکن نہیں ہوتا۔ اسی طرح پولو گراؤنڈز کی تعمیر کھیل و ثقافت کے شعبے کا حصہ ہے، جو نہ صرف چترال کی ثقافتی شناخت سے جڑا ہے بلکہ سیاحت کے فروغ میں بھی کلیدی کردار ادا کرتا ہے۔

چترال کے حوالے سے یہ ایک ناقابل تردید حقیقت ہے کہ پولو نہ صرف یہاں کی ثقافت کا اہم جز ہے بلکہ بین الاقوامی سطح پر چترال کی پہچان بھی ہے۔ اس کھیل کے فروغ کے بغیر چترال میں سیاحت کے امکانات کو مکمل طور پر اجاگر کرنا مشکل ہے۔ پولو گراؤنڈز کی خستہ حالت، تربیت کی کمی، اور سہولیات کی عدم دستیابی نہ صرف مقامی کھلاڑیوں کے لیے رکاوٹ ہیں بلکہ ملکی و غیرملکی سیاحوں کے لیے بھی مایوسی کا باعث بنتے ہیں۔

شہزادہ سکندر الملک جو خود ایک پولو پلیئر اور ایسوسی ایشن کے صدر ہیں، ان کی کوششوں کو سراہنے کے بجائے تنقید کا نشانہ بنانا ناانصافی کے مترادف ہے۔ معاشرے میں ایسے افراد کی حوصلہ افزائی ضروری ہے جو اپنی صلاحیت، اثر و رسوخ اور کوششوں سے اپنے علاقے کے لیے کچھ کر رہے ہوں۔

بنیادی سہولیات کی فراہمی یقیناً حکومت کی ذمہ داری ہے، لیکن اس کا مطلب یہ نہیں کہ دیگر شعبوں کو نظر انداز کر دیا جائے۔ پولو چترال کا ورثہ ہے، اس کی ترقی دراصل چترال کی مجموعی ترقی کی علامت بن سکتی ہے۔
چترال جیسے پسماندہ علاقے میں اگر کھیلوں کے شعبے میں کوئی قدم اٹھایا جا رہا ہے، تو اس کا خیرمقدم ہونا چاہیے۔ تنقید ضرور کی جائے، مگر تنقید برائے اصلاح—not تنقید برائے تنقید۔ چترال کے لیے ہر شعبے میں کام ہونا ضروری ہے، اور پولو اس فہرست کا ایک اہم جز ہے۔

28/07/2025

گلگت بلتستان میں سیلاب کی تباہ کاریاں — وزیر اعلیٰ کا پرنس رحیم آغا خان سے مدد کی اپیل

گلگت بلتستان میں حالیہ شدید بارشوں اور سیلاب کے نتیجے میں بڑے پیمانے پر تباہی کے بعد، وزیر اعلیٰ حاجی گلبر خان نے آغا خان ڈویلپمنٹ نیٹ ورک (AKDN) سے فوری امداد کی اپیل کی ہے۔ 24 جولائی کو ہز ہائینس پرنس رحیم آغا خان کے نام لکھے گئے ایک باضابطہ خط میں وزیر اعلیٰ نے متاثرہ علاقوں میں بنیادی ڈھانچے کو پہنچنے والے نقصان کی تفصیلات فراہم کیں۔

خط کے مطابق، اب تک 30 سے زائد پل تباہ ہو چکے ہیں، 13 کلومیٹر سڑکیں، 50 آبپاشی چینلز، 40 واٹر سپلائی لائنیں اور 500 سے زائد رہائشی مکانات متاثر ہوئے ہیں۔ اس کے علاوہ درجنوں گاڑیاں تباہ ہو چکی ہیں جبکہ بجلی کے نظام کو بھی شدید نقصان پہنچا ہے۔ دور دراز کے وادیوں سے مکمل طور پر منقطع ہو چکی ہیں، جس سے امدادی کارروائیوں میں نہایت مشکلات کاسامنا ہے۔

وزیر اعلیٰ نے کہا کہ حکومت گلگت بلتستان اپنی تمام تر دستیاب صوبائی وسائل کو بروئے کار لا رہی ہے، لیکن موجودہ حالات میں بین الاقوامی سطح پر ادارہ جاتی تعاون ناگزیر ہو چکا ہے۔

انہوں نے AKDN کی گلگت بلتستان کے عوام کے ساتھ دیرینہ شراکت داری کو سراہتے ہوئے کہا کہ ادارے نے صحت، تعلیم، آفات سے نمٹنے اور کمیونٹی ترقی جیسے شعبوں میں ہمیشہ کلیدی کردار ادا کیا ہے۔

وزیر اعلیٰ نے پرنس رحیم آغا خان سے درخواست کی کہ موجودہ بحران میں AKDN اپنا کردار ادا کرے تاکہ متاثرہ
علاقوں میں فوری بحالی اور امداد ممکن بنائی جا سکے۔
S.N. Peerzada

Press Club Upper Chitral

30/07/2025

30/07/2025

30/07/2025

30/07/2025

30/07/2025

30/07/2025

29/07/2025

29/07/2025

29/07/2025

29/07/2025

28/07/2025

28/07/2025

Address

Website

Alerts

Shortcuts

Share

Category