02/07/2026
ڈسٹرکٹ پولیس آفیسر لوئر چترال رفعت اللہ خان کے اعزاز میں پروقار الوداعی تقریب کا انعقاد
پولیس لائن لوئر چترال میں ڈسٹرکٹ پولیس آفیسر لوئر چترال، رفعت اللہ خان (PSP) کے اعزاز میں ایک پروقار اور یادگار الوداعی تقریب کا انعقاد کیا گیا۔
الوداعی تقریب میں ایس پی انویسٹی گیشن اقبال کریم، ایس پی ایلیٹ عتیق الرحمن، ڈی ایس پی ہیڈکوارٹر اقبال الدین، ایس ڈی پی او سرکل لٹکوہ احمد عیسیٰ، ایس ڈی پی او سرکل چترال سجاد حسین، ایس ڈی پی او سرکل بمبوریت حسن اللہ، ایس ڈی پی او سرکل دروش رحمان یوسف، ڈی ایس پی انویسٹی گیشن حضرت الدین، اے ڈی، آئی بی تمیزالدین، ضلع بھر کے ایس ایچ اوز، لائن آفیسر، انچارج ٹریفک وارڈن پولیس اور ضلعی پولیس کے مختلف شعبہ جات سے تعلق رکھنے والے افسران و جوانوں نے بڑی تعداد میں شرکت کی۔
تقریب سے خطاب کرتے ہوئے مقررین نے رفعت اللہ خان کی مثالی قیادت، اعلیٰ پیشہ ورانہ صلاحیتوں، دیانت داری، فرض شناسی اور عوام دوست پولیسنگ کو زبردست خراجِ تحسین پیش کیا۔
مقررین نے کہا کہ ان کی مدبرانہ قیادت میں لوئر چترال پولیس نے امن و امان کے قیام، جرائم کی مؤثر روک تھام، ٹریفک نظم و ضبط کی بہتری، کمیونٹی پولیسنگ کے فروغ اور عوامی اعتماد کی بحالی کے شعبوں میں نمایاں کامیابیاں حاصل کیں، جو ان کی بہترین قیادت کا عملی ثبوت ہیں۔
اپنے الوداعی خطاب میں ڈسٹرکٹ پولیس آفیسر لوئر چترال، رفعت اللہ خان نے تمام پولیس افسران، جوانوں اور شرکائے تقریب کا تہہ دل سے شکریہ ادا کرتے ہوئے کہا کہ لوئر چترال میں خدمات انجام دینا ان کے لیے باعثِ فخر اور ایک ناقابلِ فراموش اعزاز رہا۔ انہوں نے کہا کہ لوئر چترال کے پُرامن، مہمان نواز اور قانون پسند عوام کی محبت، اعتماد، تعاون اور خلوص کو وہ ہمیشہ قدر کی نگاہ سے یاد رکھیں گے۔
انہوں نے مزید کہا کہ اس خوبصورت ضلع میں عوام اور پولیس کے درمیان مثالی ہم آہنگی، باہمی اعتماد اور تعاون نے امن و امان کے قیام میں کلیدی کردار ادا کیا، جس پر وہ اللہ تعالیٰ کے شکر گزار ہیں۔
انہوں نے کہا کہ لوئر چترال پولیس ایک انتہائی پیشہ ور، باصلاحیت، فرض شناس اور عوام دوست فورس ہے، جس نے ہر مشکل اور نازک موقع پر اپنے فرائض کی ادائیگی میں جرات، نظم و ضبط اور خدمتِ خلق کا شاندار مظاہرہ کیا۔ انہوں نے اس امید کا اظہار کیا کہ لوئر چترال کے عوام اور پولیس آئندہ بھی اسی جذبۂ اتحاد، باہمی تعاون اور قانون کی پاسداری کے ذریعے چترال کے مثالی امن کو برقرار رکھتے ہوئے ترقی و خوشحالی کی نئی منازل طے کریں گے۔
تقریب کے اختتام پر پولیس افسران کی جانب سے ڈی پی او لوئر چترال، رفعت اللہ خان کو ان کی گرانقدر خدمات کے اعتراف میں یادگاری شیلڈ اور تحائف پیش کیے گئے۔
اس موقع پر ان کی بہترین صحت، نئی ذمہ داریوں میں مزید کامیابی اور ملک و قوم کی خدمت کے لیے خصوصی دعا بھی کی گئی۔
