08/05/2026
خیبر: میلوارڈ پولیس کی اہم کارروائی، اندھے قتل کا معمہ حل، معصوم بچے کا سفاک قاتل گرفتار
میلوارڈ پولیس نے ہفتہ قبل پیش آنے والے اندوہناک اندھے قتل کیس کا سراغ لگا کر پانچ بہنوں کے اکلوتے بھائی، کمسن بچے مہران کے سفاک قاتلوں کو گرفتار کرلیا۔ ملزم کی گرفتاری خفیہ معلومات، جدید سائنسی تفتیش اور مسلسل محنت کے نتیجے میں عمل میں لائی گئی، جس کے بعد علاقے میں اطمینان کی فضا قائم ہوگئی۔
مدعی زاہد ولد اصل خان کی مدعیت میں درج مقدمے کے مطابق مورخہ 30/04/2024 کو تھانہ میلوارڈ کی حدود عزیز مارکیٹ کے قریب کمسن مہران کی لاش برآمد ہوئی تھی۔ مقتول اپنی بہنوں کے ہمراہ ایک شادی کی تقریب میں گیا تھا، تاہم بعد ازاں صبح کے وقت اس کی لاش علاقے سے ملی۔ نامعلوم ملزمان نے معصوم بچے کو پستول سے فائرنگ کرکے بے دردی سے قتل کیا، جس سے پورے علاقے میں شدید غم و غصہ پایا گیا۔
واقعے کا نوٹس لیتے ہوئے ڈی پی او خیبر وقار احمد نے فوری طور پر ملزمان کی گرفتاری کے لیے ایس پی انویسٹیگیشن شفیق خان کی نگرانی میں ایس ایچ او شمشاد خان، انچارج چوکی مغرب خان، ایڈیشنل ایس ایچ او لعل کلام اور تفتیشی افسر ظہور خان پر مشتمل خصوصی ٹیم تشکیل دی۔ ٹیم نے جائے وقوعہ سے شواہد اکٹھے کرکے مختلف پہلوؤں سے جامع تفتیش کا آغاز کیا اور متعدد مشتبہ افراد کو شامل تفتیش کیا۔
ٹیم نے مختصر وقت میں صرف پانچ دن کے اندر اصل ملزمان عادل محمد ولد تازہ خان قوم اکاخیل مداخیل اور جمروز ولد یار اکبر قوم اکاخیل مداخیل کو جدید سائنسی تحقیق اور تفتیشی مہارت کی بنیاد پر ٹریس کرلیا۔ ملزمان کی نشاندہی پر آلہ قتل پستول 30 بور، مقتول مہران کا جلا ہوا موبائل فون اور موٹر سائیکل بھی برآمد کرلی گئی، جبکہ دونوں ملزمان کو گرفتار کرکے حوالات منتقل کردیا گیا ہے۔
ڈی پی او خیبر وقار احمد نے کہا ہے کہ معصوم بچے کے قتل میں ملوث ملزمان کی گرفتاری پولیس کی بڑی کامیابی ہے۔ انہوں نے واضح کیا کہ ضلع خیبر پولیس جرائم پیشہ عناصر کے خلاف بلا تفریق کارروائیاں جاری رکھے گی اور کسی بھی بے گناہ شہری کے خون کو رائیگاں نہیں جانے دیا جائے گا۔ انہوں نے خصوصی ٹیم کی کارکردگی کو سراہتے ہوئے کہا کہ عوام کے جان و مال کا تحفظ پولیس کی اولین ترجیح ہے۔
