27/09/2026
ڈاکٹر برہان الدین خدمتِ خلق کا اصل نام ❤️
شاید آپ میں سے اکثر لوگ ڈاکٹر برہان الدین صاحب کو جانتے ہوں گے، لیکن آج پھر بھی میں ان کی زندگی اور خدمتِ خلق کے جذبے کے بارے میں چند الفاظ لکھنا چاہتا ہوں۔ کیونکہ جو لوگ معاشرے میں اچھے کام کر رہے ہوں تو ان کی حوصلہ افزائی کے لیے چند الفاظ کہنا لکھنا ہم سب کی ذمہ داری بھی ہے اور حق بھی ــ
ڈاکٹر برہان الدین صاحب ضلع دیر بالا تحصیل واڑی گاؤں کاکڈ کے رہائشی ہیں گزشتہ تقریباً سات، آٹھ سال سے میں انہیں علاقے کے مختلف فلاحی اور خدمتِ خلق کے کاموں میں مسلسل متحرک دیکھ رہا ہوں۔
پیشہ کے اعتبار سے وہ ایک ڈاکٹر ہیں اور ماشاءاللہ علاقے میں مختلف مقامات پر کلینکس کے ذریعے لوگوں کی خدمت کر رہے ہیں۔ لیکن اپنی پیشہ ورانہ مصروفیات کے باوجود ان کا دل صرف اپنے کلینک تک محدود نہیں۔ جب بھی کسی حادثے کی اطلاع ملے، کسی غریب اور ضرورت مند کو مدد کی ضرورت ہو یا کسی فلاحی سرگرمی کا موقع آئے تو ڈاکٹر برہان الدین صاحب اپنی فاؤنڈیشن کی جیکٹ پہن کر خدمت کے لیے نکل کھڑے ہوتے ہیں۔
انہوں نے مختلف فلاحی اداروں کے ساتھ خدمتِ خلق میں حصہ لیا ہے، جن میں الخدمت فاؤنڈیشن،الاخوان فاؤنڈیشن اور کاکڈ ویلفیئر فاؤنڈیشن شامل ہیں۔ ان تمام اداروں میں وہ انتہائی فعال اور متحرک رہاہے۔
مجھے فخر ہے کہ کاکڈ ویلفیئر فاؤنڈیشن میں ہم دونوں نے تقریباً پانچ سال تک بطور ادنیٰ رضاکار ایک ساتھ خدمت کی ہے۔
کئی مرتبہ میں نے ڈاکٹر صاحب سے کہا:
"آپ تو خود ڈاکٹر ہیں، اپنے کلینک میں بھی لوگوں کی خدمت کرتے ہیں۔ جب کوئی غریب اور بیمار شخص آپ کے پاس آتا ہے تو آپ اس کا مفت علاج بھی کرتے ہیں، تو پھر فاؤنڈیشن کی جیکٹ پہن کر سڑکوں پر کھڑے ہونے اور حادثات کی جگہوں تک پہنچنے کی کیا ضرورت ہے؟"
ڈاکٹر برہان الدین صاحب کا جواب ہمیشہ میرے دل کو چھو جاتا تھا:
"حاجی صاحب! یہ جیکٹ پہن کر باہر نکلنا، سڑکوں پر لوگوں کی مدد کرنا اور حادثات کی جگہ پہنچنا اب میری عادت بن چکا ہے، بلکہ خدمتِ خلق میرے لیے ایک ایسا نشہ بن چکی ہے جس کے بغیر مجھے سکون نہیں ملتا۔ جب میں فاؤنڈیشن کی جیکٹ پہن کر کسی کی مدد کے لیے نکلتا ہوں تو میرے دل کو سکون ملتا ہے۔"
یہ الفاظ صرف کہنے کی بات نہیں، بلکہ میں نے ڈاکٹر صاحب کو عملی طور پر اسی جذبے کے ساتھ مسلسل کام کرتے دیکھا ہے۔
گزشتہ دو، تین روز کے دوران بھی ڈاکٹر برہان الدین صاحب اپنے کئی ڈاکٹرز دوستوں کو صاحب آباد تبلیغی اجتماع میں بلایا، جہاں ڈاکٹر صاحب نے اپنی فاؤنڈیشن کیطرف سے ایک فری میڈیکل کیمپ کا انعقاد کیا تھا۔ وہاں ہزاروں افراد کا مفت طبی معائنہ کیا گیا اور ضرورت مند مریضوں کو علاج اور طبی رہنمائی فراہم کی گئی۔
میں ذاتی طور پر ڈاکٹر برہان الدین صاحب کی اس خدمت اور جذبے سے انتہائی متاثر اور مطمئن ہوں، کیونکہ معاشرے میں ایسے لوگ واقعی کم ملتے ہیں جو اپنی ذات اور اپنے آرام کے ساتھ ساتھ دوسروں کی صحت، خوشی، آسانی اور سکون کے بارے میں بھی سوچتے ہیں۔
ایسے لوگ معاشرے کا قیمتی سرمایہ ہوتے ہیں۔ ان کی حوصلہ افزائی کرنا اور ان کے اچھے کاموں کو دوسروں تک پہنچانا اس لیے بھی ضروری ہے تاکہ دوسرے نوجوان بھی انسانیت کی خدمت کے اس خوبصورت سفر کا حصہ بنیں۔
🤲 اللہ رب العزت ڈاکٹر برہان الدین صاحب کو صحت، عزت، خوشیاں اور مزید ہمت عطا فرمائے، ان کی خدمتِ خلق کو اپنی بارگاہ میں قبول فرمائے، اور ہمارے معاشرے میں ڈاکٹر برہان الدین جیسے بے شمار مخلص اور خدمت گزار انسان پیدا فرمائے تاکہ غریب، بے سہارا اور ضرورت مند لوگوں کی زیادہ سے زیادہ مدد ہو سکے۔
آمین یا رب العالمین۔ ❤️🤲
