15/01/2025
قرآن پاک کو سمجھ کر سیکھنے کی اہمیت
آج کے دور میں دین کے علم کی مسلسل ضرورت محسوس کی جا رہی ہے۔ بہت سے لوگ بچپن میں ناظرہ قرآن پڑھ لیتے ہیں اور یہ سمجھتے ہیں کہ ان کا دینی علم مکمل ہو چکا ہے۔ لیکن حقیقت اس کے برعکس ہے۔ دین اسلام صرف عبادات تک محدود نہیں بلکہ زندگی گزارنے کا مکمل ضابطہ ہے جسے سمجھنا اور سیکھنا زندگی بھر جاری رہنے والا عمل ہے۔
جب انسان دین کو مکمل طور پر سمجھنے سے قاصر رہتا ہے تو اس کے اثرات اس کی زندگی پر مرتب ہونے لگتے ہیں۔ نماز، روزہ، زکوٰۃ اور دیگر عبادات کے صحیح طریقے سے ادائیگی تبھی ممکن ہے جب ان کے احکام کو گہرائی سے سمجھا جائے۔ اسی طرح دین کے دیگر پہلوؤں کو بھی مسلسل سیکھنے کی ضرورت ہے تاکہ ہم اپنی روزمرہ زندگی کو اللہ کی رضا کے مطابق گزار سکیں۔
بدقسمتی سے، بہت سے لوگ صرف بچپن میں قاری صاحب سے ناظرہ پڑھنے کے بعد دین کے علم سے دور ہو جاتے ہیں۔ وقت گزرنے کے ساتھ ساتھ دین کے حوالے سے ان کی معلومات محدود ہو جاتی ہیں اور وہ صرف اپنی ابتدائی تعلیم پر ہی اکتفا کرتے ہیں۔ جب کوئی شخص دین کی مزید تفصیلات سیکھنے کی کوشش کرتا ہے تو بعض اوقات معاشرتی دباؤ یا شرم آڑے آتی ہے اور وہ اپنے مسائل کو حل کرنے کے لیے غلط سمت میں چلا جاتا ہے۔
سوشل میڈیا کے بڑھتے ہوئے رجحان نے لوگوں کو مختلف آراء سننے اور مسائل میں الجھانے کا موقع دیا ہے۔ اکثر افراد بغیر تحقیق کے ہر کسی کو سننے لگتے ہیں اور بعض اوقات غلط فہمیوں کا شکار ہو جاتے ہیں جو کہ دین سے دوری کا باعث بنتی ہیں۔
میری کوشش یہ ہے کہ قرآن پاک کو ترجمہ اور تفسیر کے ساتھ سکھانے کا ایک منفرد سلسلہ شروع کیا جائے جس میں ناظرہ، ترجمہ، اور تفسیر کو ایک ساتھ شامل کیا جائے تاکہ لوگ قرآن کو بہتر انداز میں سمجھ سکیں۔ یہ طریقہ نہ صرف دین کو عام کرنے بلکہ معاشرتی اختلافات کو کم کرنے اور لوگوں کو دین کی حقیقی روح سے روشناس کرانے کا ذریعہ بنے گا۔
میں چاہتا ہوں کہ لوگ قرآن کو محض پڑھنے تک محدود نہ رکھیں بلکہ اسے اپنی زندگی میں عملی طور پر نافذ کریں تاکہ ہم سب ایک بہتر معاشرے کی تشکیل میں کردار ادا کر سکیں۔
