16/10/2026
نوجوان کو اغوا کرکے تشدد برہنہ ویڈیو بنانے کا الزام
ملت ٹاؤن میں پیزا لینے آئے نوجوان کو مسلح افراد کی جانب سے اغوا کرکے نامعلوم مقام پر لے جانے کا دعویٰ جان سے مارنے کی دھمکیاں دینے اور تشدد کا نشانہ بنانے کے الزامات پولیس سے مقدمہ درج کرکے کارروائی کی اپیل
فیصل آباد ( ) تھانہ ملت ٹاؤن کے علاقے میں نوجوان کو مبینہ طور پر اغوا کرکے تشدد کا نشانہ بنانے اسلحے کے زور پر جان سے مارنے کی دھمکیاں دینے اور برہنہ حالت میں ویڈیوز بنانے کا سنگین الزام سامنے آگیا
درخواست گزار سجاد علی ولد شبیر احمد، سکنہ بلال نگر ملت ٹاؤن نے ایس ایچ او تھانہ ملت ٹاؤن کو دی گئی درخواست میں مؤقف اختیار کیا ہے کہ وہ جنید شاہ کے گھر پر بطور پرسنل ڈرائیور کام کرتا ہے درخواست کے مطابق 15 اکتوبر 2026ء کی رات تقریباً ایک بجے وہ ساریاز پیزا ہٹ پر اپنے مالک کے لیے پیزا لینے گیا جہاں مبینہ طور پر عثمان قریشی اور اس کے ساتھیوں نے اسے گاڑی سے اتار کر زبردستی لینڈ کروزر میں بٹھا لیا اور نامعلوم مقام پر لے گئے
درخواست گزار کے مطابق ملزمان نے اسے مبینہ طور پر تشدد کا نشانہ بنایا اسلحہ تان کر جان سے مارنے کی دھمکیاں دیں اور اس پر جنید شاہ کو مخبری کرنے کا الزام عائد کیا سجاد علی نے الزام لگایا کہ ملزمان نے اسے برہنہ کرکے ویڈیوز بنائیں اور معافی مانگنے پر مجبور کیا جس کے بعد تقریباً ڈھائی گھنٹے بعد اسے اس شرط پر چھوڑا گیا کہ وہ واقعے کے بارے میں کسی کو آگاہ نہیں کرے گا
درخواست میں مزید کہا گیا ہے کہ رہائی کے بعد متاثرہ نوجوان نے کینال روڈ پہنچ کر پولیس ایمرجنسی 15 پر کال کی تاہم اس کے بقول مدد کے لیے کوئی اہلکار نہ پہنچا بعدازاں وہ اپنے بھائیوں کے ہمراہ تھانہ ملت ٹاؤن گیا جہاں اس کے مطابق پولیس اسٹیشن کا دروازہ نہیں کھولا گیا
درخواست گزار نے پولیس حکام سے مطالبہ کیا ہے کہ مبینہ اغوا تشدد، دھمکیوں اور غیر اخلاقی انداز میں ویڈیو ریکارڈ کرنے کے الزامات کی تحقیقات کرکے نامزد اور نامعلوم ملزمان کے خلاف قانون کے مطابق مقدمہ درج کیا جائے اور اسے تحفظ فراہم کیا جائے
