22/03/2026
بچپن کی کچھ برفانی یادیں
یہ سردیوں کا اداس موسم ،کہ دھڑکنیں برف ہوگئی ہیں
جب ان کی یخ بستگی پرکھنا ، تمازتیں بھی شمار کرنا
اپنی زندگی میں ایک ایسا دور بھی گزرا ہے جب کارٹون اور انیمیشن فلمیں دیکھنا... اور آرکیڈ گیمز کھیلنا میرا محبوب مشغلہ ہوا کرتا تھا..... مجھے اچھی طرح یاد ہے... ہمارے محلے میں ایک انکل رہتے تھے جنہیں اپنے گھر میں مختلف ٹی وی سیٹس جمع کرنے کا جنون تھا.... اپنی ساری جمع پونجی وہ اسی شوق پر لگا دیتے تھے.... حالانکہ پیشے کے اعتبار سے ایک عام سے موچی تھے.....
ان کے گھر میں ایک کمرہ مخصوص تھا.... جس کی ایک پوری دیوار کے ساتھ انہوں نے لکڑی کی ایک بڑی الماری بنائی ہوئی تھی.... جو چھت تک جا پہنچی تھی.... اس الماری میں درجنوں خانے بنے تھے.... اور ہر خانے میں کسی نہ کسی کمپنی کا ٹی وی رکھا ہوتا.... مزید یہ کہ انہوں نے ڈش اور سیٹلائٹ کنکشن بھی لگوا رکھا تھا... اور چھت پر بے شمار ڈش اینٹینا نصب تھے.....
سب سے دلچسپ بات یہ تھی کہ ان کے ہر ٹی وی پر ایک مختلف چینل چل رہا ہوتا... یہ ہمارے گاؤں کا اتنا انوکھا واقعہ تھا کہ سب گھروں میں اسی کے چرچے رہتے..... ہم بچے ہر اتوار ان کے گھر جایا کرتے.... مختلف فلمیں اور ڈرامے دیکھتے... اور ساتھ ہی آنٹی ہم سے گھر کے کام بھی کروالیتیں 😅..... یوں ان کے بھی وارے نیارے ہو جاتے.... کیونکہ ان کی بیٹیاں تو زیادہ تر سارا دن بیٹھی ہی رہتی تھیں..... انکل بڑے جوشیلے اور خوش مزاج آدمی تھے... ہمیں دیکھ کر بہت خوش ہوتے... انہی دنوں میرا پہلا تعارف مختلف کارٹونز اور انیمیشن فلموں سے ہوا....
میرا سب سے پسندیدہ کارٹون دی لائن کنگ تھا.... انہی دنوں آئس ایج فلم بھی نئی نئی ریلیز ہوئی تھی... اور کئی دنوں تک اس کے اثرات سے باہر نہیں نکل پایا... خیر، وہ ابتدائی لڑکپن یا اختتامی بچپن کے دن تھے... اس لیے کہانی اور کردار دیر تک یاد نہ رہ سکے.... وقت پروں پر سوار اڑتا گیا..... جب دل و دماغ کی سیمابی کیفیت کو ذرا قرار آیا.... اور عمر نے پختگی کی ایک منزل پر کچھ دیر کے لیے ٹھہراؤ پایا.... تو دل چاہا کہ وہ فلم دوبارہ دیکھوں.... مگر اب تک اس کے دو تین حصے مزید ریلیز ہو چکے تھے... چنانچہ موقع غنیمت جان کر سبھی فلمیں دیکھ ڈالیں....
دوستو! سچ کہوں تو یہ فلمیں اتنی زبردست اور دلکش کہ انسان کو اپنے سحر میں جکڑ لیتی ہیں.... اس سیریز کی پہلی انسٹالمنٹ.... آئس ایج جو سن دو ہزار میں ریلیز ہوئی... ایک کلاسک کا درجہ رکھتی ہے.... ریلیز ہوتے ہی یہ فلم کمرشل لحاظ سے بے حد کامیاب ثابت ہوئی..... اور اسے بہترین اینیمیٹڈ فیچر کے لیے 75ویں اکیڈمی ایوارڈز میں نامزد کیا گیا......
فلم کا پلاٹ زمین کے ابتدائی عہد.... برفانی دور.. اور اس پر بسنے والے جانداروں پر مبنی ہے... کامیڈی ایسی کہ آپ ہنستے ہنستے لوٹ پوٹ ہو جائیں... اور ساتھ ہی ایسے جذباتی مناظر کہ دل کو چھو جائیں.... پہلی تین فلمیں..... خصوصا پہلی.. اپنے کرداروں کی کیمسٹری، جذباتی گہرائی، اور برفانی مناظر کی دلکشی کے باعث بے حد پسند کی گئیں.... اس سیریز کی جان دراصل اس کے تین مس فٹ ہیروز ہیں..... اداس...الجھا ہوا.. ہر وقت ذمہ داری کا احساس لئے ہوئے لمبے والوں والا برفانی ہاتھی مینی، مضحکہ خیز اور کاہل مزاج سڈ...... جو فلم کی کامیڈی کی جان ہے... اور سخت گیر مگر نرم دل ٹائیگر دیئیگو.... یہ تینوں مختلف حالات کے باعث ایک دوسرے کے قریب آتے ہیں اور ایک خاندان بن جاتے ہیں...... پھر ان کے دلچسپ ایڈونچرز شروع ہوتے ہیں......
لیکن سب کرداروں سے بڑھ کر ایک ایسا کردار ہے جو فلم کی خوبصورتی کو چارچاند لگا دیتا ہے.... ایک دیوانی سی گلہری.... جس کی اپنی دنیا ایک اخروٹ کے گرد گھومتی ہے.... اس اخروٹ کے جنون میں وہ ایسے ایسے کارنامے سرانجام دیتی ہے کہ لگتا ہے... اصل کہانی تو اسی کی ہے.....
الغرض..... اور کیا تعریف کی جائے.... یہ فلم نہ صرف شاندار انٹرٹینمنٹ فراہم کرتی ہے بلکہ زمین کے ابتدائی دور کی سائنسی جھلک بھی بڑے دلکش انداز میں پیش کرتی ہے.......اب تک اس فلم کے چھ پارٹس ریلیز ہو چکے ہیں اور ہر ایک پارٹ اتنا زبردست اور شاندار ہے کہ انسان کو ترنت مسحور کردیتا ہے... اگرچہ کچھ فلمی ناقدین اور تبصرہ نگاروں کا کہنا ہے کہ پہلے اور دوسرے پارٹ کے علاوہ باقی سب فلموں میں کہانی کو زبردستی کھینچا گیا ہے... لیکن مجھے ایسا نہیں لگتا... سارے پارٹس ہی بہت خوبصورت اور انگیجنگ ہیں ..... خیر یہ تو دیکھنے والے پر ڈیپنڈ کرتا ہے....
پتہ نہیں مجھے ایسا کیوں لگتا ہے کہ شاید وٹس ایپ گروپ میں ایک بار یہ فلمیں اپلوڈ ہو چکی ہیں... خیر اگر اب تک نہیں ہوئیں تو منتظمین حضرات سے اپلوڈ کرنے کی درخواست ہے......
Movie Name: Ice Age
Release: 2002
