21/06/2025
*جھنگ پولیس نے محرم الحرام کے سیکیورٹی پلان کو حتمی شکل دے دی*
جھنگ ( ) محرم الحرام کے دوران عزاداروں کو مکمل تحفظ فراہم کرنے کے لیے جھنگ پولیس نے سیکیورٹی پلان کو حتمی شکل دے دی ہے۔ ضلع بھر میں مجالس اور جلوسوں کی سیکیورٹی کے لیے مؤثر اور منظم اقدامات کئے گئے ہیں۔تفصیلات کے مطابق، محرم الحرام کے دوران ضلع جھنگ میں مجموعی طور پر 1902 مجالس اور 493 جلوس برآمد ہوں گے، جنہیں سیکیورٹی انتظامات کے تحت مختلف کیٹیگریز میں تقسیم کیا گیا ہے۔جلوسوں میں کیٹگری اے کے 73، کیٹگری بی کے 118 اور سی کیٹگری کے 302 شامل ہیں، اسی طرح مجالس میں کیٹگری اے کی 198, کیٹگری بی کی 619 جبکہ سی کیٹگری کی 1085 مجالس شامل ہیں۔سکیورٹی کے فرائض سرانجام دینے کے لیے 3000 سے زائد پولیس افسران و جوان جبکہ 1000 سے زائد والنٹیئرز تعینات کیے جائیں گے۔ڈی پی او جھنگ کیپٹن (ر) بلال افتخار کیانی نے بتایا کہ تمام مکاتبِ فکر کے علماء و مشائخ، امن کمیٹی کے اراکین، جلوس و مجالس کے منتظمین اور لائسنس داران کے ساتھ خصوصی میٹنگز کی گئیں ہیں۔شہر بھر کے داخلی و خارجی راستوں پر سخت چیکنگ کا عمل جاری رہے گا۔ سی سی ٹی وی کیمرے جلوسوں کے روٹس پر نصب کیے جائیں گے اور تھری لئیر سیکیورٹی فراہم کی جائے گی۔جلوس کے آغاز سے قبل روٹ کی خصوصی ٹیکنیکل سرچنگ اور سویپنگ کرائی جائے گی، جبکہ بم ڈسپوزل سکواڈ جلوس کے راستے کلیئر کرے گا۔برقعہ پوش خواتین کی تلاشی لیڈی پولیس اہلکار انجام دیں گی۔چھتوں پر چڑھنے پر مکمل پابندی ہو گی اور مسلح اہلکار وہاں ڈیوٹی انجام دیں گے۔جلوس کے راستوں سے ملحقہ علاقے مکمل سیل کئے جائیں گے اور مکمل تلاشی کے بعد ہی عزاداروں کو داخلے کی اجازت ہو گی۔ماسوائے پرمٹ ہولڈر گاڑیوں کے، کسی بھی گاڑی کے جلوس میں داخلے پر مکمل پابندی عائد ہو گی۔ امام بارگاہوں کے نزریک پارکنگ کی اجازت نہیں ہو گی۔جلوس و مجالس میں شرکت کرنے والے عزاداروں کو میٹل ڈیٹیکٹرز سے چیک کیا جائے گا۔جلوسوں کی فضائی نگرانی کے لیے آئی ٹی ٹیم بھی تشکیل دی گئی ہے۔کسی بھی ناگہانی صورتحال سے نمٹنے کے لیے اضافی نفری الرٹ رہے گی۔ڈی پی او جھنگ کا کہنا تھا کہ شہر کا امن اور ملکی سلامتی ہماری اولین ترجیح ہے۔ امن دشمن عناصر کے ساتھ آہنی ہاتھوں سے نمٹا جائے گا۔
