21/04/2026
چیـــــــــــــــف کورٹ گلگت بلتستان کا بڑا فیصلہ
ہینزل 20 میگاواٹ ہائیڈرل منصوبے کا معاہدہ منسوخ، چیف کورٹ کا فیصلہ
گلگت: گلگت بلتستان چیف کورٹ نے ہینزل 20 میگاواٹ ہائیڈرل پاور منصوبے کا معاہدہ ختم کرنے کا حکم دے دیا ہے۔
عدالت کے دو رکنی بینچ نے، جسٹس راجہ شکیل احمد کی سربراہی میں، منصوبے سے متعلق 6 ستمبر 2021 کا معاہدہ منسوخ کرتے ہوئے کنٹریکٹر جوائنٹ وینچر (FWO-CNEEC) کی کارکردگی گارنٹی ضبط کرنے کا بھی حکم دیا۔
فیصلے میں مزید ہدایت کی گئی کہ پراجیکٹ ڈائریکٹر کو فوری طور پر عہدے سے ہٹا دیا جائے اور 34 ماہ کی مقررہ مدت سے زائد عرصے کے دوران وصول کی گئی تنخواہوں اور مراعات کی ریکوری کی جائے۔ عدالت نے متعلقہ حکام کی کارکردگی پر برہمی کا اظہار کرتے ہوئے کہا کہ منصوبے میں غیر معمولی تاخیر عوامی مفاد کے منافی ہے۔
عدالت نے ہدایت کی کہ ہینزل 20 میگاواٹ ہائیڈل پراجیکٹ کی بروقت تکمیل کے لیے نئے پروکیورمنٹ (خریداری) معاہدے کی کارروائی فوری طور پر شروع کی جائے اور اس عمل کے ہر مرحلے سے عدالت کو باقاعدگی سے آگاہ رکھا جائے۔
مزید برآں، عدالت نے فیصلے کی نقل سیکریٹری واٹر اینڈ پاور گلگت بلتستان کو ارسال کرنے کا حکم دیا تاکہ اس پر عملدرآمد یقینی بنایا جا سکے۔
