06/05/2026
خیبر پختونخوا میں روسی فاختہ کے شکار کا ضابطہ جاری — قدرتی توازن کے تحفظ کے ساتھ ذمہ دارانہ شکار کی اجازت دی گئی ہے۔
محکمہ موسمیاتی تبدیلی، جنگلات، ماحولیات و جنگلی حیات خیبر پختونخوا نے حیاتیاتی تنوع کے تحفظ اور قانون کی مؤثر عملداری کو یقینی بنانے کے لیے روسی فاختہ (Russian Dove) کے شکار سے متعلق باضابطہ ضابطہ جاری کر دیا ہے۔ یہ اقدام خیبر پختونخوا وائلڈ لائف اینڈ بایوڈائیورسٹی ایکٹ 2015 کے تحت اختیار کردہ اختیارات کے مطابق کیا گیا ہے، جس کا مقصد فطری حسن کی بقا اور پرندوں کی آبادی کے پائیدار انتظام کو یقینی بنانا ہے۔
جاری کردہ اعلامیے کے مطابق سال 2025-26 کے دوران روسی فاختہ کے شکار کی اجازت صرف جمعہ، ہفتہ اور اتوار کے دنوں میں ہوگی، اور یہ سہولت صرف ان افراد کو حاصل ہوگی جو باقاعدہ سمال گیم شوٹنگ لائسنس کے حامل ہوں گے۔ یہ ضابطہ فوری طور پر نافذ العمل ہے اور 31 مئی 2026 تک مؤثر رہے گا۔
اعلامیے میں واضح کیا گیا ہے کہ مقررہ ایام کے علاوہ شکار کرنے والوں کے خلاف فوری قانونی کارروائی عمل میں لائی جائے گی۔ ہر شکاری کے لیے روزانہ زیادہ سے زیادہ 8 پرندوں کی حد مقرر کی گئی ہے۔
مقررہ حد سے تجاوز کرنے پر فی پرندہ 5,000 روپے بطور جرمانہ عائد ہوگا، اس کے علاوہ قانونی کارروائی بھی کی جائے گی۔ طلوعِ آفتاب سے قبل اور غروبِ آفتاب کے بعد شکار مکمل طور پر ممنوع ہوگا۔محکمہ جنگلی حیات کی ٹیمیں پرندوں کی آبادی کی مسلسل نگرانی کریں گی، اور ضرورت پڑنے پر شکار پر فوری پابندی عائد کی جا سکتی ہے۔
محکمہ نے عوام، خصوصاً شکاری حضرات سے اپیل کی ہے کہ وہ قوانین کی پاسداری کو یقینی بنائیں اور قدرتی وسائل کے تحفظ میں حکومت کا ساتھ دیں۔ جنگلی حیات نہ صرف ماحولیاتی توازن کی ضامن ہے بلکہ ہماری آئندہ نسلوں کے لیے ایک قیمتی امانت بھی ہے۔ ذمہ دارانہ رویہ ہی اس امانت کی بقا کی ضمانت بن سکتا ہے۔
محکمہ کے ترجمان لطیف الرحمان نے مزید کہا کہ حکومت خیبر پختونخوا ماحولیاتی تحفظ کے لیے سنجیدہ اقدامات کر رہی ہے، جن میں جنگلات کے فروغ، جنگلی حیات کے تحفظ اور موسمیاتی تبدیلی کے اثرات سے نمٹنے کے لیے جامع حکمت عملی شامل ہے۔ روسی فاختہ کے شکار کا یہ ضابطہ بھی اسی سلسلے کی ایک کڑی ہے، جو پائیدار ترقی اور فطرت سے ہم آہنگ طرزِ زندگی کو فروغ دیتا ہے
۔۔۔۔۔۔۔۔۔۔۔۔۔
محکمہ موسمیاتی تبدیلی، جنگلات، ماحولیات و جنگلی حیات، خیبر پختونخوا
