27/08/2025
جوہرِ زندگی ہے عشق، جوہرِ عشق ہے خودی
آہ کہ ہے یہ تیغِ تیز پردگیِ نیام ابھی!
علامہ اقبال اس شعر میں ایک فکری اور روحانی حقیقت بیان کرتے ہیں کہ زندگی کی اصل حقیقت اور بنیاد "عشق" ہے۔ یہ عشق ہی ہے جو زندگی کو معنویت بخشتا ہے، اسے تحریک دیتا ہے، اور اسے جمود سے نکال کر حرکت میں لاتا ہے,لیکن اقبال یہاں پر ایک اور گہرا نکتہ بیان کرتے ہیںعشق کا بھی ایک جوہر (اصل) ہے اور وہ "خودی" ہے۔
یعنی عشق اگر خالص ہو، تو وہ انسان کے اندر خودی کو بیدار کرتا ہے ,ایک ایسی خودی جو انسان کو ذلت پر راضی نہیں ہونے دیتی، جو اسے خدا سے ہمکلام کرتی ہے، اور اسے اپنی ذات کے اسرار سے روشناس کراتی ہے۔
مگر افسوس! یہ خودی جو عشق کا حاصل ہے، اور جو ایک تیز دھار تلوار کی طرح کائنات کو بدلنے کی طاقت رکھتی ہے، ابھی تک نیام میں چھپی ہوئی ہے یعنی خودی کی وہ درخشانی، وہ انقلابی تاثیر، وہ خدا سے قربت ، ابھی تک چھپی ہوئی ہے اور غیر فعال ہے۔
نظم:فرشتوں کا گیت
کتاب: بالِ جبریل
