24/04/2025
ڀارت پاران سنڌ طاس معاهدي کي پنهنجي پاران معطل ڪرڻ سان يڪدم ڪا 1948ع جهڙي صورتحال پيدا نَ ٿيندي. ان دور ۾ ڀارت وٽ ستلج ۽ راوي درياهن تي ٺهيل فيروز پور ۽ ماڌوپور هيڊورڪس موجود هئا جن تان ان پاڪستاني پنجاب ڏانهن پاڻيءَ جو وهڪرو روڪي ڇڏيو هو. هن وقت ٽن اولهندين ندين يعني سنڌو، جهلم ۽ چناب مٿان ڀارت وٽ پاڻي روڪڻ جو ڪو وڏو اڏاوتي ڍانچو (انفرااسٽرڪچر) موجود ناهي جنهن سان پاڻي روڪي سگهي. چناب ۽ جهلم تي ڀارت جا هائيڊل پاور جا ڊيم آهن جن مان بجلي ٺاهڻ لاءِ پاڻي ڇڏڻ ان جي مجبوري آهي. سنڌوءَ جا ڀارت پاسي وهڪرا ايڏا وڏا ناهن جن تي ڪو وڏو ڊيم ٻڌي سگهن. سنڌو طاس معاهدو روڪڻ سان ڪو ترت گهوٽالو پيدا ناهي ٿيڻو البته ڊگهي مدي تائين اها صورتحال جاري رهڻ سان ڀارت اولهندين ندين جو ڪجھ پاڻي روڪي يا ورائي سگهندو.
هن وقت ملڪي اسٽيبلشمينٽ سنڌ کي چوندي تَ ڇڏيو احتجاجن کي، ڀارت سڄي ملڪ جو پاڻي پيو روڪي، اچو تَ پهرين ان کي منهن ڏيون. درحقيقت ان صورتحال جو فائدو وٺندي سنڌ ۾ جاري ڪينال-مخالف جدوجهد کي ماٺو ڪرڻ لاءِ ميڊيا ۽ سرڪاري اينڪرن/ليکڪن وسيلي اهڙو ماحول ٺاهيو ويندو. سنڌ کي مودي سرڪار جي ان انتهاپسنديءَ جي مخالفت ضرور ڪرڻ گهرجي جو تَ ان جا ڊگهي مدي ۾ سنڌ کي بِ نقصان ٿي سگهن ٿا پر في الحال سنڌ کي تڪراري واهن خلاف پنهنجي جدوجهد کي ساڳي جذبي سان جاري رکڻ جي ضرورت آهي. جيئن پاڪستان کي هندستاني آبي اڳرائيءَ مان خطرو آهي بلڪل ائين ئي سنڌ کي بِ پنجاب جي آبي اڳرائيءَ مان خطرو آهي.
نصير ميمڻ جي وال تان
