06/09/2026
فتح پور: یومِ دفاع پاکستان کے موقع پر افواجِ پاکستان کو خراجِ تحسین، مرکزی انجمن تاجران کے زیرِ اہتمام پروقار تقریب
فتح پور: مرکزی انجمن تاجران فتح پور کے زیرِ اہتمام 6 ستمبر یومِ دفاع پاکستان کے حوالے سے افواجِ پاکستان کو خراجِ تحسین پیش کرنے کے لیے ایک پروقار تقریب صدر انجمن تاجران فتح پور چوہدری محمد حمید کے دفتر میں منعقد ہوئی، جس میں سابق ایم این اے صاحبزادہ فیض الحسن سواگ، انجمن تاجران کے عہدیداران، تاجر برادری اور میڈیا نمائندگان نے بھرپور شرکت کی۔ تقریب سے خطاب کرتے ہوئے سابق ایم این اے صاحبزادہ فیض الحسن سواگ نے ملکی دفاع کے لیے افواجِ پاکستان کی قربانیوں، بہادری اور جذبۂ حب الوطنی کو زبردست خراجِ عقیدت و تحسین پیش کیا۔ انہوں نے کہا کہ 6 ستمبر ہماری قومی تاریخ کا وہ یادگار دن ہے جب پاک فوج کے جوانوں نے دشمن کے ناپاک عزائم کو خاک میں ملا کر وطنِ عزیز کے دفاع کی شاندار مثال قائم کی۔ قوم اپنے شہداء اور غازیوں کی لازوال قربانیوں کو ہمیشہ یاد رکھے گی۔اس موقع پر صدر پریس کلب فتح پور چوہدری محمد عمران نے پاک فوج سے اظہارِ یکجہتی کرتے ہوئے "پاک فوج زندہ باد، پاکستان پائندہ باد" کے نعرے لگوائے، جس سے تقریب کا ماحول حب الوطنی کے جذبات سے بھر گیا۔تقریب میں جنرل سیکرٹری چوہدری محمد یونس جٹ، چوہدری محمد ریاض نمبردار، چوہدری محمد مقصود، چوہدری خالد محمود مغل ۔ چوہدری یاسر سلطان، ملک محمد اشرف کھوکھر، چوہدری عبدالرزاق، بابا محمد امین، چوہدری مقصود احمد، چوہدری محمد آصف رفیق، جہانزیب خان، چوہدری محمد یسین آرائیں، یونس جاوید چیمہ، محمد شفیق، راؤ مزمل حسین سمیت انجمن تاجران کے دیگر عہدیداران، تاجر رہنماؤں اور میڈیا نمائندگان نے شرکت کی۔ شرکاء نے اس عزم کا اظہار کیا کہ وطنِ عزیز کی سلامتی، خودمختاری اور دفاع کے لیے پوری قوم اپنی بہادر افواج کے شانہ بشانہ کھڑی ہے اور پاکستان کے شہداء کی قربانیوں کو ہمیشہ یاد رکھا جائے گا۔
