05/02/2026
تحصیل لاہور پریس کلب کا اہم اجلاس، صحافی ایوب خان کو ملنے والی دھمکیوں پر شدید تشویش
تحصیل لاہور پریس کلب کے ایک اہم اجلاس میں صحافی ایوب خان کو ملنے والی دھمکیوں پر گہری تشویش کا اظہار کیا گیا۔ اجلاس کے شرکاء نے اس واقعے کو آزادیٔ صحافت پر حملہ قرار دیتے ہوئے متعلقہ حکام سے فوری اور مؤثر نوٹس لینے کا مطالبہ کیا۔
اجلاس کی صدارت صدر مختیار مہمند نے کی، جبکہ جنرل سیکرٹری شاہد احمد خان، نائب صدر شیراز اعوان، ڈپٹی جنرل سیکرٹری ساجد امین، انفارمیشن سیکرٹری فدا محمد، آفس سیکرٹری احمد علی، ممبر یوسف علی اور پریس کلب کے سینئر ممبر بابو لاجبر سمیت دیگر اراکین نے شرکت کی۔
اجلاس میں اس امر پر اتفاق کیا گیا کہ صحافیوں کو ان کے پیشہ ورانہ فرائض کی ادائیگی سے روکنے، دھمکانے یا دباؤ میں لانے کی کسی بھی کوشش کو کسی صورت برداشت نہیں کیا جائے گا۔ شرکاء نے صحافی ایوب خان کے ساتھ مکمل یکجہتی کا اظہار کرتے ہوئے واضح کیا کہ صحافتی برادری اپنے ساتھی کے شانہ بشانہ کھڑی ہے۔
پریس کلب کے اراکین نے زور دیا کہ اگر اس معاملے کا فوری، شفاف اور منصفانہ حل نہ نکالا گیا تو ضلع صوابی کی صحافتی تنظیمیں آئندہ کے لائحہ عمل پر غور کرنے پر مجبور ہوں گی۔ اجلاس میں مطالبہ کیا گیا کہ صحافیوں کے جان و مال اور پیشہ ورانہ تحفظ کو یقینی بنایا جائے تاکہ وہ بلا خوف و خطر اپنے فرائض انجام دے سکیں۔
