26/06/2026
*ڈیرہ ڈویژن میں دسویں محرم الحرام کے ماتمی جلوس فول پروف سیکیورٹی میں خیر وعافیت سے اختتام پذیر؛ کمشنر، اسٹیشن کمانڈر اور آر پی او کی خود نگرانی*
*موجودہ چیلنجز کے پیشِ نظر فضائی نگرانی اور تکنیکی سیکیورٹی کے لیے **اینٹی ڈرون گنز اور سگنل جیمرز کا جدید ترین استعمال*
*ڈیرہ رینج (ضلع ڈیرہ میں 8255 اور ٹانک میں 1631) کے ہزاروں پولیس افسران اور جوانوں نے دن رات فرائض سرانجام دیے۔
* امن و امان کے قیام اور بہترین انتظامات پر پاک آرمی، ریسکیو 1122، ٹی ایم اے، واپڈا، علماء کرام، امن کمیٹی، میڈیا، تاجر برادری اور غیور عوام کا شکریہ
ڈیرہ اسماعیل خان ڈویژن میں دسویں محرم الحرام کے تمام ماتمی جلوس پولیس اور سیکیورٹی فورسز کے فول پروف انتظامات کے تحت روایتی راستوں سے ہوتے ہوئے اپنے مقررہ مقام کوٹلی امام حسینؑ پر خیروعافیت کے ساتھ اختتام پذیر ہو گئے۔
یومِ عاشور کے موقع پر کمشنر ڈیرہ داود خان، اسٹیشن کمانڈر بریگیڈیئر محمد ابوبکر اور ریجنل پولیس آفیسر ڈیرہ ڈویژن غلام مبشر میکن نے تمام ماتمی جلوسوں کے سیکیورٹی انتظامات کی براہِ راست خود نگرانی کی۔ اس موقع پر ڈپٹی کمشنر ڈیرہ حکمت اللہ وزیر، ڈی پی او ڈیرہ ضیاء الدین احمد اور پاک آرمی کے اعلیٰ افسران بھی ان کے ہمراہ فیلڈ میں موجود رہے۔
محرم الحرام کے دوران امن و امان کی فضا برقرار رکھنے کے لیے ضلع ڈیرہ میں 8,255 اور ضلع ٹانک میں 1,631 سے زائد پولیس افسران اور جوانوں نے دن رات انتہائی تندہی اور پیشہ ورانہ مہارت کے ساتھ اپنے فرائض سرانجام دیے۔ امام بارگاہوں کے چاروں اطراف اور جلوس کی گزرگاہوں کو سخت سیکیورٹی حصار میں لیا گیا تھا۔
موجودہ ملکی حالات اور دہشت گردی کے ممکنہ خطرات سے نمٹنے کے لیے اس بار سیکیورٹی کو جدید ترین خطوط پر استوار کیا گیا تھا۔ کسی بھی فضائی خطرے یا غیر قانونی ڈرون موومنٹ کو ناکام بنانے کے لیے پولیس لائنز اور جلوس کے حساس ترین مقامات پر جدید اینٹی ڈرون گنز تعینات کی گئیں، جبکہ تخریبی عناصر کے عزائم کو خاک میں ملانے اور کمیونیکیشن بلاک کرنے کے لیے ہائی ٹیک سگنل جیمرز کا استعمال بھی عمل میں لایا گیا۔
کسی بھی ناگہانی یا ہنگامی صورتحال سے فوری اور بروقت نمٹنے کے لیے پولیس لائنز ڈیرہ میں کوئیک ریسپانس فورس، ریپڈ ریسپانس فورس اور البرق فورس کے چاک و چوبند دستوں سمیت دیگر متعلقہ محکموں کے فوکل پرسنز الرٹ رہے۔
اس کامیاب اور پرامن انعقاد پر انتظامیہ اور سیکیورٹی حکام نے کہا کہ محرم الحرام کے دوران اتحاد بین المسلمین اور امن کے قیام کے لیے تمام اسٹیک ہولڈرز کا کردار قابلِ ستائش رہا۔ انہوں نے بہترین کوآرڈینیشن اور دن رات خدمات کی فراہمی پر پاک آرمی، ریسکیو 1122، ٹی ایم اے اور واپڈا کے افسران و ملازمین کو زبردست خراجِ تحسین پیش کیا۔
حکام نے مزید کہا کہ ماضی کی روایات کے مطابق اس سال بھی ضلع ڈیرہ اسماعیل خان اور ٹانک کے علماء کرام اهلِ سنت و اہلِ تشیع، امن کمیٹی، تاجر برادری اور میڈیا نے ضلع میں بھائی چارے اور امن و امان کو قائم رکھنے میں اپنی ذمہ داریاں مثالی انداز میں نبھائیں۔ بالخصوص ڈیرہ اور ٹانک کی غیور عوام کا تہہ دل سے شکریہ ادا کیا گیا جنہوں نے قانون نافذ کرنے والے اداروں کے ساتھ مکمل تعاون کیا۔ حکام نے امید ظاہر کی کہ مستقبل میں بھی اس شہر کے دیرپا امن، ترقی اور خوشحالی کے لیے سیکیورٹی فورسز اور انتظامیہ کے شانہ بشانہ اسی جذبے کے تحت کام کیا جاتا رہے گا
