01/09/2026
لاسپور کے عوام کا ٹیلی نار اور این ایچ اے کو ایک ہفتے کا الٹی میٹم، شاہراہِ شندور بند کرنے کی وارننگ
لاسپور کے علاقے ہرچین میں سہروردی خان یفتالی کی قیادت میں عوامی جلسہ منعقد ہوا، جس میں ٹیلی نار کی ناقص موبائل سروس اور نیشنل ہائی وے اتھارٹی (این ایچ اے) کی جانب سے شاہراہِ شندور کی تعمیر کے دوران مبینہ طور پر عوامی اور زرعی زمینوں کو پہنچنے والے نقصانات پر شدید احتجاج کیا گیا۔
مقررین نے کہا کہ ہرچین اور دیگر علاقوں میں شاہراہِ شندور کی تعمیر کے نام پر جگہ جگہ کھدائی کر کے راستوں اور زرعی زمینوں کو شدید نقصان پہنچایا گیا، جبکہ متاثرہ زمینوں کا معاوضہ بھی تاحال ادا نہیں کیا گیا۔ رواں سال کمشائے، لشٹ اور ہرچین سمیت مختلف علاقوں میں زرعی زمینیں متاثر ہوئی ہیں۔
جلسے کے شرکاء نے مطالبہ کیا کہ ٹیلی نار کی ناقص سروس کے باعث علاقے میں نصب ٹاور کو ایک ہفتے کے اندر ہٹایا جائے، کیونکہ عوام کے مطابق ٹاور کے باوجود قابلِ اعتماد سروس فراہم نہیں کی جا رہی۔
رامان لاسپور، گشٹ، بالیم، بروک، پھورت، ہرچین اور سور لاسپور کے عوام نے متعلقہ اداروں کو ایک ہفتے کا الٹی میٹم دیتے ہوئے کہا کہ اگر اس مدت کے اندر شاہراہ کی بحالی، متاثرہ زمینوں کے معاوضے اور دیگر بنیادی مسائل کے حل کے لیے عملی اقدامات نہ کیے گئے تو عوام شاہراہِ شندور کو مکمل طور پر بند کرنے پر مجبور ہوں گے۔
عوام نے واضح کیا کہ احتجاج یا شاہراہ کی بندش کی تمام تر ذمہ داری متعلقہ اداروں اور حکام پر عائد ہوگی۔
